Sadin Nawamp Mikand Yimedina pa Bibil

Yesu wafundisha anch: ‘En watambulany chamwamu, panany chamwamu.’ (Mt 10:8) Tulimishin umutakel winou pa kuyinkish antu Bibil ap mikand yimedina pa Bibil pakad kuyifutish nfalang. (2Ko 2:17) Pakwez mikand yiney yikwet uyakin wa usey nakash udiokila mu Dizu dia Nzamb. Chitin usu nakash ni nfalang jivud mulong wa kubudish ni kupalangesh mikand ku yikumangen ya pa mangand mawonsu. Chawiy tufanyidin kusend mikand ching yitukweta nich kuswir.

Sadin nkeu chisu upanina mikand kudi antu, ap mu mudimu wa kulejan patok. (Mt 7:6) Pa ndond pa kuyinkish kwau antu asutina mikand, sal usu wa kwambamb nau mulong wa kukasikesh musangar wau. Ov, ukutwish kwakul anch mwaning ku yipul yimwing yidia mu mushet wa kwinshin oku? Anch utwishinap kujingunin anch muntu winou usangaredin mikand, chidi chiwamp kumwinkish trakt. Chad anch wakwit gazet ap mukand ukwau, ukutwish kumwink ni musangar kopi umwing.—Jnsw 3:27, 28.