Ov, Marelijon Mawonsu Madi Mawamp?

TUSHICH mu mangand mudia marelijon mavud kushalijan. Kukimbijol kwasadilau katat kamu ak kulejen anch kudi marelijon majim majim 19 ni makwau makemp makemp 10 000 mu mangand. Kuvulijan kwinoku kwa marelijon kuyinkishin antu chisu cha kutond relijon ukatinau. Komb chikwetap kwau mulong chikalap nchik relijon mu ukwandama kwey?

Antu amwing alondining anch marelijon kushalijan madi kwau mudi jinjil kushalijan jiyila jawonsu ku mukandu umwing. Kudi antu inay, kwikil cha kwiyakamish piur pa njil yitondinau, mulong jinjil jawonsu jiyil kwau kwindond yawiy yimwing. Atongining kand anch kudi ching Nzamb Mwin Dikand Diawonsu umwing kusu, chawiy lel marelijon mawonsu mayil kudi ndiy kusu.

Ov, Jinjil Jawonsu Jiyil Kudi Nzamb?

Chom ik chalonday Yesu Kristu, mulej umwing ulimishiningau pakach pa alej awonsu a mu rusangu ra muntu pa mulong winou? Ndiy wayileja in kwilejend anch: “Andamany mu kachis kiwongila.” Ov, mulong wak? “Mulong chis chibwabumukina ni njil ya mukombil yiyil ku kujiy, akata kwandaminamu avudil. [Pakwez] . . . chis chiwongila ni kajil katentamina yitakedil ku kupand, akemp kusu akata kuyibudikin.”—Mateu 7:13, 14.

Ov, chakin kamu Yesu walonda anch marelijon mamwing mayil “ku kujiy”? Ap anch wading ulejen anch ching kusu apagan awiy adia mwinjil yijim, oku antu amwitiyijina Nzamb—chikalap nchik relijon mudiau—adi mu kajil katentamina kayila ku kupand?

Kupwa kamu kwa kulond anch kudi jinjil jaad, Yesu walonda anch: “Yibabelany aprofet a makasu, akwez kudi en ibwikil yikit ya amikoku, pakwez mukach adi atwingol ayidiany.” (Mateu 7:15) Weza kulond kand anch: “Awonsu akat kwingel anch Mwant Mwant, kawiyip akeza kwandam mu want wa mwiur, ching ndiy ukata kusadil rukat ra Tatukwam udia mwiur.” (Mateu 7:21) Anch kudi muntu utazukiningau anch muprofet ap anch ukat kulond amwinend anch Yesu udi “Mwant” wend, chidi komb cha manangu kulond anch udi mwin kwifukwil, kadiap mupagan. Choviken komb patok, Yesu wadinga ubabeshin anch kadiap marelijon mawonsu madia mawamp ni kadiap alej awonsu a relijon adia a kuchingejin.

Ov, Chitwishikin Kujingunin Kajil Kiwongila?

Jinjil jawonsu kijiyilap kudiay Nzamb, ov, mutapu ik lel ukutwisha kutan mu tutikit twa yitongijok kajil kiwongila kayila ku kupand? Tushinshikinany chilakej chinech: Tulonda anch ushadikin mu musumb ujim. Chad wakwat mupak wa kumwipul muntu kanang chakwel akukwasha. Muntu umwing wakulej nich kashinsh kawonsu anch yang kwingangel. Muntu mukwau wakasikesh nakash anch yang kurand. Mukwau wa kasatu niyend wakulej anch ukutwish waya kwey mwinjil yiusotila. Kwinsudiel, mukwen uyila nend mu weny wabudish kart ni wakulej njil yiwamp yiufanyidina kuya. Kupwa wakwinkish niyey kart chakwel utalap piuyila. Ov, ukovap katat usu wakwel anch ukutwish washik kuuyila?

Chawiy kand, pa mulong wa kutond njil ya relijon wakin, tukwet kuswir kwa kart wa muspiritu ulejena jinjil. Ov, kart winou udiaku? Inge, udiaku. Kart winou udi Bibil, ulondila anch: “Mazu mawonsu ma mukand wa Nzamb madiokala ku [spiritu] wa Nzamb, makutwish kuyilej antu kuyibabesh ni kuyitenchik, ni kuyilej kwirijek mu kutentam.”—2 Timote 3:16.

Anch ukwetany Bibil wakarumunau kal mu rudim ren ukutwisha kusadil mudi kart wa muspiritu. Atuman a Yehova akata kupalangesh jurnal unou, apalangeshin Bibil umwing wa kuchingejin nakash wijikena anch Les Saintes Écritures — Traduction du monde nouveau. Pakwez, anch kiudiap Kaman wa Yehova, ukutwish wasot kusadil yikarumun yikwau ya Bibil pa chisu wisambidinany mulong wa kusot kujingunin relijon muwamp ni muyimp. Chawiy lel, mitu ya milong yiney yilondulijadina yijimbwil maverse mavud mu mutapu wamakarumunau mu yikarumun kushalijan ya Bibil yilimishinau mu mangand kudi antu a marelijon makwau.

Piukutanga mitu ya milong yilondwilaku ey, pakish kwilikej yom yiwija ni yilondilay Bibil. Lam mu manangu mazu malonday Yesu pa mutapu tukutwisha kutek kushalijan pakach pa relijon muwamp ni muyimp. Yesu walonda anch: “Mutond uwamp ukat kusong mabuj mawamp; pakwez mutond uyimp ukat kusong mabuj mayimp. Ni mutond uwamp kiukutwiship kusong mabuj mayimp, ap mutond uyimp kiukutwiship kusong mabuj mawamp.” (Mateu 7:17, 18) Tushinshikinany yom yisatu yidia mabuj mawamp malondinay Bibil anch yawiy yikutwisha kututwishish kuwijik “mutond uwamp.”