Shikol Yitukwashina Kusadil Mutapu Uwamp
1 Pitushinshikidina malejan mapanginau ku Program wa Shikol ya Mudimu wa Uteokras ya 2006, twikasikeshin kutaninamu ku malejan ma Bibil kusutil ku kumasadil mu mudimu wetu utumbila ni mu mwom wa pichuku-pichuku. Tukwatin mupak wa kusadil yom twilejina.—Yohan 13:17; Filp. 4:9.
2 Kurumburil: Program wa muvu unou uwejidin minit umwing ku minsamb ya milong yijim ya Bibil nau in kukumangan. Chinech chirumburikin anch mukadivar utondinau kusal chikunku cha milong yijim ufanyidin kudimuk chakwel kupwish chikunku chend mu minit yitan pa ndond pa minit musamban. Antu ashicha akurumburila ni yawiy afanyidin kudimukin chisu chau. Nich kushinshikin kwa nkeu, muntu urumburila ukutwish kulond rusangu ra ukwash mu masekond 30 ap mwishin mwa masekond minam. Piswimp antu dikum afanyidin kurumburil mu minit yitan yitekinau mulong wa minsamb nau in kukumangan.
3 Madiskur Malejena: Milong yijim ya Bibil ni diskur dia malejan mafanyidin kwimen pa usey wa malejan matadila mudimu wetu ni milad yikwau ya mwom wetu wa dichuku ni dichuku. Mwin kulond kafanyidinap kusu kwend kuvuvurish maswir ma kusadil malejan mudiau in kumutesh. Ufanyidin kulond patok chisal chiswiridikina, kulejan mutapu wakuchiwanyish, ni kupwitin manangu ku kutaninamu kwa kusal chisal mud chinech. Ukutwish walond anch, “Winou wawiy mutapu ututakedila mufund winou,” ap “Winou wawiy mutapu tukutwisha kusadil maverse minam mu mudimu.” Amakurump ni ankwash a mudimu atila muchim ku mikadil ya chikumangen chau afanyidin kwikasikesh kusadil kamu malejan nawamp mud chitwishikina.
4 Kujimbul yilakej ya Bibil kukutwish kwikal kwa ukwash nakash mu kusadil kuwamp. Kupwa kwa kujimbul chilakej cha Bibil, mwin kulond ukutwish walond anch, “Yom yiney yikutwish yakushiken ni yey.” Ufanyidin kushinshik anch kusadil kwin kwawonsu kwa chilakej cha Bibil kwovijadin ni mwikadil, ni yidia mu Bibil, ni yom yipalangeshinay “kashalapol ushishamena ni kubabal.”—Mat. 24:45.
5 Manangu udi ukaliweny wa kusadil nawamp ronganyin ni chovu. ‘Manangu chidi chom cha kusambish.’ (Jinsw. 4:7) Pitwakina manangu ma kusadil kusutil ku malejan metu madia ku Program wa Shikol ya Mudimu wa Uteokras, tuwapishany kand amboku ukaliweny wetu mu kumijikish kudiau akwetu.