Umutakel wa Chikumangan Mudimu ni Mashakamin ma in Kristu

Yidamu

• Mazu ma Kusambish Nich 2

• Yom ya Usey Yida mu Dizu da Nzamb 3-5

  • Diskur 3

  • Mapit ma mu Spiritu 4

  • Kutang Bibil 5

• Ipana mu Mudimu wa Kulejan 6-14

  • Kusambish Mambamb 7

  • Kudandamen Kuyichirikin Antu 8

  • Kwikadish in Kwilej 9

  • Kurumburil Yitiyij Yey 10

  • Diskur 11

  • Yom ya Kwisambin 12

  • Milad 13

  • Mutapu wa Kusadin Mavideo ni Mikand 14

• Mashakamin ma Mwin Kristu 15-16

  • Dilejan da Bibil da Chikumangen 16

• Mazu ma Kupwish Nich 17

• Kujikitishan ni Kupan Yiyul 18

• Chisu 19

• Anch Kalam wa Munyingumuku Wendin Chikumangen 20

• Rubing ra Chitentam cha Munyingumuku ap cha Rejon 21

• Rubing ra Chivurikish 22

• Kalam wa Chikumangan Mudimu ni Mashakamin 23

• Ntakel wa Chikumangan Mudimu ni Mashakamin 24

• Mwin Kuyulan Nkwash 25

• Mashikol Makwau 26

• Mavideo 27

1. Umutakel uda mu dokima winou ukuyikwash awonsu akweta yikunku ku chikumangan cha Mudimu ni Mashakamin ma Mwin Kristu. Antu inay afanyidin kushinshikin umutakel upaninau piur pa yikunku yau mu Mudimu ni Mashakamin Mukand wa Chikumangan ni mu dokima winou kurutu kwa kurijek chikunku chau. Chifanyidin kuyikasikesh in kulejan awonsu kwipan mulong wa kusal yikunku ya ansand a shikol. Antu akwau akata kukumangan netu chisu chawonsu akutwish niyau kusal yikunku anch itiyijin malejan ma Bibil ni anch mwikadil wau ukwatijadin ni mbil ja win Kristu. Kalam wa Chikumangan Mudimu ni Mashakamin ufanyidin kwisamb ni muntu mwawonsu wakad kal kwikal mwin kulejan wovila ja kwifundikish ku shikol piur pa yom yitinau mulong wa kusal mwamu, ni kupwa kumulej muntu anch uwanyishin yitinau. Chifanyidin mwin kulejan umufundishining Bibil ikalap chisu chisambinay nend (ap pikal nvaj wend uda Kaman). Yom yitinau mulong wa kusut ku shikol yawiy kand yimwing yitinau mulong wa kwikal mwin kulejan wakadau kal kubatish.—od shap. 8 par. 8.

MAZU MA KUSAMBISH NICH

2. Minit umwing. Rubing ni rubing, kupwa kwa muminy ni malembil ma kusambish, ntakel wa Chikumangan Mudimu ni Mashakamin ukulangwish musangar mulong wa program ulondwilaku. Ntakel ufanyidin kukasikeshin pa manans makukwasha nakash chikumangen.

YOM YA USEY YIDA MU DIZU DA NZAMB

1. 3. Diskur: Aminit dikum. Mutu wa mulong ni plan ukweta manans maad ap masatu ayitekin mu Mudimu ni Mashakamin Mukand wa Chikumangan. Diskur dined akudisal kud mukurump ap nkwash wa mudimu uwanyishina yitinau. Anch mukand wa Bibil usu ud ku program wa kutang kwa Bibil pa rubing, akumekesh video wa mazu ma kusambish nich mukand winou. Mwin kusal diskur ukutwish kwisambin mutapu ukwatijadina yom yida mu video ni mutu wa mulong. Pakwez, ufanyidin kusal usu wawonsu wa kwisambin manans mawonsu malejenau mu mukand wa chikumangan. Chikwau kand, anch kud chisu, ufanyidin kusadin yipich, yitekinau mulong wa kovikesh nawamp yom ya kwilej. Ukutwish kuwejinaku yom yisambidinau mu mareferans makwau anch makutwish kukwash kutesh nawamp manans ma diskur.

2. 4. Mapit ma mu Spiritu: Aminit dikum. Chinech chid chikunku cha yipul ni yakul ni chikwetap mazu ma kusambish nich ap ma kupwish nich. Akuchitakel kud mukurump ap nkwash wa mudimu uwanyishina yitinau. Mwin kusal chikunku chinech ufanyidin kwipul yipul yawonsu. Chikwau kand, ukutwish kutond anch chifanyidin ap bwat kutang maverse malejenau. In kwakul afanyidin kwakul mu asekond 30 ap mwinshin.

3. 5. Kutang Bibil: Aminit atan. Chikunku chinech akuchisal kud nsand a shikol ikundj. Nsand a shikol ufanyidin kutang chikunku chend pakad kulond mazu ma kusambish nich ap ma kupwish nich. Ntakel wa chikumangan ukusal usu wa kuyikwash ansand a shikol chakwel atanga yom mud muyifundinau, mu mutapu wovikena, pakad kukaturok, kushindakenshin pa manans ma usey, kuswimpol dizu, kwimanaku pawanyindina kwiman, ni kutang mu mutapu wa chivadik. Mulong yikunku yimwing ya kutang Bibil yilepin ni yikwau yiswipin, Kalam wa Chikumangan Mudimu ni Mashakamin ufanyidin kulam mu manangu ukaliweny wa ansand a shikol chisu chiyinkishinay yisend.

IPANA MU MUDIMU WA KULEJAN

6. Aminit dikum ni atan. Chikunku chinech cha chikumangan chid mulong wa kuyikwash in kulejan awonsu chakwel iyijidisha mu mudimu wa kulejan ni chakwel awapisha ukaliweny wau wa kwisamb ni antu ni wa kulejan ni kufundish. Anch chid cha usey, amakurump niyau akutwish kuyinkish yikunku ya ansand a shikol. Nsand a shikol mwawonsu ufanyidin kusadin dinans da broshir Kufundish ap Yikata Antu dida mu ma parantez ku kabet kwa chikunku chend mu Mudimu ni Mashakamin Mukand wa Chikumangan. Yisu yimwing, ku program kukutwish kwikal chikunku cha minsamb. Chikunku mud chinech akuchitakel kud mukurump wa chikumangen ap nkwash wa mudimu uwanyishina yitinau.—Tal paragraf wa 15 piur pa mutapu wa kutakel yikunku ya minsamb.

7. Kusambish Mambamb: Chikunku chinech akuchisal kud nsand a shikol ikundj ap mband. Mwin kusal nend ufanyidin kwikal muntu wa mujimbu umwing ni ndiy ap muntu wa dijuku dend. Nsand a shikol ni muntu usadinay nend akutwish kwiman ap kushakam.—Mulong wa kwijik yom yivud piur pa yom ya kwisambin ni mulad wakusadin mu chikunku chinech, tal paragraf wa 12 ni 13.

8. Kudandamen Kuyichirikin Antu: Chikunku chinech akuchisal kud nsand a shikol ikundj ap mband. Mwin kusal nend ufanyidin kwikal muntu wa mujimbu umwing ni ndiy. (km-F 5/97 p. 2) Nsand a shikol ni muntu usadinay nend akutwish kwiman ap kushakam. Nsand a shikol ufanyidin kumekesh yom tufanyidina kulond chisu tumuchirikidina muntu twisambina nend kapamp ka kusambish.—Mulong wa kwijik yom yivud piur pa yom ya kwisambin ni mulad wakusadin mu chikunku chinech, tal paragraf wa 12 ni 13.

9. Kwikadish in Kwilej: Chikunku chinech akuchisal kud nsand a shikol ikundj ap mband. Mwin kusal nend ufanyidin kwikal muntu wa mujimbu umwing ni ndiy. (km-F 5/97 p. 2) Nsand a shikol ni muntu usadinay nend akutwish kwiman ap kushakam. Chikunku chinech chifanyidin kumekesh dilejan da Bibil dasambishang kal. Nsand a shikol kakwetap kuswir kwa kulond mazu ma kusambish nich ap ma kupwish nich, ching anch yid mu dilejan damwitangau kusal. Ap anch chitwishikin kusal mwamu, pakwez chidap cha usey kutang nich dizu da piur maparagraf malejenau chisu cha dilejan.

10. Kurumburil Yitiyij Yey: Anch chikunku chinech chid diskur, mwin kuchisal ufanyidin kwikal muntu ikundj. Anch chid chakumenaku, akutwish kuchisal kud nsand a shikol ikundj ap mband. Mwin kusal nend ufanyidin kwikal muntu wa mujimbu umwing ni ndiy, anch bwat ufanyidin kwikal wa dijuku dend. Nsand a shikol ufanyidin kupan nich nkeu chakul chovikena nawamp ku chipul cha mutu wa mulong wisambidinay kusutil kusadin yom yida mu referans wamutekinangau. Nsand a shikol ukutwish kutond kujimbul ap bwat mu chikunku chend referans wa buku wamutekinangau.

11. Diskur: Chikunku chinech akuchisal kud muntu ikundj ni akuchisal mud diskur ku chikumangen. Anch diskur dimedin pa dinans didoshinau mu yom yiwejinaku 1 ya broshir Yikata Antu, nsand a shikol ufanyidin kumekesh mutapu wa kusadin maverse mu mudimu wa kulejan. Chilakej, ukutwish kwisambin chisu cha kusadin verse kanang, kurumburik kwa verse winou, ni mutapu wa kutongijok ni muntu piur pa verse winou. Anch diskur dimedin pa dinans didokila mu dilejan dimwing da broshir Yikata Antu, nsand a shikol ufanyidin kushindakeshin pa mutapu wa kusadin dinans dined mu mudimu wa kulejan. Ukutwish kukasikeshin pa chilakej chida mu dinans da 1 da dilejan ap kukasikeshin pa verse umwing pakach pa maverse makwau mada mu dilejan, anch chid cha ukwash kusal mwamu.

12. Yom ya Kwisambin: Yom yida mu paragraf winou ni wambakedinap yitadin yikunku “Kusambish Mambamb” ni “Kudandamen Kuyichirikin Antu.” Kwij anch alejen kusal mutapu windj, anch chamwamu chitongijok cha nsand a shikol chid cha kulejan uyakin wa Bibil uswapela, umusangareshina muntu wambambinay nend ni kusha chilal mulong wa kwisamb nend kapamp kakwau. Nsand a shikol ufanyidin kutond mutu wa mulong wisambidinau antu katat mu teritwar wen ni uletina yibudikin yiwamp. Ukutwish kutond kulejan ap bwat mukand ap video uda mu Mushet wa Yom ya Kufundish Nich. Pa ndond pa kusal yom yalaminau kal mu mutu, ansand a shikol afanyidin kwiyijidish kumekesh ukaliweny wa kwisamb nau antu, mud kumekesh anch ayibangidin antu ni kwisamb mu mutapu wa chivadik.

13. Milad: Nsand a shikol ufanyidin kukwatikesh mulad ujim wamwinkangau nich mashakamin ma mu teritwar wau. Chilakej:

1. (1) Ku chikumbu ni chikumbu: Mu mulad winou mud kulejan ku chis ni chis—yikala mes ni mes, ku telefon, ap kusutin mikand—ni kumuchirikin muntu wisamba nend piwalejana ku chikumbu ni chikumbu.

2. (2) Kulejan mu mutapu wa chikashimwish: Chitongijok cha mulad winou chid cha kumekesh mutapu wa kusadin mitapu yawonsu yimekena ya kuswimp mambamb ma yom yindj mulong wa kupan uman. Chikutwish kwikal kwisambin chitongijok cha Mufund kanang ni muntu utanijadina nend ku mudimu, ku shikol, mu mukal wey, mu transpor wa antu awonsu, ap kwi ndond yikwau piuda mu mijikit yey ya dichuku dawonsu.

3. (3) Kulejan pa ndond ya antu avud: Mu mulad winou mukutwish kwikal kulejan nich prezantwar, kulejan kud antu pa ndond jau ja midimu, kulejan mwinjil, mu jindond ja kwipuwangejin antu awonsu, mu maparking, ap kwawonsu tukutwisha kutan antu.

   1. 14. Mutapu wa Kusadin Mavideo ni Mikand: Kukwatijan ni yishiken, nsand a shikol ukutwish kutond kusadin video ap mukand. Anch mu chikunku chamwinkangau nsand a shikol mud video, ap anch amwinend watond kusadin video, ufanyidin kumulejan ni kumwisambin pakwez kafanyidinap kumutadish.

MASHAKAMIN MA MWIN KRISTU

15. Kupwa kwa muminy, aminit 15 akwambakenap mu chikunku chinech akusend chikunku chimwing ap yaad yikweta chitongijok cha kuyikwash antu kusadin Dizu da Nzamb. Ching anch ayilejen, yikunku yiney akutwish kuyinkay amakurump ap ankwash a mudimu awanyishina yitinau, pakwez chikunku cha maswir ma chikumangen afanyidin kuchisal kud mukurump. Anch chikunku chid cha minsamb, kudoshaku yipul yitekinawamu, mwin kutakel chikunku ukutwish kand kwipul yipul yikwau patakedinay. Ufanyidin kwiswipish mazu makusambish nich mulong wa kusha chisu chiwanyidina cha kwisambin manans majim ni chakwel antu ikal ni chisu chiwanyidina cha kwakul. Anch chitin kumwipul muntu, chid chiwamp muntu winou akwil ku chimet kusutamu kwakwil pa ndond yishichay, anch chitwishikin.

16. Dilejan da Bibil da Chikumangen: Aminit makum masatu. Chikunku chinech akuchisal kud mukurump uwanyishina yitinau. (Mu yikumangen muda amakurump akemp, kukwatijan ni maswir, akutwish kupan chikunku chinech ap kud ankwash a mudimu awanyishina yitinau.) Chisak cha amakurump chifanyidin kutond nany uwanyidina kutakel Dilejan da Bibil da Chikumangen. Akadivar akutondau afanyidin kutakel nawamp ni kupwish dilejan pa chisu, kukasikeshin maverse ma pa dishin ni kuyikwash antu awonsu kuman usey wa yom yilejinau. Chikwikal cha ukwash kud akadivar inay kushinshikin umutakel ulejenau piur pa mutapu wa kutakel yikunku ya yipul ni yakul. (w23.04 paj wa 24, mushet) Kupwa kwa kushinshikin yom yawonsu yida mu dilejan da rubing, chidap cha usey kulepish dilejan. Anch chitwishikin, akutwish kuswimp mwin kutakel ni mwin kutang rubing ni rubing. Anch ntakel wa Chikumangan Mudimu ni Mashakamin wit kwiswipish dilejan, mwin kutakel dilejan ndiy ukumana mutapu wa kwiswipish. Pamwing ap ukutwish kulik kutangish maparagraf mamwing.

MAZU MA KUPWISH NICH

17. Aminit asatu. Ntakel wa Chikumangan Mudimu ni Mashakamin ukuchirikin yom ya usey yilejau kal ku chikumangan. Ufanyidin kand kulejan mu wiswimp yom yikwilejau rubing rikwezap. Anch kud chisu, ukutwish kulejan majin ma ansand a shikol akusala yikunku rubing rikwezap. Kwij anch alejen kusal mutapu windj, anch chamwamu ntakel ukulejan yijikish kanang ap kutang mikand ku chikumangen mu mazu mend ma kupwish nich. Yijikish ya chisu chawonsu, mud program wa yikumangan ya mudimu wa kulejan ni yijikish piur pa kurijek Chot cha Want, kafanyidinap kuyilejan kud ntakel paday ku chimet, pakwez akuyitek ku tablo wa yijikish. Anch ntakel kakwetap chisu cha kulejan yijikish yawonsu ap kutang mikand mu chisu chimwitinau mu mazu ma kupwish nich, ufanyidin kuyit akadivar akweta yikunku mu Mashakamin ma Mwin Kristu chakwel iswipisha yikunku yau anch chitin kusal mwamu. (Tal paragraf wa 16 ni 19.) Chikumangan chikupwa ni muminy ni malembil.

KUJIKITISHAN NI KUPAN YIYUL

18. Kupwa kwa chikunku ni chikunku cha ansand a shikol, ntakel wa Chikumangan Mudimu ni Mashakamin ukwet piswimp minit umwing mulong wa kumujikitish nsand a shikol ni kumwinkish yiyul yimedina pa dilejan damwinkishangau. Chisu ntakel chikumutazukay nsand a shikol chakwel asala chikunku chend, kakwijikishap dinans dikusadinay nsand a shikol. Pakwez, anch nsand a shikol wapwish chikunku chend, kupwa kwa kumujikitish mu mutapu uwanyidina, ntakel ukutwish kwijikish dilejan damwinkishangau nsand a shikol ni ukumulej mulong wak wasadinang nawamp dinans dined ap kumulej nich nkeu mulong wak chid cha usey ni mutapu wa kushinshikin nakash pa dinans damwinkishangau. Ntakel ukutwish kand kulond yom yikwau piur pa chakumenaku anch waman anch chid cha ukwash kud nsand a shikol ap kud in kukumangan. Ntakel ukutwish kand kumwinkish kwa ayinau yiyul yikwau yimedina pa broshir Yikata Antu, Kufundish, ap mu buku École du ministère kupwa kwa chikumangan ap chisu chikwau, piur pa dilejan damwinkangau kusadin ap piur pa dilejan dindj.—Mulong wa kwijik yom yivud piur pa chisend cha ntakel wa Chikumangan Mudimu ni Mashakamin ni cha mwin kuyulan nkwash, tal paragraf wa 19, 24, ni 25.

CHISU

19. Kwikil chikunku chifanyidina kusutish chisu, ap yiyul ya ntakel wa Chikumangan Mudimu ni Mashakamin. Ap anch Mudimu ni Mashakamin Mukand wa Chikumangan ulejen chisu cha chikunku ni chikunku, anch yom yakwitangau kusal mu chikunku chey yapwa, chidap cha usey kuwejaku yom yikwau mulong kwau wa kuwanyish chisu chakwinkangau. Anch yikunku yimwing yasutish chisu, ntakel wa Chikumangan Mudimu ni Mashakamin ap mwin kuyulan nkwash ufanyidin kuyiyul kwa ayinau asalang yikunku yiney. (Tal paragraf wa 24 ni 25.) Chikumangan chakabuj, kuwejinaku ni miminy ni malembil, chifanyidin kusal saa 1 ni aminit 45.

ANCH KALAM WA MUNYINGUMUKU WENDIN CHIKUMANGEN

20. Anch kalam wa munyingumuku wendin chikumangen, program ufanyidin kusadik mud mulejenau mu Mudimu ni Mashakamin Mukand wa Chikumangan, pakwez: Chikunku chida mu Mashakamin ma Mwin Kristu cha Dilejan da Bibil da Chikumangen akuchiswinkan nich diskur da mudimu da aminit 30 dikusalay kalam wa munyingumuku. Kurutu kwa diskur da mudimu, ntakel wa Chikumangan Mudimu ni Mashakamin ukuchirikin mu wiswimp program wa dichuku dinida ni kulejan mu wiswimp yom yikwilejau rubing rikwezap, ukulejan yijikish ya usey, ukutang mikand yitina kutang ni kupwa ukumutazuk kalam wa munyingumuku. Kupwa kwa diskur da mudimu, kalam wa munyingumuku ukupwish chikumangan nich muminy watondangay. Ukutwish kumutazuk mukadivar mukwau kusal malembil ma kupwish nich. Kukwikalap shikol yikwau mu dizu da chikumangen yikusadika pa chisu cha kwendin kwa kalam wa munyingumuku. Chisak chikutwish kusal yikumangan yach ap pa chisu chendidinay kalam wa munyingumuku chikumangen chijim. Pakwez, chisak chikwibomb ni chikumangen chijim mulong wa diskur da mudimu dikusalau kud kalam wa munyingumuku.

RUBING RA CHITENTAM CHA MUNYINGUMUKU AP CHA REJON

21. Kwikil chikumangan chikusadika rubing ra chitentam cha munyingumuku ap cha rejon. Chifanyidin kuvurish chikumangen anch yom yida ku program wa yikumangan ya rubing rinira, muntu ni muntu ufanyidin kuyilej panrend ap kuyilej mu dijuku.

RUBING RA CHIVURIKISH

22. Anch Chivurikish chawil mukach mwa rubing, kwikil program wa Chikumangan cha Mudimu ni Mashakamin ukusadika.

KALAM WA CHIKUMANGAN MUDIMU NI MASHAKAMIN

23. Mukurump umwing ukutondau kud chisak cha amakurump ukwikal kalam wa Chikumangan Mudimu ni Mashakamin. Ukwet chisend cha kwikal nich kashinsh anch chikumangan chinech achitenchikin nawamp ni chisadikin kukwatijan ni umutakel winou. Ufanyidin kwovijan nawamp ni mwin kuyulan nkwash. Anch kamu Mudimu ni Mashakamin Mukand wa Chikumangan wabudik, kalam wa Chikumangan Mudimu ni Mashakamin ukwangan yikunku yawonsu ya angond aad ya yikumangan ya mukach mwa rubing. Kwawiy kulond anch yikunku yakad kwikal ya ansand a shikol, yikunku ya ansand a shikol, ni in kutakel yikumangan ya mukach mwa rubing atondinau kal kud chisak cha amakurump. (Tal paragraf wa 3-16 ni 24.) Chisu changenay yikunku ya ansand a shikol ufanyidin kulam mu manangu chimbu cha nsand a shikol, ukaliweny wend, ni kuman anch nsand a shikol ukutwish kwisambin yom yamwinkishangau nich win kashinsh. Ufanyidin kand kusadin mutapu winou uwamp wa kutong chisu changenay yikunku yikwau ya chikumangan. Chikunku chawonsu chifanyidin kumwinkishach muntu kurutu kwa mbing jisatu, ap ni kusut, kwa dichuku dikezay kusal chikunku chend. Chitin kusadin fish Chikunku cha Kusal ku Chikumangan cha Mudimu ni Mashakamin ma in Kristu (S-89) mulong wa kwangan yikunku ya ansand a shikol. Kalam wa Chikumangan Mudimu ni Mashakamin ufanyidin kushinshikin chakwel kopi wa program wa yisend ya chikumangan chakabuj amutek ku tablo wa yijikish. Chisak cha amakurump chikutwish kutond mukurump mukwau ap nkwash wa mudimu mulong wa kumukwash. Pakwez, ching kusu amakurump awiy afanyidina kwangan yikunku yakad kwikal ya ansand a shikol.

NTAKEL WA CHIKUMANGAN MUDIMU NI MASHAKAMIN

24. Rubing ni rubing, mukurump umwing ukusal mud ntakel wa Chikumangan Mudimu ni Mashakamin. (Yikumangen yikweta amakurump akemp, yikutwish kutond ankwash a mudimu awanyishina yitinau mulong wa kutakel, kukwatijan ni maswir.) Ukwet chisend cha kurijek mazu ma kusambish nich ni ma kupwish nich. Ukulond kand mazu ma kusambish nich chikunku chawonsu, kulondwish ni uvud wa amakurump, ukutwish niyend kusal yikunku yikwau ya chikumangan, pakampwil yikunku yitinau kutadish kwau video pakad kumwisambin. Yom yilondinay kupwa kwa muntu kusal chikunku ni kurutu kwa kumutazuk muntu mukwau yifanyidin kwikal yiswimp nakash. Chisak cha amakurump chifanyidin kutond amakurump awanyishina yitinau mulong wa kuwanyish chisend chinech. Amakurump awanyishina yitinau awiy akutondau mud antakel chisu ni chisu. Kukwatijan ni maswir ma pol pen, kalam wa Chikumangan Mudimu ni Mashakamin akutwish kumusadil yisu yivud mud ntakel kusutamu amakurump akwau awanyishina yitinau. Anch mukurump uwanyishin yitinau mulong wa kutakel Dilejan da Bibil da Chikumangen, chimeken anch uwanyishin kand yitinau mulong wa kwikal ntakel wa chikumangan. Pakwez, vurikany anch mukurump usadina mud ntakel ufanyidin kuyijikitish ansand a shikol, ni kuyiyul nich rukat anch chitin kusal mwamu. Ntakel winou ukwet kand chisend cha kusal usu chakwel chikumangan chipwa pa chisu. (Tal paragraf wa 17 ni 19.) Anch ntakel ukatin ni anch kud ndond yijim, akutwish kutek mikro mukwau kurutu, kwawiy kukuyitazukinay in kusal yikunku, piminyay mukadivar ukusala chikunku chin ku mikro wa in kusal yikunku. Chikwau kand, ntakel ukutwish anch ukatin kushakam ku tebur uda ku chimet pa chisu cha Kutang Bibil ni pa chisu cha chikunku cha chikumangan cha Ipana mu Mudimu wa Kulejan. Chid mulong wa kulik kusutish chisu.

MWIN KUYULAN NKWASH

25. Anch chitwishikin, chiwapin kusadin mukurump ukweta ukaliweny mu kusal madiskur mulong wa kuwanyish chisend chinech. Mwin kuyulan nkwash ukwet chisend cha kuyiyul amakurump ni ankwash a mudimu kwa ayinau, anch chid cha usey, piur pa yikunku yin yawonsu yisadinau mulong wa kufundish, mud yikunku yida mu Chikumangan Mudimu ni Mashakamin, diskur da antu awonsu ni kutakel ap kutang dilejan da Chinong cha Kalam ap Dilejan da Bibil da Chikumangen. (Tal paragraf wa 19.) Anch mu chikumangen mud amakurump avud akata kusal madiskur ni kufundish nawamp, muvu ni muvu akutwish kutond mukurump windj uwanyishina yitinau mulong wa kusal mudimu wa mwin kuyulan nkwash. Chidap cha usey kud mwin kuyulan nkwash kupan yiyul kupwa kwa chikunku chin chawonsu.

MASHIKOL MAKWAU

26. Kukwatijan ni uvud wa ansand a shikol, yikumangen yikutwish kutenchik mashikol makwau mulong yikunku ya ansand a shikol. Shikol yikwau yin yawonsu yifanyidin niyawiy kwikal ni mwin kuyulan uwanyishina yitinau, nakash ufanyidin kwikal mukurump. Kukwatijan ni maswir, nkwash wa mudimu uwanyishina yitinau ukutwish kusal mudimu winou. Chisak cha amakurump chifanyidin kutond muntu ufanyidina kuwanyish chisend chinech ni kukwat mupak anch chitin kuswimpijan. Mwin kuyulan ufanyidin kulondul yiyul yilejenau mu paragraf wa 18. Anch kukusadik shikol yikwau, chifanyidin kuyilej ansand a shikol kuya mu kapalikany kakwau kupwa kwa chikunku cha Mapit ma mu Spiritu chida mu Yom ya Usey Yida mu Dizu da Nzamb. Afanyidin kwibomb ni chikumangen chakabuj kupwa kwa chikunku cha nsuden cha ansand a shikol.

MAVIDEO

27. Kukwikal mavideo marijekinau kal mulong wa chikumangan chinech. Mavideo ma chikumangan cha mukach mwa rubing makwikalaku mu application JW Library^® ni ukutwish kumatanany kusutin ma aparey kushalijan.

© 2023 Watch Tower Bible and Tract Society of Pennsylvania

S-38-DR 12/23