Yehova Utufumbining Mulong wa Mudimu Winou
1. Ov, pa chisu Yehova chiyinkishiningay antu chisend, chom ik kand chisadiningay?
1 Chisu Yehova chinkishiningay antu chisend, ndiy kand uyinkishining ukwash udingau nich kuswir chakwel aman mutapu wa kuchiwanyish. Chilakej, pa chisu Yehova chamulejay Nowa kutung waat ujim, Nowa kadingap ni yom yimwing, pakwez, Ndiy kand wamuleja mutapu wadinga ufanyidina kwikal waat winou. (Dis. 6:14-16) Pamwinkishau Moses, kalam winou wakad chaku cha kulondol chisend cha kuya kudi amakurump a Isarel ni kudiay Farao, Yehova wamuleja nich kashinsh anch: “Am nikez kwikal ku kan kwey, nikakulej yom yiukeza kulond.” (Kub. 4:12) Pitudinga ni chisend chetu cha kulejan rusangu ra want, Yehova utwinkishining kand yany piur pa mutapu tufanyidina kuchiwanyish. Ndiy kand utufumbining mu mudimu winou kusutil ku Shikol ya Mudimu wa Uteokras ni Chikumangan cha Mudimu. Ov, mutapu ik tukutwisha kutaninamu kusutil ku kufumb kwinoku?
2. Ov, mutapu ik ukutwisha kutaninamu mu Shikol ya Uteokras?
2 Shikol ya Mudimu wa Uteokras: Chifanyidin kushinshikin yom yidia ku program kurutu kwa kuya ku chikumangan ni chikumangan. Kupwa, ukutwish watan mutapu ukusadilau kudi in kwilej rusangu riner mu madiskur mau, ni mutapu ukeza kudandamen kwilej yom wilejina. (Jinsw. 27:17) Buril buku wey École du ministère mu chikumangan ni musadila mudi buku wa kwiyijidish nich. Chisu chimwisambidinau kudiay kalam wa shikol kupwa kwa diskur dia mwin kwilej mwawonsu, londul manans uswiridina kusadil, ni sadil jindond jakad kufund chakwel ufundamu yom ya usey. Pakwez, njil yipandakena kuwap ya kutaninamu mu shikol yiney yidi kusadil yom yitwilejinamu. Ov, wifundishin kal ku shikol yiney? Chisu ukutambula chisend cha kusal diskur, irijeka nawamp ni sadil yiyul ukutambula. Pa chisu udia mu mudimu wa kulejan, sadil yom wilejina.
3. Ov, chom ik chikeza kutukwash chakwel tutaninamu mu Chikumangan cha Mudimu?
3 Chikumangan cha Mudimu: Tukez kuvurik nawamp win kamu yitongijok yaletinau pa chisu cha chikumangan chinech kusutil ku kutang yom yawonsu kurutu ni kurijek mutapu wa kurumburil. Anch twarijek mutapu wetu wa kurumburil yakul mu wiswimp, tukez kurumburil mu mutapu upandakena kuwap. Chidi cha usey kuta matu nawamp ku yakumenaku, ni kusadil yitongijok yivud utongina anch yikez kusal chakwel yitanduril mudimu wey wa kulejan. Lam kopi wa manans majim ma mitu ya milong yidiokidila mu Mudimu Wetu wa Want chakwel utalang mareferans.
4. Ov, mulong wak tufanyidina kusadil nawamp malejan ma uteokras?
4 Mudi yisend yinkishau Nowa ni Moses, mudimu wetu wa kulejan rusangu ruwamp mu mangand mawonsu udi ni yikokujol. (Mat. 24:14) Tukutwish twapandakan anch twamuchingejin Yehova, Mulej wetu Mujim, ni kusal nawamp chakwel tusadil malejan matukwashiningay nich.—Isay 30:20.