‘Mukatany Yehova, en Awonsu Ashinshamena’ Chivurikish cha Rufu ra Yesu pa Ndol 4
1 Ku mivu ya kwinyim, payadinga ngand ya Ukraine mwishin mwa winyikel wakominist, anyikel ading ni kuyendish akadivar chipandakena—pakampwil anch dichuku dia Yakudia ya Urel ya Mwant diasej piswimp—mulong ading ni kuchingej kujingunin ndond yau ya kukumangen. Chisu chawonsu winou wading mulong ukash, mulong anyikel ading ij anch dichuku dia chivurikish didi piswimp. Chom ik lel chafanyinau kusal akadivar? Chikumbu cha nambaz umwing chading nich kapalikany ka mem pansh. Mulong anyikel kelap kutongin anch antu akutwish kukumangen mwinimwa, chawiy akadivar atunga kasik mu kapalikany ka mem madinga mashikina mu manungin. Ap anch ashakama kwa kushinyijan mu kasik, kwikil muntu ap umwing watwisha kulet kanvundangesh pa chisu chadinga chikumangen chisadil Chivurikish nich musangar ujim.
2 Kutakaman kwa akadivar netu a mu Ukraine kwa kuziyil kwi mbil ya kuvurik rufu ra Yesu kwikala chimekesh chipandikena kuwap cha rukat rau mulong wa Nzamb. (Luka 22:19; 1 Yohan 5:3) Ap anch tukat kurish nich yikangesh mu mwom wetu, twikasikeshinany ku yilakej mud yiney ni kutakaman kuya ni kukumangan ku Yakudia ya Urel ya Mwant pa Ndol 4. Mu kusal mwamu, tumekeshin anch tukat kwiyov mud mwin kufund wa kuseng wawanga anch: ‘Mukatany Yehova en awonsu ashinshamena!’—Kus. 31:23.
3 Tuyikwashany Antu Akwau Kukudish Rukat Mudiay Nzamb: Kumukat Nzamb kukat kutubachikin kand kuyiladikij antu akwau chakwel tusala nau chivurikish. Wenjil wa Mudimu Wetu wa Want wa Kasan umukasikeshin umwing ni umwing wetu kufund dipang dia antu atongidinay kutazuk ku Chivurikish. Ov, udandamedin nich mushiku kupan diladikij kud muntu mwawonsu udia pa dipang diey? Itekina chisu cha kwovikesh kurumburik kwa chishiken chinech. Kuyivurish kwa urund dichuku ni saa ya Chivurikish, ni anch chiswiriken, kuyilej anch tukwez ni kuyisend kuya nau pamwing kukutwish kuyikasikesh mulong wa kukumangan.
4 Anch twashik kwi ndond tusadidina Chivurikish, tusalany usu wa pakampwil wa kuyezishaku antu itiyijang diladikij dietu, ni kuyikasikesh kamu nakash. Ov, mutapu ik ukutwisha kuyikwash chakwel akudish rukat rau mudiay Yehova? Ikal tayad ni wirijekina kwakul ku yipul yau. Irijeka mulong wa kuyit kwilej nau Bibil anch chitwishikin. Yiladikija kwezang ku yikumangan yetu ya chikumangen ya pa rubing. Pakampwil amakurump afanyidin kuta nakash muchim pad in Kristu akad kusal kand mudimu akumanganang ku chivurikish. Akutwish kwovijan kuya ni kuyital antu inay ni kuyikasikesh kuchirikin mudimu wau, pamwing kukasikeshin pa yitongijok yalejanangau mu diskur dia Chivurikish.—Rom 5:6-8.
5 Tukudishany Rukat Retu Mulong wa Yehova: Kutongijokin pa chipan cha difut kukutwish kukudish rukat retu mulong wa Yehova ni Mwanend. (2 Kor. 5:14, 15) Kaman umwing wakumangananga ku Chivurikish mivu yivud walonda mwamu: “Tuchingedin Chivurikish. Chiding chisu cha pakampwil muvu ni muvu. Nivurikin chisu twadinga pa chidil pasut kal mivu 20, nitadil chital cha tatukwam mukatish nitiyija chakin ni muchim umwing usey wa difut. Kurutu tatuku afa nadingap ni kuman usey wa difut. A, nading nij mifund yawonsu yilondidila piur pa difut ni mutapu wa kuyirumburil! Pakwez pinamana ya kapu ya rufu pawiy pizula kamu chakin muchim wam nich musangar mulong wa yikezau kutusadil kusutil ku difut dia usey.”—Yohan 5:28, 29.
6 Dichuku dia Chivurikish cha muvu unou chidizezina, itekina chisu cha kutenchik muchim wey mulong wa chinship chinech. (2 Jins. 19:3) Tongijokin pa kutang kwa Bibil kwa pakampwil pa chirung cha Chivurikish, kutenchikinau mu Examinons les Écritures chaque jour—2004 ni pa Kalandriye 2004. Amwing akusanger kushinshikin kand shapitre wa 112-116 mu buku Grand homme mu kwilej kwau kwa mu dijuku. Akwau akutwish kusal yikimbijol nich kusadil yom yikwau ya ukwash mulong wa dilejan yitenchikinau kud chisak cha kashalapol ushinshamena ni kubabal. (Mat. 24:45-47) Etu awonsu tukutwish kulembil ni muchim wa kujikitish mulong wa chipan cha difut. (Kus. 50:14, 23) Mwaning, tudandamenany kutongijokin pa rukat ra Yehova pad etu ni tukimbany mitapu ya kumekesh rukat retu mulong wendendiy, mu chirung chinech cha Chivurikish.—Marko 12:30; 1 Yohan 4:10.