Yakul Ku Yipul Yen

◼ Mutapu ik tukutwish kujingunin anch chifanyidin kumushil muntu kanang mikand?

Chom cha kusambish chidi kujingunin musangar wa muntu. Anch umekeshin musangar wakin, tukutwish kumushil magazet maad, broshir, buku, ap mikand yikwau tukutwisha kupan. Chidi chakin anch twajingunin anch ndiy ukwet nfalang jikemp ap kakwetap nfalang ja kupan mudi mulambu wa mudimu wa mangand mawonsu. (Job 34:19; Kuj. 22:17) Mutapu ukwau, tukutwishap twasha mikand yetu ya usey kudi antu akad kuyisanger.—Mat. 7:6.

Ov, mutapu ik ukutwishay mwin chikumbu kumekesh musangar? Musangar wa kwisamb nend chidi chijingidij chiwamp. Kuta matu chisu tulondina, kwakul ku yipul, ni kumekesh chitongijok chilejena mutapu wa kwiyandjik mu minsamb. Kulondul pamwing chisu tutangina mu Bibil kudi kumekesh kwa kalimish ka Dizu dia Nzamb. Yisu yivud, chidi cha ukwash kwipul anch ndiy watanga mikand yitwamushila. In kulejan afanyidin kusadin chitongijok chiwamp chakwel ajingunina musangar wa muntu. Chilakej, chisu tupanina uman mu mikombil, chifanyidinap kupan magazet, mabroshir, ap mikand mu mutapu wakad kuwanyin kudi muntu mwin mwawonsu utusutina mwinjil. Anch twajingunin musangar wa muntu, chikez kwikal chipandakena kuwamp chakwel tumwinkisha diladikij ap trakt.

Chawiy chimwing kand, uvud wa mikand yikutambulay mwin kulejan yifanyidin kwikal yikwatijadina nich maswir mend chakwel awanyisha mudimu wend wa kulejan, pakwez chidiap mulong wa ukaliweny wend wa kupan milambu. Milambu yidingap mulong wa kulandish mikand pakwez yidingaku mulong wa kukasikesh mitapu yawonsu ya mujikit wetu wa kulejan mu mangand mawonsu. Chikalap nchik mar metu ma nfalang, kusanger kukez kutubachik kupan yitukweta nich musangar pakad kutusadish ku usu chakwel tukasikesha yisakin ya Want. (Mar. 12:41-44; 2 Kor. 9:7) Kukez kutubachik kand chakwel tusenda kusu mikand tuswiridina, pakad kushadish mapit ma uteokras.

[Dizu dirumburila chipich chidia pa paj wa 2]

In kulejan afanyidin kusadin chitongijok chiwamp chakwel ajingunin musangar wa muntu