Sakatang Wetu Mujim Ukat Kutulam!
1 Mu kupakish kwend kutongin pamwing ni Isarel mwin kubwambul, Yehova wipula anch: “Ov wijikap ap kutesh? Yehova, Sakatang wa mimbu ya divu, udi Nzamb umwing wa mivu ni minang.” (Isa. 40:28, NW) Tumwij Sakatang wetu Mujim, ni tumen mutapu utulaminay nich rukat. Pakwez, mamiliyon ma antu achikwet ntad piur pa kwikaliku kwend ap akwet chitongijok chimwing piur pend chakad kwambatan ni yifundishina Baibel. Mutapu ik tukutwisha kuyikwash?
2 Buku musu Y a-t-il un Créateur qui se soucie de vous? amusadin mulong wa kukwash antu mud inay. Uyitin antu in manangu kutongin milong. Yitongijok yisangarishina ni malejan mitiyishina yidia mu buku winou yifanyidin kupwit antu amutangina.
3 Twiyijidishany Nich Buku Créateur: Tuvurikany mitu ya milong yijim yidiamu. Mashapitre 2 kushik ku 5 misambidin mutapu wasalau uumb wawonsu wa mangand, mwom, muntu ni disambishil diawu. Mashapitre 6 kushik ku 9 misambidin Baibel ni mwin kumufund, ni mavuvurishin nakash mulong wa ukinakin wa rusangu ra uumb rifundinau mu Disambishil. Shapitre 10 wakwidil mutapu ufanyidina chimwing cha mu yipul yizuwodila chikatay kwiyipul muntu anch: “Anch kuding Sakatang ukata kutulam, ov mulong wak kudia mar mavud?”
4 Tupakishany Kutong ni Antu Achitadikina: Mapaj 78-9 ma buku Créateur malejen yitongijok tukutwisha kusadil mulong wa kukwash antu kushiken dipwishil diwamp piur pa Nzamb. Tuyipula anch: “Ov uumb wawonsu wa mangand ukwet disambishil?” Avud akwitiy anch ukwet disambishil. Chad lel, tuyipula anch: “Ov disambishil dined diyikadilaku kusu adinad ap kud muntu wadisala?” Avud ijing anch kudi muntu wadisala. Chinech chitushikijin ku chipul cha nsudel: “Ov, disambishil dia uumb wawonsu wa mangand, adisala kud chom kanang cha chikupu ap kud Muntu kampand wa chikupu?” Mutapu winou wa kwisamb ni antu ukushikij chakin avud kutesh anch kufanyidin kwikal Sakatang.
5 Buku Créateur udi kamu buku uswiridinau antu. Tumupanany buku winou kud anamakwetu, ambayetu a mudimu, ambayetu a shikol, ni antu itwija. Tusendany makopi mamwing ma buku winou mu chingand chakwel tukutwish kumapan kud antu tukusankana achitadikina kwikaliku kwa Nzamb. Anch twiyijidish nakash nich buku winou, rukat retu mulong wa Yehova rikukasikan, ni rikutubachik kudandamen kwendil mu yijidik yend ya piur.—Efe. 5:1; Kubur. 4:11.