Tupanany Nakash Uman Disudiel Pidishejidina Piswimp

¹ Chirung cha yakwangul chiding chisu chimwing cha musangar. Chiding kand chisu chimwing cha kusal mudimu ukash, mulong chisu cha kukumangej mbut chiding chikemp ni in kusal mudimu winou kafanyidinap kuziok ku mudimu.

² Chisambinay mu chirumbidij, Yesu wisikeja “disudiel dia mangand” nich chirung cha yakwangul. (Mat. 13:39) Tushich kwisudiel kwa ditenchik dined dia yom, ni kwashal kal chisu chikemp kusu mulong wa kupan uman “ku mangand mawonsu.” (Mat. 24:14) Disudiel pidishejidina kamu piswimp, tufanyidin kwinungin nakash mu mudimu winou. Mulong wak? Yesu wakwil anch: “Yakwangul yidi yivud, pakwez in mudimu wa kwangul adi akemp.”​—⁠Mat. 9:​37, 38; Rome 12:⁠11.

³ Chidap Chisu cha Kuchirikin Kwinyim: Yesu pasambishay mudimu wend ujim wa kulejan, wadinga kusu ni mivu yisatu ni chikunku ya kusal mudimu wamwinkishau. Walejana nich chitongijok cha kwel anch chisu chikat kusut swa, mulong walonda anch: “Chifanyidin am kurumburil Rusangu Ruwamp ra Want wa Nzamb, wawiy mulong wantuminay Nzamb.”​—⁠Luka 4:⁠43.

⁴ Yesu wandjika mu in kwilej end chitongijok chinech cha kusal pakad kulab. (Mako 13:​32-37) Chawiy lel “awiy adandamena pichuku pichuku kulejan mu [tempel] ni mu yikumbu ya antu. Ading ni kulejan ni kurumburil Rusangu Ruwamp ra Yesu Kristu.” (Midimu 5:42) Katekap mijikit ya usey ukemp pa ndond ya kusambish bwat. Ap anch adinga antu akemp, atwisha kulejan rusangu ruwamp “kudi awonsu atangilau mwishin mwa diur.”​—⁠Kol. 1:⁠23.

⁵ Tukwet diyingish dikwau dijim dia kukulish chitongijok cha chilik chimwing nlel: ‘disudiel dia yom yawonsu chidikala kal piswimp.’ (1 Pita 4:⁠7) Yehova watekin kal dichuku ni chisu mulong wa kushikij disudiel dia ditenchik dia yom dined. (Mat. 24:36) Mudimu wa kulejan ukez kupwa mu chisu chishadilaku. Chawiy lel, tusalany usu nakash mulong wa kwijikish rusangu ruwamp kud antu avud mud kamu chitwishikina.

⁶ Mu kwinungin nakash ku mudimu wa kupan uman disudiel pidishejidina piswimp, tukez kwikal ni musangar wa kumulej Yehova mazu minam ma Yesu anch: ‘Twawanyish kal mudimu watwinkisha kusal.’​—⁠Yohan 17:⁠4.