Shikol ya Mudimu ya Uteokras ya 2002

¹ Ukaliweny wa kulond akat kuuman mud chom chamwamu kud antu avud. Pakwez, kulond chidi chipan chimwing chidiokila kud Yehova. Chikat kututwishish kwisamb ni antu akwau ni kubudish yitongijok ni yovil yetu. Chipandikena kand kuwap, tukat kumushiman Nzamb wetu nich kulond.​—⁠Kus. 22:22; 1 Kor. 1:​4-7.

² Amakundj, amband, ni an akat kutambul diyiy (kufumb) ku Shikol ya Mudimu ya Uteokras chakwel kulejan dijin dia Yehova. (Kus. 148:​12, 13) Program wa shikol wa 2002 ukwet mitu ya milong yivud kushalijan ya Baibel yitukutwisha kusadil ayinetu chakwel kutaninamu ukwash ni kuyisadil mu mudimu. Anch twirijek mulong wa shikol ni kusadil pamwing ku shikol yiney, tukutwish kuwejinaku ronganyin ni ukaliweny wetu mud alej a Dizu dia Nzamb.​—⁠Kus. 45:⁠1.

³ Tutangany Baibel Dichuku ni Dichuku: Anch tukweting chisu chin chawonsu Baibel piswimp, tukutwish kwisakin chisu chawonsu tuburedina midimu mulong wa kumutang. Avud pakach petu akwet kusu aminit akemp pa chisu cha muten chikutwishau kusadil mwi njil yiney. Chidi cha ukwash mud ik kutang paj ap kusu umwing dichuku ni dichuku, nich yawonsu yifanyidina kulondul nich program wa kutang kwa Baibel udia mu program wa shikol!​—⁠Kus. 1:​1-3.

⁴ Ukaliweny wa kutang nawamp Baibel ukutwish kutukwash kushik ku michim ya in kututesh ni kuyibachik kumushiman Yehova. Akadivar akusala Misamb No. 2 ku shikol afanyidin kwiyijidish, kwiyijidish, ni kwiyijidish kand kutang chikunku chinech nich dizu dizambukina. Kalam wa shikol ukez kupan kujikitish ni yiyul chakwel kurijek mutapu wa kutang.

⁵ Tusadilany Buku Comment raisonner: Misamb No. 3 ni No. 4 yishindamedin pa Buku Comment raisonner. Antu avud pakach petu akutwish pamwing ap kwikal apakishina kusadil chisu chivud chiyul chinech cha ukwash mu mudimu wa chingand. Anambaz afanyidin kutond ndond yifanyidina nich teritwar. Kalam wa shikol ufanyidin kuta matu pakampwil ku mutapu ufundishinau ni kusadil Mifund kwa an a shikol.

⁶ El amboku Shikol ya Mudimu ya Uteokras yitukwasha etu awonsu kudandamen kusadil kamu chipan cha kulond chipaninay Nzamb wetu mulong wa kulejan rusangu ruwamp ni kumushiman Nzamb mujim, Yehova!​—⁠Kus. 34:1; Efe. 6:⁠19.