Tumwitany Yehova ukwash
1 Yesu wayileja in kwilej end nawamp anch mudimu wau uswiridin chiyukish cha Yehova. (Mat. 9:37, 38) Malembil metu ma muchim umwing, ma kushiman ni kujikitish pamwing ni kulembil kwetu kujijamena yimekeshining kwengamin kwetu sens padi Yehova mulong wa kutambul ukwash. (Filp 4:6, 7) Mifund yituswakejin kudandamen ‘kulembil milad yawonsu ya malembil,’ ni chinech chitadil kand malembil metu piur pa mudimu wetu.—Efe. 6:18.
2 Tukakumushimanang Yehova mu malembil mulong wa ngikadil yend yipandikena kuwap ni mulong wa yisadilay. Tukakumushimanang kand mulong ndiy Mwin-kupan rusangu ruwamp tukata kulejan. Ufanyidin kushiman kwetu mulong ndiy kwend ukata kututwishish kupandikan mu mudimu wetu.—Kus. 127:1.
3 Nich malembil metu ma kujikitish, tumujikitishining Yehova mulong wa nteshil watwinkishinay piur pa rusot rend ni rutong rend. Ov didap dilau ditwitapidila dia kwisambin uyakin wa Want ni akwau? Tumujikitishany Yehova mulong wa yawonsu tusadina mu mudimu.—Kus. 107:8; Efe. 5:20.
4 Chiwapidil kamu nakash, anch tumwita Yehova ukwash mulong wa kuman antu akwitiya kwilej netu Baibel ni kwasil michim yau nich uyakin. Anch twalembil malembil mud minam, tukujingunin anch ching kamu Nzamb ndiy ukutwisha kusongishish mudimu wetu mabuj.—1 Kor. 3:5-7.
5 Nambaz umwing watonga anch mband umwing wadingay ni kushil mamagazin kadingap ni kutang Tour de Garde ni Réveillez-vous! Chalikay kushesh majurnal minam ma usey, wamwita Yehova anch ang mband winou kadingap ni kumatang, amalika kwend. Nambaz chayay ni kumutal kapamp kakwau, mfumwend a mband winou walonda anch: “Najikitish nakash mulong wa kutuletin mamagazin chisu ni chisu. Nikakumatangang ni mankatishin nakash.”
6 Nich kulembil kwa kwikepish ni kwa muchim umwing, tukutwish kumwit Yehova ukwash wa kurish nich kuburen kusanger ni kuchirilan kwa antu avud ni kupandikan wom wawonsu wa muntu chakwel kudandamen kupan uman nich mushiku. (Midimu 4:31) Anch twadandamen ‘kulembil milad yawonsu ya malembil’ ni kujijaman mu kuziyil nich mudimu wetu utumbila, tukutwish kuchingej ukwash wa Yehova.—1 Yohan 3:22.