Shikol ya mudimu ya uteokras ya 2000

¹ Shikol ya Mudimu ya Uteokras chidi chiyukish chimwing cha kashinsh kud antu a Yehova. Mu mivu 50 yasutina ey, shikol yiney yakwashin tunan twa antu kukulish ukaliweny wau wa kulond kurutu kwa antu ni kufundish mauyakin ma Baibel. (Kus. 145:​10-12; Mat. 28:​19, 20) Ov niyey yakukwashin kuya kurutu? Yikutwish kudandamen kuchisal mu 2000 anch winunginaku sens ni kusadil yiyul yikukwinkishau.

² Yany yiletinau piur pa misamb ni mikand ya kusadil yidi pa paj wa kusambish wa program wa shikol ya 2000. Ashinshikidin kand chisu chiletinau mulong wa chikunku ni chikunku, mikand ya kusadil, mutapu wa kuyisutish, ni jinsangu jikwau. Itekinap amboku chisu cha kutang yany nawamp ni kuyisadil.

³ Kutang kwa Baibel rubing ni rubing: Mu program wa shikol mudi maprogram maad kushalijan ma kutang kwa Baibel rubing ni rubing. Wa kusambish udi program wa kutang utukata kal kusadil usendina piswimp mapaj matan ma Baibel. Milong yijim ya mu Baibel yimanyidin pa kutang kwinoku. Program wa kaad wa kuwejin upanin chiyul cha kutang piswimp tupamp twaad uvud wa mapaj. Anch walondul program winou, ukutwish kutang Baibel wa kabuj mu mivu yisatu. Chidi chakin anch amwing akutwish kusot kutang nakash kupandakanamu yitekinau pa program wa kutang wa kuwejin, ni akwau kakutwishap kwau kumulondul. Tusangerany yitukutwisha kusal, pa ndond pa kwisikej nich yisadinau akwetu. (Gal. 6:⁠4) Chijim kutang dichuku ni dichuku Dizu dia Nzamb.​—⁠Kus. 1:​1-3.

⁴ Chakwel kwifundish ku Shikol ya Mudimu ya Uteokras, ufanyidin kwambamb nend kalam’a shikol. Kwat nich makas maad misamb yikwinkinau, ni pikil walik kuyisutish chamwamu. Tal shikol mud ditenchik dimwing didiokila kud Yehova. Irijeka nawamp, shinshikin nakash misamb yakwinkishangau, ni kwisamb nich muchim wey wawonsu; mu mutapu winou ukuman ukwash udiokila ku shikol yiney ya pakampwil.