Yakul Ku Yipul Yen
◼ Mutapu ik tukutwisha kusal Chivurish cha rufu ra Kristu mutapu ufanyidina?
1 Uchuku wamutungulau, Yesu wasambisha Chivurish cha rufu rend ni kulond anch: “Uchisalangany mu kwinvurik am.” (Luka 22:19) Mutapu ik tufanyidina kumuvurik Yesu? Anch tusotin kwikal in kwilej a Kristu, chifanyidin kamu anch muntu ni muntu atesha mulong wak kudia chijil chinech, ni dirumburik dia chijil chinech kud ndiy ni mulong wa machuku mend ma kurutu.
2 In Kristu amwing arijekining musambu pa dichuku dia Chivurish. Chisu chikwau, ansand akat kusalang musambu wau ayinau ni amakurump ni yawiy chilik chimwing. Akwatining yipich mulong wa “kutek kashony” pa chisu chinech. Anvaj akat kuyilandin aanau maswin masu ni yipan yikwau yikwau. Amwing akat kulangwishijan pa dichuku dined nich mazu mud “bonne fête!” Ov winou wawiy mutapu wasotay Yesu anch tumuvurika?
3 Mupostol Paul walonda anch: “Mudi muukez kadiany mabot minam tupamp tuvud ni kuna rupas, ukuvurikany rufu ra Mwant ni pakwezilay.” (1 Kor. 11:26) Chawiy lel, Chivurish chipwitidin yitongijok yetu ku mudimu ujim usadila rufu ra Yesu mu kushiken kwa rutong ra Yehova. Rufu rend ratwishishin kuyikul aan a Adam ni kuyinkish antu iyijidishina ritiy mutapu wa kushakam chikupu pa divu dikarumwinau paradis. (Yohan 3:16; Dis. 1:28) Mulong wa ritiy rau mu mash michilay Kristu, “amikoku akwau” adi ishitwila kurutu kwa Yehova. Mwi njil yiney itapidil dilau dia kumusadil Nzamb ‘mudimu utumbila muten ni uchuku mu tempel yend.” (Kubur. 7:14, 15) Chikwau kand, Chivurish chikat kuyivurish amikoku akwau anch akwet ruchingej ripandikena kuwap ra kwikal antu awanyidina ni atentamina pakezay kuchirish Yesu Want kud Tatukwend.—Zef. 2:2, 3, NW; 1 Kor. 15:24.
4 Chalonday anch: “Uchisalangany mu kwinvurik am,” Yesu wasota anch tutongina rukat ratumekeshinay Yehova pakutwinkish Mwan winou wadinga mukatish wend, rukat ramekeshay Yesu amwinend pa kupan mupim wend mud difut mulong wa antu awonsu akwiyijidisha ritiy. (Luka 22:19) Wasota kand anch tutongina yisakin ya katat ni ya kurutu yela kurumburik yakupesh ya mwom wend kud etu. (Yohan 3:16; Rome 5:8; 1 Tim. 2:5, 6) Chawiy lel, dichuku dia Chivurish chidi chisu chimwing cha pakampwil cha kutongin nich kujikitish yom yawonsu yiney.
5 Chawiy lel, anch in Kristu amen chisu cha Chivurish mud chisu cha kurijek misambu ap kupan yipan kud aanau, ashadishin dirumburik dia chinship chinech ni akat kuchinkish dirumburik dimwing dia ku mujimbu. Ngikadil mud winou kafanyidinap bwat, mulong ukat kufanikesh Chivurish nich misambu ya apagan mud Muvu Usu ap Nowel; ni kusal dichuku dined kwikal chisu cha kutongin ‘ya kusal ya upwepu wa mujimbu’ pa ndond ya kwikal chisu cha kutongin milong ya muspiritu. (Rome 13:14; tal Isaya 5:12, NW.) Kwikil mwin kwilej wa kashinsh wa Yesu Kristu ukusota kupipej mutapu winou chisu chinech chipandikena usey cha mu chishimu chawonsu. Tusotin kuchisal mu kufanyin oku tukakutongin rukat ra Yehova ni ra Yesu Kristu, ni yisakin ya katat ni ya kurutu yitwishishina mash michilay Kristu.—Kus. 116:12, 13.