Tusadilany mikand nich manangu
1 Disadil dia pakampwil dia mikand diasambisha nich kwangan kwa makopi 6 000 ma Tour de Garde wa Kafunfut 1, 1879 mu Inglish. Kudiosh kamu pinipa, achapin mikand kushalijan yivud nakash ni kuyangan nakash.
2 Mudimu umwing usadinau kusu nich ukwash wa milambu: Pasutil kal ambing kanang, atulejin anch kudiosh kamu katat magazet ni mikand tukusambish kuyipan kud in kulejan ni kud antu asotina kuyitang pakad kuyit mulambu kanang pa kuyitambul. Pakwez, pitupanina mikand, tukutwish kwitiy milambu ya kwikatin yiletinau mulong wa kukwash nich mudimu wa mangand mawonsu wa kulejan rusangu ruwamp. Tuchingejin anch Yehova ukuyukish mutapu wa kusal winou wa katat. — Tal Mateu 6:33.
3 Mutapu wa kusal mu chingand: Tusadilany mazu ma kusambish nich misamb mafanyidina chakwel kuvuvurish kusanger. Anch muntu kamekeshinap kwend kusanger, chifanyidinap kumushil mukand. Tusotinap kushesh mikand nich kuyipan kud antu akad kuyikat. Ku mutambu ukwau, mwin kwisamb netu anch umekeshin kusanger ni anch witiy kutang mukand, tukutwish kumwit anch ashala nich. Mu mutapu winou, tukusadil mikand nich manangu.
4 Anch wapwish kumulej muntu wisambinany nend mukand, ukutwish kulond anch: “Anch usotin kutang mukand winou, nikusangar kukushilau.” Anch wipul anch: “Ov ukwet usey ik?”, ukutwish kwakul anch: “Mudimu wetu udap wa kwisak bwat. Tulandishinap mukand winou. Mudimu wetu ausadin mwi ngand 230 ni kusut kud antu asadina mudimu wa kwikatin, mulong wa kuyikwash antu kwilej mutapu wa kuman mwom wa chikupu. Anch usotin kupan mulambu mulong wa kukwash nich mudimu winou, nikusangar kuwitiy.”
5 Piupanina magazet, ukutwish kwipul yipul piur pa mulong kanang wijikena ni kulond anch: “Nisotin umana yom yivud piur pa mulong winou udia mu mutu wa mulong unou. Anch usotin kutang magazet maad minam, nikusangar kukushilam.” Anch muntu witiy, ukutwish kuwejin anch: “Nitongin anch mutu wa mulong winou ukukusangarish chakin. Chawiy lel, nisotin kwez kand rubing rikwezap er mulong wa kwijik yiutonginap. Tour de Garde amupalangeshin mu jindim 132 ni amubudishining mu makopi 22 000 000 ni kusut mu mangand mawonsu. Mudimu winou atwishin kuusal nich ukwash kusu wa milambu ya kwikatin. Anch usotin kupan mulambu ukemp mulong wa kukwash nich mudimu wa kufundish, tukusangar kuwitiy.”
6 Kangal widjidjek kwisambin mulong wa milambu yitwishishina kusal mudimu wetu. Chilikej, anch muntu umekeshina kusanger wipul anch: “Ov upaninany mukand winou?” Ukutwish kwakul anch: “Anch usotin kuutang, udi iwey. Pakwez, nisotin kukwijikish yivud piur pa mudimu wa mangand mawonsu utusadina ni kukurumburil mutapu ukatau kuufutin.” Tukutwish kurumburil anch mudimu wetu udi mudimu umwing wa kwikatin usadinau mu mangand mawonsu kud Atuman’a Yehova. Chad lel, tukutwish kupwitin yitongijok yend ku paj 2 wa Tour de Garde ulejena anch kupalangesh kwa gazet winou “chidi mulong wa mudimu wa mangand mawonsu wa kufundish Baibel, mudimu utwishikina nich milambu ya kwikatin.” Kupwa tukutwish kumulej muntu anch ang usotin kuyikwash Atuman’a Yehova kusal mudimu winou mwi ngand yetu nich kupan mulambu ukemp, mulambu winou akuusanger nakash.
7 Muntu ukutwish kand kwitiy kapamp kamwing mukand ni kukujikitish kusu. Pinap, ukutwish kulond anch: “Nichingejin chakin anch ukukukatish. Antu avud akakwiyipulang mutapu tukata kufutin mudimu wetu, mulong udi mudimu usadilau mu mangand mawonsu. Avud pakach pa antu akata kwitiy mikand yetu amekeshining anch amen usey wa yom yilejinau nich kupan mulambu ukemp chakwel amana kand mutapu wa kuyangan kud antu akwau. Anch antu asotin kupan ukwash wau, tukweting musangar wa kwitiy mulambu wau.”
8 Ov mutapu ik tukutwisha kujingunin kusanger kwa kashinsh? Chakin, rutong retu ridap ra kwangan kusu mikand mwamu. Tusotin anch mikand yiney yishikena rutong rau, chawiy kulond kuyikwash antu a muchim utok kwilej yivud piur pa jintong jipandakena kuwap ja Yehova. Chikwikalap cha ukwash kuyishil antu akad kusanger yom ya muspiritu. (Heb. 12:16) Kuman mabuj ma kupalangesh mikand yetu kwengamidin ukaliweny wetu wa kujingunin kusanger kwa kashinsh. Ov kusanger kwinoku kumekening mutapu ik? Anch muntu usotin chakin kwisamb, chidi chijingidij chiwamp. Anch uteshin yiulondila, anch ukakwakul ku yipul yey ni kulejan yitonginay, chinech chimekeshin anch usangeridin misamb. Anch wisambin ney nich kalimish mu mulad umwing wa urund, chidi chakin anch udi muntu wa kashinsh. Anch ulondwil niyend mu Baibel pamwing ney, chawiy kulond anch ulimishin Dizu dia Nzamb. Chisu chivud chiding cha ukwash kumwipul muntu anch ukutang mikand yitusotina kumushil. Ukutwish kand kumulej anch, usotin kwez kand ni kumutal mulong wa kudandamen nich misamb. Anch witiy, chidi chijingidij chikwau chimekeshina anch mutu wa mulong umukatishin chakin. Anch waman yijingidij yiney ya kusanger kwa kashinsh, ukutwish kuchingej anch muntu winou ukusadil mutapu uwamp mukand wawonsu ukumushila.
9 Kukarumun kwinoku kwa mutapu wetu wa kusal kumekeshin kand nakash anch ‘kitudiap mudi antu akwau avud akata kwisak nich dizu dia Nzamb.’ (2 Kor. 2:17) Kumekeshin kand anch tudiap mu umwing ni mangand. — Yohan 17:14.
10 Kujiy kwa Babilon Mujim chikwashikena kal piswimp, kudi yipwichik yikash yasidinau yitenchik yawonsu ya difukwil. Rusot retu ra kusambish ridi anch mudimu ujim winou wa kulejan Want mu mangand mawonsu udandamena kuya kurutu pakad kwikal ukangeshinau ni chakwel uyishikija antu avud ku dipandish. — Mat. 24:14; Rom 10:13, 14.