Shikol ya Mudimu wa Uteokras ya Muvu wa 2015 Yikutukwash Kukudish Ukaliweny Wetu mu Mudimu wa Kulejan
1 Nfund a Kuseng David wafunda anch: “Lik mazu ma mukan mwam ni manangu minitongijokila mu muchim wam amaka ku mes kwey, A [Yehova], diyal diam, mukamunin wam.” (Kus. 19:14, TMK) Mudi David, tusotining mazu metu mamusangaresha Yehova ni tusangaredining chisend chetu cha kwisambin uyakin mu chikumangen ni mu mudimu wa kulejan. Shikol ya Mudimu wa Uteokras yidi njil yimwing yikatay Yehova kutufumb mulong wa mudimu wa kulejan. Kufumb kwinoku kusadikining pa rubing ni rubing mu mangand mawonsu mu yikumangen 111 000 ni kusut. Kuyikwashining akadivar ni anambaz adia pa mangand mawonsu ni akweta mashakamin kushalijan chakwel ashikena ku kwikal awanyidina nawamp mudi in kulejan a rusangu a want, afundisha mu mutapu wa kushik ku muchim, kudimuk ni kulond patok pakad wom.—Mid. 19:8; Kol. 4:6.
2 Program wa shikol wa muvu wa 2015 ukez kwikal kand ni mitu ya kushinshikin yidia mu “Mazu ma Kusambish Nich Dizu dia Nzamb” ni yom yidia mu Étude perspicace des Écritures. Chikwau kand, kukwikal kuswimp kwa asaa ukusutishau manans majim ma Bibil ni Minsamb No. 1. Kuswimp kwinoku ni yany yimedina piur pa mutapu ukusutishau yikunku ku shikol ayilejen mu maparagraf malondwilaku am.
3 Manans Majim ma Bibil: Mukadivar ukwinkishau chikunku chinech ukuchisal mu aminit aad mulong wa kwisambin dinans dimwing disangareshina ap dia kusadil didia mu Mifund yidia mu chikunku cha rubing cha kutang cha Bibil. Kwirijek kuwamp kukez kukwash mulong wa kwisambin pa manans ma usey mu chikumangen pa chisu chiwanyidina. Kupwa, in kutesh akez kwikal ni aminit musamban mulong wa kwisambin manans masangareshina matanau mu kutang kwa Bibil kwa rubing mu masekond 30 ap makemp. Chitining kwirijek ni kwipup mulong wa kupan yakul ya usey mu masekond 30, pakwez, kusal mwamu wawiy mutapu uwamp wa kutufumb. Kukuyikwash kand antu akwau chakwel apana yakul yau pa yom yilejau mu kukimbijol kwau kwa muntu panrend.
4 Minsamb No. 1: Chisu cha kutang Bibil akuchikempish mu aminit asatu ap akemp mulong wa kutang chikunku chikemp cha verse umwing. Pirijekinau, akadivar awonsu akwinkishau chikunku cha kutang afanyidin kuchichirikin tupamp tuvud mu kuchitang nich dizu dia piur mu kupwitin manangu mau mulong atesha nawamp yom yikutangau mu kujimbul nawamp pakad kushishit chakwel ovikesha kurumburik kwa yom yitanginau. Antu awonsu a Yehova afanyidin kusal usu wa kutang nawamp, mulong chisend chinech chidi cha usey mu difukwil dietu. Udi musangar mud ik tukwetinga anch anetu atangin nawamp ni tuyijikitishin anvaj akata kuyikwash anau nich rukat chakwel ashikena ku kwikal in kutang awamp.
5 Minsamb No. 2: Minsamb yiney yikwikal ya aminit atan yikusalau kudi nambaz. Mutu wa mulong upaninau afanyidin kuusadil. Anch chikunku chinech chengamidin mu malejan madia mu Mazu ma Kusambish Nich Dizu dia Nzamb, chifanyidin kumambatesh mu mutapu umwing wa kashinsh usadikininga mu mudimu wa chingand usadidinau mu teritwar wen. Anch chikunku chinech chengamidin pa muntu kanang wa mu yisu ya Bibil mudi muyilejenau mu Étude perspicace des Écritures, mwan a shikol ufanyidin kwisambin pa mutu wa mulong wamwinkishau, kutond maverse mafanyidina kusadil ni kumekesh yom ya kwilej kusutil ku chilakej cha muntu wa pa chisu Bibil. Ukutwish kand kukasikeshin maverse makwau mamekeshina patok mutu wa mulong. Kalam wa shikol ukutond muntu wa kwisamb nend.
6 Minsamb No 3: Minsamb yiney yikwikal ya aminit atan yikusalau kudi mukadivar ap nambaz. Anch amwinkishach nambaz, ufanyidin kuchisal kulondulijan nich yiyul yipaninau piur pa Minsamb 2. Anch amwinkishach mukadivar, malejan mengamidina mu buku Étude perspicace, ufanyidin kumisambin mudi diskur kurutu kwa in kukumangan mu Chot cha Want. Mwan a shikol ufanyidin kwisambin pa mutu wa mulong wamwinkishau, kutond maverse mafanyidina kusadil ni kumekesh yom ya kwilej kusutil ku chilakej cha muntu wa pa chisu cha Bibil.
7 Mutu wa Mulong Usu Piur pa Minsamb No. 3 Ukusalau kudi Akadivar: Anch malejan mamwinkishinau mukadivar mengamidin pa Mazu ma Kusambish Nich Dizu dia Nzamb, chifanyidin kumisambin mudi chakumenaku cha mu dilejan dia dijuku ap cha mu mudimu wa chingand. Yisu yivud kalam wa shikol ukez kutond muntu wa kusal nend ni mwikadil wa kusadil. Ukutondau mulong wa kusal nend chakumenaku ech ufanyidin kwikal chid cha dijuku dia mwin kwilej ap mukadivar udia mu chikumangen. Ukutwish kand kukasikeshin piur pa mifund yimekeshina patok yany ya Bibil yikwatijadina nich mutu wa mulong. Chisu ni chisu akutwish kumwinkish mukurump niyend chakwel asala chikunku chinech. Amakurump akutwish kwitondin ayinau antu akusal nau ni mwikadil wau wa kusadil. Chakin kamu, chikwikal chikasikeshinsh mud ik kudi chikumangen pakumanau mutapu usadidinau amakurump ukaliweny wa kumufundish chidi cha dijuku ap mukadivar mukwau.
Ukuya kurutu kusutil ku kwitiy ni ku kusadil chiyul
8 Chiyul: Kalam wa shikol ukez kusutish aminit aad mulong wa kumujikitish mwan a shikol mwin mwawonsu nich chiyul chiwamp chengamidina pa buku Tirez profit de l’École du mininstère théocratique. Chisu chikutakelay kalam wa shikol chikunku cha mwan a shikol, ndiy kakezap kwijikish kurutu ukaliweny wa kulond ukusadinay mwan a shikol. Pakwez, kupwa kwa mwan a shikol kusal chikunku ni kupwa kwa kumujikitish nich mazu mawamp, kalam wa shikol ufanyidin kwijikish ukaliweny wasadinay mwan a shikol, ni kulejan mulong wak wausalay kal nawamp ap kulejan mu mutapu uwamp mulong wak chidia cha ukwash kudi mwa a shikol kupwitin jinkeu pa ukaliweny winou wa pakampwil.
9 Mudi chivurish, fish wa chiyul wa mwan a shikol mwin mwawonsu akutwish kumutan mu buku École du ministère pa paj wa 79 djat ni pa paj wa 81. Kupwa kwa mwan a shikol kuwanyish chisend chend nawamp, kalam wa shikol ukez kumuyul kuns nich yiyul yikasikeshina yengamidina pa buku ni kumulej mwan a shikol yom yifanyidinay kusal piur pa chisend chend chamwinkishau. Akutwish kumujikitish mwan a shikol nich yiyul yiwamp ya kusadil kupwa kwa chikumangan ap pa chisu chikwau. Chiyul cha pakampwil chikutambulay mwan a shikol ku shikol chifanyidin kwikal chiyul chikumukwasha chakwel aya kurutu muspiritu.—1 Tim. 4:15.
10 Anch mwan a shikol wasutish chisu, kalam wa shikol ap mwin kumukwash ufanyidin kubul karupwambu ap chom chikwau pakad kuyizuwol antu akwau mulong wa kumekesh anch mwan a shikol wasutish kal chisu. Mwan a shikol ufanyidin kujingunin chijingidij chinech chakwel apwisha swa dizu diend ni kudiokal pa chimet.—Tal buku École du ministère, paj wa 282, par. 4.
11 Antu awonsu awanyishina yitinau ayikasikeshin chakwel iyandjikisha ku Shikol ya Mudimu wa Uteokras. (Tal, buku École du ministère paj wa 282, par. 6.) Malejan madiokilinga ku shikol yiney amatenchika mulong wa kuyikwash antu a Yehova chakwel alonda ni afundisha rusangu ruwamp ra Want patok, nich kalimish ni rukat. Yehova usangaredining chakin kamu katumb kakatau kumutumbish antu in awonsu akata kutanang yiyukish yidiokila ku malejan minam ma uteokras!—Kus. 148:12, 13; Isay 50:4.