Tuyikwashany Akwetu Ataninamu ku Difut Chivurikish cha Rufu ra Kristu Chikusadika pa Ndol 12
1. Mutapu ik umwing umekeshinau antu a Nzamb kujikitish kwau mulong wa difut?
1 “Kujikitish kwikal kudi Nzamb mulong wa kupan kwend kujim kwakad kutwish kulond.” (2 Kor. 9:15) Mazu minam mamekeshin kamu nawamp mutapu twovila mulong wa uwamp ni ranaken yimekeshinay Nzamb kud antu end kusutil kud Mwanend Yesu Kristu. Kujikitish mud kwinoku kukumekan kamu pakampwil pitukumangena pamwing mulong wa kusal Chivurikish cha rufu ra Kristu pa Ndol 12.
2. Anany akata kukumangan ku Chivurikish pamwing nau atushalapol a Yehova, ni yom ik yifanyidinau kusal chakwel kutaninamu ku difut?
2 Pamwing nau atushalapol a Yehova, antu akwau piswimp tutikit dikum akumangen ku Chivurikish muvu ni muvu. Kusutil kukusal mwamu, amekeshin chilik cha kujikitish kwau mulong wa yakupesh ya Kristu. Pakwez, pa kutaninamu ku difut, afanyidin kutek ritiy mu difut. (Yohan 3:16, 36) Mutapu ik tukutwisha kuyikwash kukudish ritiy mud riner? Mu chirung chinech cha Chivurikish, tukutwish kuyikasikesh kwikal nich dilejan dia Bibil dia muntu ipend ni kukumangan ku yikumangan ya chikumangen ya pa rubing. Tushinshikinany yiyul yilondwila ey.
3. Mutapu ik tukutwisha kusambish dilejan dia Bibil chisu tupanina diladikij dia Chivurikish?
3 Malejan ma Bibil: Chisu utazukina antu asangaredina ku Chivurikish, pakish kusambish dilejan dia Bibil mu buku Chifundishinay Bibil, pakish kumurumburil muntu piur pa Chivurikish kusutil kuburil paj wa 206-208 ni kushinshikin mutu wa mulong “Yakudia ya Urel ya Mwant—Chivurikish Chimutumbishina Nzamb.” (Yakudia ya Urel ya Mwant—Musambu Umutumbishina Nzamb) Ukutwish kushinshikin rusangu riner mu kuchirikinamu kumwing ap kwaad, pamwing mud dilejan dia Bibil dia ku chis. Chisu ukupwisha malejan, muntu ukutwish kusot kwisambin shapitre wa 5, “Difut—Chipan cha Nzamb Chipandakena Kujimb.” Pakusambisha kamu dilejan dia Bibil diakad kujing, chirikin ni kushinshikin mashapitre manying ma kusambish ma buku.
4. Nany tukutwisha kusambish kwilej nend Bibil mu chirung chinech cha Chivurikish?
4 Nany tukutwisha kusambish kwilej nend Bibil mu kusadil mulad winou? Pamwing ambay ney a mudimu, ambay ney a shikol, ap amutej ney akutwisha kwitiyij minsamb mud yiney. Akadivar akutwish kuya ni kuyital amakundj akad kwitiy a anambaz adia mu chikumangen. Ni kangal wavuramen kwilej Bibil nau anamakwey akad kwikal Atuman. Chikwau kand, tusotil kusal usu wa pakampwil wa kupalangesh diladikij dia Chivurikish kud antu ibomba nich usu wawonsu ku chikumangen. (Luka 15:3-7) Tukimbany amboku mutapu wa kuyikwash antu inay awonsu kutaninamu ku difut.
5. Mutapu ik tukutwisha kuyikasikesh in kwilej Bibil ni antu asangeridina kukumangan ku yikumangan ya chikumangen ya pa rubing?
5 Yikumangan ya Chikumangen: Chivurikish chidi chikumangan cha kusambish chikatau kukumangan in kwilej Bibil avud ni antu akwau amekeshina kusanger. Mutapu ik lel, tukutwisha kuyikasikesh kutaninamu ku yikumangan yetu ya chikumangen? Mudimu Wetu wa Want wa Ndol 2005, paj wa 8, upanin yiyul yilondwila ey: “Jimbul mutu wa mulong wa diskur dia pibur dikulondula. Yileja mutu wa mulong ukushinshikinau ku Dilejan dia Chinong cha Kalam ni ku Dilejan dia Buku dia Chikumangen. Rumburil Shikol ya Mudimu wa Uteokras ni Chikumangan cha Mudimu. Anch ukwet chikunku cha kusutish ku shikol, ukutwishany kuchichirikin nend pamwing. Isambina manans majim misambidinau ku yikumangan. Sadil yipich yidia mu mikand yetu mulong wa kuyikwash kuman yom yisadikina. Kudiosh kamu pa dilejan dia kusambish, yiladikija kwez kukumangan.”
6. Mu mitapu ik yaad tukutwisha kuyikwash antu a michim yitok kutaninamu ku difut?
6 Chisu chilejinau antu a michim yitok Bibil ni kukumangan ku yikumangan ya chikumangen pakad kujing, akat kuya kurutu muspiritu pakad kulab. Chawiy lel, tuyikasikeshany amboku antu akwau kutaninamu ku yitenchik yiney ya muspiritu ni kwisakin ku chipan cha Nzamb chipandakena kujimb—difut.