“Tuswapejany kulejan nakash dizu”
1 Anch watambul chom kanang pafundinau anch “YA SWA SWA,” ov mutapu ik ukata kuchiman? Dizu “ya swa swa” dirumburikin “chifanyidina kusal nich kuswapej.” Chawiy lel, mupostol Paul wayileja in Kristu ‘kuswapej kulejan nakash dizu.’(2 Tim. 4:2, NW) Ov tukat kutesh chiyul chend nich kujijaman mu mudimu winou?
2 Chitwishikin amuleja Paul anch akadivar nend amwing ading ni kumekesh chibachikin cha ‘kwikal ni usweral mu mudimu wau’ wa Ukristu. (Rom 12:11) Chinech chakepisha yibudikin ya midimu yau ni musangar welau kwikal nich mulong wa kuyikwash antu akwau.
3 Mutapu wadingay ni kuman Yesu mudimu: Yesu wadinga ni musangar ujim wa kusal mudimu wend! Walonda anch: “Yakudia yam yidi kuziyil kusal mudi musotilay wantuma am ni kuwanyish mudimu wangikishay kusal.” Chilikej cha Yesu chayikasikesha in kwilej end, antu akasikeshay nich kuyilej anch ‘yir yatokang kal, yashikenang kal pa kwangul.’ (Yohan 4:34, 35) Kudiosh ku disambishil kushik kwisudiel ya mudimu wend, Yesu wading wij anch chadinga chifanyidina kulejan nakash. Chinech chimeken patok mu mazu mayilejay in kwilej end anch: “Mulembilany mwin chir chakwel ukutum in mudimu wa kwangul avud.” (Mat. 9:38) Yesu wading wij anch mudimu wend wadinga wa kulejan, ni wading ujijamen anch chom ap chimwing kangal chamukangesh kuusal.
4 Ov chidi nchik kud etu? Nlel, kudi kuswapej kumwing kujim nakash kupandakanamu pasak mulong wa kulejan nakash. Mu mitambu yivud ya mangand, mbut jaswil kal mu yir, jawanyidin kal mulong wa kujangul. Ap mwi ngand jimekena mud apaninamu uman nakash, muvu ni muvu tunan twa antu akat kutambul dibabatish. Nich disudiel dia ditenchik dia yom dined diashikena kal piswimp nakash, kuchidi ‘yivud ya kusal mu mudimu wa Mwant.’ (1 Kor. 15:58, NW ) Kupandakanamu yisu yikwau ap yisu, chidi cha usey anch twikasikesha kulejan uruu wa Want.
5 Twikalany akwatikena nich kulejan nakash rusangu ruwamp, chikala ku chikumbu ni chikumbu ap ndond yawonsu tukutwisha kuyitan antu mu teritwar wetu. Anch twasal sens mudimu wa kulejan mud kamu chitwishikina, tukakumekesh patok anch tutekin Want pa ndond ya kusambish mu mwom wetu. (Mat. 6:33) Anch tukakulejan dizu nich kushishaman ni kudilejan nakash, tukumenamu musangar ujim.