Mutapu Twisakidina Shikol ya Mudimu wa Uteokras

¹ Antu a Yehova akwet mutapu umwing wa kutambul malejan ma uteokras. (Is. 54:13; Yoh. 6:45) Pakwez, mu chilik tukata kutaninamu, chimedin nakash pa usu tukata kusal. Ov ukutwish kujingunin yibudikin yiwamp ya Shikol ya Mudimu wa Uteokras pa mwikadil wey wa mu spiritu?

² Yirumburil Yisangareshina: Atulam avud a shikol amen anch kurumburik kwa dilejan dia ukaliweny wa kulond kuwapishin kusongish kwa mabuj kwa yikumangen yau mu mudimu wa chingand. Chikwau kand, kalam umwing wa shikol wajingunin anch ditenchik dia kwakul kud in kutesh mu milong yijim ya Bibil, dikwet chibudikin kudi antu avud cha kudandamen kulam program wa kutang Bibil. Mulong wa Minsamb No. 2, akadivar avud ashimunin nawamp pa yiyukish ya kwimen pa yom ya kutang pakad kurijek disambishil ni dipwishil. Antu inkishinau chikunku chinech katat akat kwimen nakash pa kuwapish ukaliweny wau wa kutang.​—⁠1 Tim. 4:⁠13

³ Awonsu Akutwish Kutaninamu: Kurumburil ku yikumangan kukutwish kwikal musangar. (Jinsw. 15:23) Kwikal nich yipul ya dichirikin diakad kufund kurutu kwa chisu kutukwashin mulong wa kwirijek ni kwakul mu dichirikin pakad kulab. Chikwau kand, nich nimero wa La Tour de Garde wa Chiwong 1, 2004, milong yijim yidiokila mu mabuku ma Bibil yameken anch yikwatijadin nich chikunku chetu cha kutang kwa ku Shikol ya Mudimu wa Uteokras. Mitu ya milong yiney yayikwashin antu avud kupan yirumburil yitungina chisu cha milong yijim ya Bibil.

⁴ Mwawonsu upanginau ku shikol ukwet dilau dia pakampwil dia kwirijek ni kusal yikunku yimwinkinau. Etu awonsu tukutwish kutaninamu ku yirumburil yiwamp yipaninay kalam wa shikol ku chimet. Ansand pakampwil akat kutaninamu kand ku manans ma chiyul chikutwishay kupan ku ujindj kupwa kwa chikumangan. Kwiyijidish kwisambidina ukaliweny wa kulond kwinsudiel kwa mwimbu ni mwimbu wa buku Tirez profit de l’École du ministère théocratique kupanin ukwash ukwau.

⁵ Pakwinkishinau yitongijok ya ukwash ni ya Mifund chisu cha shikol ni chisu cha kupwa kwa shikol, fund yom yiney mu kopi wey wa buku École du ministère. Tongijokin pa yom wilejanga, ni kushinshikin mutapu ukukwashina mulad winou wa malejan madiokila kud Nzamb kuwapish mwikadil wey wa muspiritu.