Chivurish cha Mangand Mawonsu cha Rufu ra Kristu
1 Yehova watwinkishin yipan yivud. Kujimb kwa uwamp wend ni ranaken rend akurumburil mud “kupan kwend kuwamp kwakad kutwish kurumburil.” Mwaning “ranaken rujim ra Nzamb” ripandiken kuwap mulong ripandiken kulemp manangu metu.—2 Kor. 9:14, 15.
2 Chipan Chend Chipandikena Kuwap: Yesu Kristu, chidiay Mupandish wa antu, chidi chipan chimwing chipandikena kuwap. Chakwel kumekesh rukat rend rujim piur pa mangand ma antu, Yehova wapana Mwanend mukatish wa kuval kwend amwinend. (Yohan 3:16) Chisal chijim mud chinech cha Nzamb chifanyidin kuchivurik mu mangand mawonsu. Chisu ik ni ndond ik yikuvurikinau? Diakanying Ndol 1, 1999, urel, in Kristu a mangand mawonsu akuvurik Yakudia ya Urel ya Mwant, mulong wa kuvurik Chivurish cha yakupesh yipandikena yawonsu kujimb.—1 Kor. 11:20, 23-26.
3 Kristu watufila ap “pitwading etu akayitil,” ni tukutwish kumekesh kujikitish kwetu ayinetu kusutin kuvurik Chivurish cha rufu rend ni kuyitazuk akwau kwikal netu pamwing pa chisu chinech cha usey ujim.—Rome 5:8.
4 Chinship Chipandikena Usey: Kuvurik rufu ra Kristu kumekeshin cha kusambish anch wakwatikesha mu kuwanyidin win-mangand wa Nzamb. Kutuvurishin kand anch tukutwish kwikal ishitwila kurutu kwa Yehova kusutin kwiyijidish ritiy mu yakupesh ya Yesu, ni kwikal chad lel ni ruchingej ra dipandish. (Midimu 4:12) Chakin kamu, chinech chidi chinship chipandikena usey cha muvu!
5 Tukumekesh rukat retu mulong wa antunetu anch twayitazuk kwez kuvurik netu pamwing Yakudia ya Urel ya Mwant. Yisakin ya difut yichikwet kand usey ku mamiliyon ma antu ajingunina usey wau upandikena kujimb. (Filp. 3:8) Antu iyijidishina ritiy mu yakupesh ya Kristu akutwish kutambul ruchingej ra kashinsh ra mwom wa chikupu.—Yohan 17:3.
6 Chirung cha Chivurish chitwinkishin yisu ya pakampwil ya kumekesh kujikitish kwetu kud Yehova mulong wa uwamp wend upandikena kujimb. Chinech chawiy kamu chisu chiwamp cha kulejan nich mushiku rusangu ruwamp ra Want wa Nzamb. Yiyukish yijim yiyichingedin awonsu atongidina mu malembil kupan kuwamp kwakad kutwish kurumburil kwa Yehova ni kwirijek mulong wa kwikal ku musambu wa Yakudia ya Urel ya Mwant ya muvu unou!