Tusadilany Nich Manangu Mikand Yetu Yengamidina pa Bibil
1, 2. Mutapu ik ukatau kwov antu avud mulong wa mikand yetu, ni yiney yiletishin chipul ik?
1 “Nitangining mikand yen kudiosh mu muvu wa 1965. Nikat kutal mu Bibil chisu nitangina, ni chom chin chawonsu chidia mu mikand yen chikwatijadin ni Bibil. Chisu chawonsu nadinga ni kusot kwijik ukinakin piur pa Nzamb ni Yesu, ni nikutwish kulond nich muchim umwing anch nitanin yakul ku yipul yam kusutil ku mikand yen nich Bibil.” Mwamu mwafunday ikundj umwing ku biro mujim wa Atuman a Yehova. Mu mukand wawiy umwing, ndiy wita dilejan dia Bibil.
2 Mud ikundj winou mwin kujikitish, tutikit twa antu masans ni masans akat kujikitish mulong wa ukwash wa dilejan dia Bibil upaninay “kashalapol ushishamena ni kubabal.” (Mat. 24:45) Muvu ni muvu, abudishin mikand yivud nakash mulong wa kuyikwash antu a michim yitok “kwijik [ronganyin rakin ra] uyakin.” (1 Tim. 2:4) Mutapu ik tukutwisha kusadil nich manangu mikand yetu yengamidina pa Bibil?
3. Mutapu ik tukutwisha kulik kusheshol mikand?
3 Tulikany Kusheshol: Mu kusut kwa chisu, tukutwish kwikal nich mikand yipandikena yitukulika chakin kusadil. Yom ik tukutwisha kusal chakwel tulika kushesholang mikand yetu ya usey? Njingunin yidi ya maswir chisu tusendina mikand ya kusadil mu mudimu. Pa ndond pa kutambul makopi mavud ma mukand tukuya ni kupan, tukutwish kwetu kusend kopi umwing ap maad ni kusend makwau anch twapwish kupan mikand twasendina. Chinech chikutwish kwipukish kuruzwamijan kwa mikand yivud mu yikumbu yetu. Chawiy chimwing, anch tukwet muruzu wa magazet makad kupan, chifanyidin kukepishaku uvud twitina.
4. Yom ik yikutwishau kusal anch mikand yiruzwamin mu chikumangen?
4 Yichap Yiruzwamina: Anch mikand yiruzwamin mu chikumangen, ntakel wa mikand ukutwish kutal mu yikumangen yikwau yidia ndond yiniya chakwel kutal anch yikutwish kusadil mikand yiruzwamina. In kulejan akutwish kupan mikand yikur kud yid ya majuku yakad kwikal yin kwitiy, kud in kwilej Bibil, ni kud antu akwau. Antu adia asu ku chikumangen akutwish kusangar kwikal nich mikand yiney mulong wa kapalikany kau ka mabuku ma uteokras.
5. Mutapu ik tukutwisha kumekesh kujikitish mulong wa mikand yetu?
5 Tusotil anch mikand yetu yiwanyish rutong ray, charumburik anch, kuyikwash antu a kashinsh kwilej ntong jiwamp nakash ja Yehova. Mud kamu mwalikay Yesu kushesh yakudia yashalap kupwa kwa chilay cha kudish rumb ra antu, rutong retu rifanyidin kwikal ra kusadil nawamp nakash mikand ya usey yipaninau yengamidina pa Bibil. (Yohan 6:11-13) Uruu upandishina mwom udia mu mikand yetu ukutwishap kupukun michim ya antu asotila kutentam anch yishich mu makabach metu ap mu masakosh metu. Chawiy lel, tufanyidin kwikal in kutong chisu tusendina mikand ya kusadil mu mudimu ni kuyisadil nich manangu mulong wa kuyikwash akwetu.—Filp. 4:5.