Ov, Nzamb Witiyijin Mitapu Yawonsu ya Kwifukwil?
Yakul yituteshininga chisu chawonsu:
▪ “Marelijon mawonsu madi kwau jinjil jiyila kudi Nzamb.”
▪ “Chikwetap kwau mulong chikalap nchik yom yiwitiyijina anch udi muntu wa kashinsh.”
Yom ik yalonday Yesu?
▪ “Andamany mu kachis kiwongila; mulong chis chibwabumukina ni njil ya mukombil yiyil ku kujiy, akata kwandaminamu avudil. Mulong chis chiwongila ni kajil katentamina yitakedil ku kupand, akemp kusu akata kuyibudikin.” (Mateu 7:13, 14) Yesu kitiyijap anch jinjil jawonsu jiyil kudiay Nzamb.
▪ “Avud akez kangel mu dichuku dinidia anch: Mwant Mwant, ov kitwalondap dizu mu dijin diey, ni ku dijin diey kitwadioshap ayilembil, kitwasadilap midimu yikash ku dijin diey? Chawiy am nikez kayichiril anch: Kand kal nikwijikanyip; ndiokilany kwa, midimu yiukat kusalany yiyimp.” (Mateu 7:22, 23) Yesu kadingap ni kuyitiyij antu in awonsu adinga ni kufa mu kan anch adi in kwilej end.
ANTU avud adia mu marelijon akatining nakash malejan mau ni yishankur yau. Pakwez kuding chom ik anch malejan minam kimakwatijadinap nich yidia mu Bibil, Dizu dia Nzamb? Yesu walejana ubaj udiaku ku kulondul yishankur ya antu payilonday antakel a relijon a pa dichuku diend anch: “Mwamu muwasheshilanya kal dizu dia Nzamb mulong wa yaku yen.” Ni wadandamena nich kujimbul mazu manam ma Nzamb anch: “Antu ang akat kwinlimish ni milamu yau, pakwez michim yau yidi kulemp ni yamam. Akat kwingifukwil chamwamu, mulong malejan mau madi kwau malejan ma antu kusu.”—Mateu 15:1-9; Isay 29:13.
Mashakamin ni mawiy madi ma usey ujim, kichidiap malejan kusu. Bibil ulondil piur pa antu amwing alondininga anch amwifukwidil Nzamb: “Akat kulond ni milamu anch tumwij Nzamb, pakwez akat kumulikil mu yisalijok yau.” (Titus 1:16) Chakin kamu, Bibil ulondil piur pa antu adiaku mu chirung chetu chinech anch: “akez kwikal in kutungilijan, in kwitutul kwitong, in kubwambul, akwisangarish ayinau, Nzamb bwat; akez kwikal ni chifu cha Nzamb, pakwez end atun ukash wau. Chin antu adia mwamu.”—2 Timote 3:4, 5.
Kashinsh kadi ka usey, pakwez kudi yom yivud yiswiridikina. Ov, mulong wak? Mulong muntu ukutwish widimb nich kashinsh. Chawiy lel ronganyin rakin piur pa Nzamb ridi ra usey ujim. (Rome 10:2, 3) Kwak ronganyin riner ni kushakam kukwatijan nich yilondila Bibil kukez kututwishish tumusangaresha Nzamb. (Mateu 7:21) Chakin, relijon wakin witin kwikal nich manangu mawamp, yitiyij ni yisal yitentamina. Ni yisal yitentamina yirumburikin kusal rusot ra Nzamb pichuku pichuku!—1 Yohan 2:17.
Anch usotil wijika yom yivud piur pa yitulejinay Bibil piur pa Nzamb, isamba ni Atuman a Yehova chakwel utenchikany dilejan dia Bibil dia kolikwey.
[Tablo wa jinsangu udia pa paj wa 9]
Relijon wakin witin kwikal nich manangu mawamp, yitiyij ni yisal yitentamina