Anch Kwashiken Mar Madiokila ku Yom Yatangau

Andrew udia mwi ngand ya Sierra Leone ulondin anch: “Kwinsambishin twashadisha ruchingej. Yom yawonsu twading nich yasheshika ku mem.”

David udia pa matung matazukinau anch Les îles Vierges ulondin anch: “Patwachirika ku chikumbu kupwa kwa rinkind mukash watuta, kwikil chom ap chimwing twatana. Twakanganya cha kulond. Mwanam mband wawa pansh wasambish kudil.”

ANCH warishinap kal ni mar makata kudiokal ku yom yatangau, ukutwish kwijik mutapu ukatau kwiyov antu akwau akata niyau kurish ni mar mudi minam: Akat kulengumwok, kuman chak mudi chilat, kurumbangan mu manangu, kwiyakamish chipandikena, ni kuker tul. Antu avud arishina kal ni mar mudi minam, akat kuziy nakash ni kutong anch kakutwishap kand kuwapish mashakamin mau.

Anch niyey washadishin yom yawonsu kusutil mar kampand mashikedina, niyey ukutwish kwiyov anch washik kal kwinsudien. Pamwing ap ukutwish kand kwiyov anch mwom wey ukwetap usey. Pakwez Bibil ulejen anch mwom wey ukwet usey nakash ni ulejen kand anch ukwet mayingishin mawamp ma kwikal ni ruchingej mulong wa mwom uwamp wa machuku ma kurutu.

UYAKIN UDIA MU BIBIL UTWINKISHIN RUCHINGEJ

Mulej 7:8 ulondin anch: “Dipwishil dia mulong ukumanay muntu didi diwamp kupandakanamu disambishil.” Anch udi kwinsambishin kwa chakamish urishina nich, ukutwish kutong anch yom yikuwapap kwau. Pakwez anch wadandamen nich kushimpish muchim kusal usu wa kuwapish mashakamin mey, yom yikutwish kwau kuwap.

Bibil wasambela kulejan piur pa ngand yisu anch “mwinimwa mukez kikalap kand madil ap kwinan.” (Isay 65:19) Mazu minam makuwanyin pakukarumunau divu kwikal paradis chisu chikuyikela Want wa Nzamb pa divu. (Kuseng 37:11, 29) Mar madiokila ku yom yatangau makwikalakwap kand. Ni kusansan kukata kudiokal ku mar minam kukwikalakwap kand, mulong Nzamb Mwin Dikand Diawonsu ushidinamu anch: “Am nikat kutang mangand masu ni maur masu. Yom yawonsu ya pakur akez kayivuramen.”—Isay 65:17.

Tongijok bil: Sakatang watenchika kal “kukuletil ruchingej ra kurutu”—mwom wa chisambu mwinshin mwa winyikel wa Want wa Nzamb. (Jeremiy 29:11) Anch wijik uyakin winou, umenap anch mwom wey udi wa usey? Sally wajimbulangau mu mutu wa mulong wa kusambish ulondin anch: “Kuvurik yom yawonsu yiwamp yikusala Want wa Nzamb mulong wetwetu mu machuku ma kurutu kukutwish kukukwash kuvuramen yom yiyimp yasuta kal ni kujijamen milong ya katat.”

Ov, umenap amboku anch chidi cha usey kwilej yom yivud piur pa yom yikusala Want wa Nzamb mulong wa antu? Anch wasal mwamu, ukutwish kwikal nich kashinsh anch chikalap nchik mar urishina nich, mwom wey ukwet usey nakash nlel piuchingedina kushilamu kwa machuku ma kurutu. Pakwez pa chisu chinech, Bibil upanin yiyul yiwamp yakusadin yikutwisha kukukwash kujijamen mar madiokila ku yom yatangau. El tushinshikinany yilakej yimwing.

Maverse ma Bibil Makutwisha Kukukwash

Iswedisha chiwanyidina.

“Chidi chiwamp kwikal nich yom yikemp nich chisambu, kupandakan kwiswidiosh nich midimu yikash yakad ukwash. Mwamu chidi kumulondul rinkind.”—Mulej 4:6.

In kukimbijol alejen anch kupwa kwa kwiyakamish nakash mulong wa yom yiyimp yashikenang, “kuker tul . . . kukutwish kupandikesh yakamish ni kusal anch ukanganya kuyidutish.” Chawiy, chidi chiwamp kwiswedish chiwanyidina.

Yilejamu antu akwau mutapu wiyovila.

“Kwakam mu muchim kukat kumuziyish muntu, pakwez dizu diwamp dikat kumuletin musangar.”—Jinswir 12:25.

Mulejamu muntu wa mu dijuku diey ap murund uchingejidina. Kupwa kwa kutesh nawamp mutapu wiyovila, antu a mu dijuku diey ap arund ney a piswimp akutwish kukukasikesh ni kukwinkish ukwash uswirikedina.a

Tong piur pa machuku ma kurutu chisu chikuwapa mwom.

“Pakwez etu tukat kuchingej maur masu ni mangand masu mudi mwashilayimu Nzamb. Chad kwinikwa kwawiy kukeza kwikal kutentam.”—2 Pita 3:13.

a Muntu ukata kwiyakamish chisu chilemp ap kutong nakash ufanyidin kukimb ukwash wa chimwingang.