Difundish dia 3

Uswiridin kwilej piur pa Nzamb

Chakwel kwikal murund nend Nzamb, uswiridin kwilej piur pend. Ov arund ney ij dijin diey ni akat kudisadilang? Mwawiy. Nzamb usotil anch wijika dijin diend ni kudisadil. Dijin dia Nzamb didi Yehova. (Kuseng 83:18, NW; Mateu 6:9) Ufanyidin kand kwilej yikatilay ni yikisinay. Uswiridin kwijik anany adia arund nend ni anany adia akankuny nend. Chakwel kumwijik muntu kampand chifanyidin chisu chilemp. Baibel ulondil anch chidi cha manangu kwitekinaku chisu cha kwilej piur pa Yehova.—Efes 5:15, 16.

Arund nend Nzamb akat kusalang yom yimusangarishina. Tonginap bil arund ney. Anch ushich nau nayimp ni kusal yom yikisinau, ov akudandamen kwikal arund ney? Chakin anch bwat! Chawiy chimwing, anch usotil kwikal murund nend Nzamb, uswiridin kusal yom yimusangarishina.—Yohan 4:24.

Yifukwil yawonsu yitwadilap ku urund nend Nzamb. Yesu, murund wa piswimp nakash wa Nzamb, walondila njil jaad. Yimwing yibwabumukin ni yizwil too antu. Njil yiney yitwadil ku kujiy. Njil yikwau yiwongin ni yikwet antu akemp kusu endidilamu. Njil yiney yitwadil ku mwom wa chikupu. Chinech chirumburikin anch, ang usotil kwikal nich urund wa Nzamb, ufanyidin kwilej njil yitentamina ya kumwifukwil ndiy.—Mateu 7:13, 14.