Wapish Mutapu Wey wa Kulembil

1. Yehova uyitin atusahlapol end kusal ik? (Tal kand chipich.)

KUD Nany tufanyidina kukimb rongoj ni umutakel? Twij chakul ku chipul chinech. Tukutwish kumusejin Yehova mu malembil. Yehova utwitin chakin kamu kusal mwamu. Ukatin anch tulembilang chisu chawonsu​—“kwakad kulik.” (1 Tes. 5:17) Tukutwish kumusejin mu malembil mulong wa kumwit umutakel mu yom yawonsu tukutwisha kusal mu mwom wetu. (Jnsw. 3:5, 6) Mulong ud Nzamb ukata kupan, Yehova katushidinap mimbu piur pa tupamp tufanyidina kumulembil.

2. Yom ik tukumana mu mutu wa mulong winou?

² Tukat kusanger nakash chipan cha malembil. Pakwez, mulong tukwet yom yivud ya kusal dichuku ni dichuku, chikutwish kutukasiken kutan chisu cha kulembil. Tukutwish kwiyov kand anch chitwitin kuwapish mutapu wetu wa kulembil. Tukwet musangar, mulong tukutwish kutan dikasikesh ni umutakel mu Bibil. Mu mutu wa mulong winou tukuman mutapu tukutwisha kwishil chisu cha kulembil kusutin kushinshikin chilakej cha Yesu. Tukwisambin kand yom yitan ya usey tufanyidina kutek mu malembil mulong wa kuwapish mutapu wetu wa kulembil

YESU WITEKINANG CHISU CHA KULEMBIL

3. Yom ik yading yijay Yesu piur pa malembil?

³ Yesu wading wij anch Yehova ukwatining malembil nich usey. Kurutu eza pa divu, wamanang mutapu wakulangay Tatukwend malembil ma amakundj nau amband ashinshamena. Chilakej, Yesu wading pamwing ni Tatukwend chisu chakulay ku malembil ma Ana, David, Eliya, ni ma antu akwau avud ading ashinshamena. (1 Sam. 1:10, 11, 20; 1 Ant 19:4-6; Kus. 32:5) Chawiy, chidiap cha kushimok kuman anch Yesu wayifundisha in kwilej end kulembil chisu chawonsu, nich kashinsh!​—Mat. 7:7-11.

4. Yom ik twilejidina ku malembil ma Yesu?

⁴ Kusutin mutapu wamulembilangay amwinend Yehova, Yesu wayishila in kwilej end chilakej cha kulondul. Pasalangay mudimu wend wa kulejan, Yesu walembilang chisu ni chisu. Chading chimwitin kwitekin chisu cha kulembil mulong wading ukwataken nakash ni ading amulondwil kud antu avud. (Mar. 6:31, 45, 46) Walanka pamanch pa fee chakwel aya kwi ndond ya amwinend mulong wa kulembil. (Mar. 1:35) Pa chisu chinicha walembila uchuku wa kabuj kurutu kwa kukwat mupak wa usey nakash. (Luka 6:12, 13) Ni Yesu walembila tupamp tuvud uchuku kurutu kwa kufa, mulong wa kuwanyish chikunku cha chisend chend chikash panap pa divu.​—Mat. 26:39, 42, 44.

5. Mutapu ik tukutwisha kumwimburij Yesu chisu tulembila?

⁵ Chilakej cha Yesu chitufundishin anch, chikalap nchik mutapu tukwatakena, tufanyidin kwishil chisu cha kulembil. Mud Yesu, chikutwish kutwit kwishil chisu mulong wa kulembil​—kulank pamanch nakash ap kushal ansudien urel kurutu kwa kulal. Anch twasal mwamu, tukumekesh kud Yehova anch tukwatin nich usey chipan chinech cha pakampwil. Nambaz Lynne uvurikin musangar wovay chisu chilejay kapamp ka kusambish piur pa dilau dia kulembil. Ulondin anch: “Panileja anch nikutwish kwambamb ni Yehova chisu chawonsu, nashikena kumuman mud Murund nam wa piswimp ni chinech chambachika kuwapish mutapu wam wa kulembil.” Chakin kamu mwamu mukatau antu avud kwiyov pakach petu. Tushinshikinany katat yom yitan ya usey tufanyidina kutek mu malembil.

YOM YITAN YA USEY TUFANYIDINA KUTEK MU MALEMBIL

6. Kukwatijan ni Kujingunik 4:10, 11, Yehova uwanyidin kutambul ik?

⁶ Kumushiman Yehova. Mu chishimushimu chend, kambuy Yohan wamana mwiur amakurump 24 akat kumwifukwil Yehova. Amushimana Nzamb, nich kashinsh anch ndiy uwanyidina kutambul “uyaj ni katumb ni ukash.” (Tang Kujingunik 4:10, 11.) Angel ashinshamena akwet niyau mayingishin ma kumushiman ni kumutumbish Yehova. Ad nend mwiur ni amwijikin kal nawamp. Akat kuman mikadil yend kusutin yom yikatay kusal. Kushinshikin yom yisadinay Yehova kukat kuyibachik kumushiman.​—Job 38:4-7.

7. Mulong wa yom ik tufanyidina kumutumbishin Yehova?

⁷ Niyetu tukatin kumushiman Yehova mu malembil, mu kumulej yom tukatina ni yitusangareshina piur pend. Piutangina ni kwilej Bibil, sal usu wa kujingunin mikadil yimekeshinay Yehova, pakampwil yikusangareshina ey. (Job 37:23; Rom 11:33) Kupwa muleja Yehova mutapu wiyovila piur pa mikadil yiney. Tukutwish kand kumushiman Yehova mulong wa yom yisadinay mulong wetwetu ni mulong wa akadivar nau anambaz netu awonsu. Ukat kutubangin ni kutuchidij chisu chawonsu.​—1 Sam. 1:27; 2:1, 2.

8. Mayingishin ik matubachikina kumujikish Yehova? (1 Tesalonik 5:18)

⁸ Kumujikitish Yehova. Tukwet mayingishin mavud makutwisha kutubachik kumujikitish Yehova mu malembil. (Tang 1 Tesalonik 5:18.) Tukutwish ku mujikish Yehova mulong wa yom yawonsu tukweta; kupwa kwa yom yiney yawonsu, chipan chawonsu chiwamp chidiokiling kud ndiy. (Jak. 1:17) Chilakej, tukutwish kumujikish mulong wa kuwap kwa divu ni kwa yitang yasalay yisangareshina. Tukutwish kand kumujikitish mulong wa chipan cha mwom, dijuku dietu, arund netu, ni mulong wa ruchingej retu. Ni tukatining kumujikitish Yehova mulong wa urund wetu wa usey nakash tukweta pamwing ni ndiy.

9. Mulong wak tufanyidin kukudish mwikadil wa kumujikitish Yehova?

⁹ Tufanyidin kusal usu pakampwil wa kutongijokin pa mayingishin mamwing makutwisha kutubachik kumujikish Yehova. Tushich mu mangand mudia antu aburedina mwikadil wa kujikitish. Antu avud akat kutongijokin kwau ching pa yom yikatinau pa ndond pa kutongijokin pa yom yikutwisha kuyibachik kujikitish mulong wa yom yikwetau. Anch twimburij mwikadil winou, malembil metu ma kutwish kwikal kwau ching ma kwitan yom. Mulong wa kwipuk mwikdil mud yinou, tufanyidin kudandamen kukudish ni kumekesh mwikadil wa kujikitish mulong wa yom yawansu yitusadidinay Yehova.​—Luka 6:45.

10. Kwikal mwin kujikitish kwamukwasha mutapu ik nambaz umwing kujijaman? (Tal kand chipich.)

¹⁰ Mwikadil wa kujikitish ukutwish kutukwash kujijamen yikokujol. Shinshikin yom yamushikena Kyung-sook, yidia mu Chinong cha Kalam cha 15 Ngond wa 1, 2015. Amukwata kanser wa ku michim. Ulondin anch, “Mayej minam mambula nakash. Niyova anch nashadish kal yom yin yawonsu, ni niyakamisha nakash.” Yom ik yamukwasha kujijaman? Ulondin anch, dichuku diawonsu uchuku kurutu alal wayangang mu kapalakany kend ka piur ni walembilang nich dizu dia piur mulong wa yom yitan yamusangareshang pa dichuku dinidia. Kusal mwamu kwamukwasha kulik kwiyakamish nakash ni kwamubachika kumekesh rukat rend mudiay Yehova. Wamana mutapu ukatay Yehova kuyikwash atushalapol end ashinshamena pa chisu chikatau kurish ni yikokujol, ni wajingunina anch yitukweta yivud mu mwom yetu yid yiyukish kadiap yikokujol. Mud Kyung-sook, tukwet mayingishin mavud ma kumujikitishin Yehova ap anch turishin ni yikokujol. Kumujikitish Yehova mu malembil kukutwish kutukwash kujijaman ni kulam musangar wetu.

11. Mulong wak chayita in Kwilej a Yesu kwikal atakamena kupwa kwa Yesu kuchirik mwiur?

¹¹ Kumwit Yehova kutakaman mu mudimu wa kulejan. Kurutu achirika mwiur, Yesu wayivurisha in kwilej end chisend chayinkishay cha kupan uman piur pend “mu Yerusalem, ni mu Yudeya mwawonsu, ni mu Samaria, djat ni kusudiedila mangand.” (Mid. 1:8; Luka 24:46-48) Mu kusut kwa chisu chikemp, antakel a in Yuda amukwata kambuy Pita ni Yohan ni ayitwala kurutu kwa dirumburish dijin dia in Yuda, ayileja amakundj inay ashinshamena anch afanyidin kwimik kulejan ni ayovisha wom. (Mid. 4:18, 21) Mutapu ik wasalay Pita ni Yohan?

12. Kukwatijan ni Midimu 4:29, 31, yom ik yasalau in kwilej?

¹² Ap anch antakel a relijon wa in Yuda ayovisha wom, Pita ni Yohan akula anch: “Tongany ayinen anch chitentamin kurutu kwa Nzamb kukuziyilany en kupandakanamu kumuziyil Nzamb. Mulong etu kitukutwishap kulik kulond yom yitwamana ni yitwatesha ayinetu.” (Mid. 4:19, 20) Kupwa kwa kumulikishaku Pita ni Yohan, in kwilej inay amulembila Yehova chakwel awanyisha rusot rend. Alembila anch: “Itwinkisha etu atushalapol ey [kutakaman kwa] kulond dizu diey wakad wom.” Yehova wakula ku malembil minam makin.​—Tang Midimu 4:29, 31.

13. Yom ik tukutwisha kwilejin ku chilakej cha Jin-hyuk?

¹³ Tukutwish kuyimburij in kwilej kusutil kudandamen kulejan ap anch antakel a ngand atukangesh kusal mudimu wa kulejan. Shinshikin chilakej cha mukadivar Jin-hyuk, watekau mu rukan mulong walika kwandam mu usalay. Padingay mu rukan, amwinkisha chisend cha kuyilam antu a rukan amwing ading alamidinau mu tupalakany twa ayinau, pakwez kamwinkishap mbil ya kuyirumburil yom yading yakad kwikal mu chisend chend ap piur pa Bibil. Walembila chakwel ikala ni kutakaman ni nkeu ja kulejan uyakin anch wikal ni mutapu wa kusal mwamu. (Mid. 5:29) Ulondin anch: “Yehova wakula malembil mam kusutin kwinginkish kutakaman ni manangu mulong wa kusambish dilejan dia Bibil mu aminit atan ku yis ya tupalakany twa rukan. Kupwa, uchuku nafundang mikand yakuyinkish antu a rukan dichuku diambakedinap.” Mud Jin-hyuk, Niyetu tukutwish kulembil mulong wa kwikal ni kutakaman ni manangu, nich kashinsh anch Yehova ukutukwash kuwanyish mudimu wetu.

14. Yom ik yikutwisha kutukwash chisu turishina ni yikokujol? (Kuseng 37:3, 5)

¹⁴ Kumwit Yehova ukwash mulong wa kujijamen yikokujol. Antu avud pakach petu akat kurish ni milong ya mayej, ya kuziy mu manangu, kufish kwa muntu ukatinau, mashakamin makash mu dijuku, kuzengol ap kand milong yikwau. Ni yom yikwau mud yipupu ni jinjit yasadin anch yikokujol yiney yikasikan kurish nich chipandakena. Mwazurila Yehova muchim wey. Muleja milong yey mud mutapu ukutwisha kumulej murund ney wa piswimp. Ikal nich kashinsh anch Yehova “ukukukwash.”​—Tang Kuseng 37:3, 5.

15. Malembil makutwish kutukwash mutapu ik ‘kujijaman mu mar’? Let chilakej.

¹⁵ Kudandamen kulembil kukutukwash ‘kujijaman mu mar.’ (Rom 12:12) Yehova wij nawamp milong yirishinau nich atushalapol end—“ukat kwov kudil kwau ni kuyipandish.” (Kus. 145:18, 19) Yawiy yom yamanay Kristie, chibol wasadina kal mivu 29. Pakad kutongin, warisha ni mayej makash. Mud chibudikin, waziya nakash. Mu kusut kwa chisu, wajingunina anch makwend amukwata mayej makash mafanyina kumushikij ku rufu. Kristie ulondin anch: “Namulembila Yehova nakash mulong wa kwinginkish usu nading niswirikedina dichuku diawonsu. Nasala usu wa kulimish program wam wa mu spiritu kusutin kukumanganang, ni kusal dilejan diam dia pakampwil.” Uwejidinaku anch: “Kulembil kwankwasha kujijaman mu yirung ya mar. Nading nij anch Yehova wading pamwing niyam, anch ndiy wankwasha kwiyov pee. Ap anch milong yam yapwap kapamp kamwing, Yehova wakula malembil mam kusutin kwinginkish chisambu cha mu manangu.” Kangal twavuramen anch “Yehova wij mutapu wa kuyikamunin mu mar antwend atumbila.”​—2 Pita. 2:9.

16. Chakwel tutwisha kurish ni choziu, mulong wak tukwet kuswir kwa ukwash wa Yehova?

¹⁶ Kumwit Yehova ukwash mulong wa kurish ni choziu. Mulong tud antu akad kuwanyin, chitwitin kusal usu nakash mulong wa kurish ni choziu cha kusal yom yidia yiyimp. Satan ukat kusal usu chakwel chitukasiken nakash kurish ni choziu mud chinech. Mutapu umwing ukatay kupakish kuyipish manangu metu ud kusutin kwipuwangej kwijondila. Kwipuwangej mud kwinoku kukutwish kukun yitongijok yijondila mu manangu metu—yitongijok yikutwisha kutwijondish ku mes ma Yehova ni kutushikij kusal chitil chikash.​—Mar. 7:21-23; Jak. 1:14, 15.

17. Mutapu ik tukutwisha kusal yom kukwatijan ni malembil tusadina mulong wa kutukwash kwipuk choziu? (Tal kand chipich.)

¹⁷ Tukwet kuswir kwa ukwash wa Yehova mulong wa kupandakan choziu chikutwisha kutubachik kusal yom yiyimp. Yesu wovakesha yom yiney mu malembil ma chilakej, palonday anch: “Kangal watutwal ku yoziu, pakwez tukamunina ku kuyip.” (Mat. 6:13) Yehova ukatin kutukwash, pakwez tufanyidin kumwit mulong wa ukwash winou. Tufanyidin kand kusal yom kukwatijan ni malembil metu. Tukutwish kusal usu wa kwipuk kutang ni kutesh yitongijok yiyimp yivulijadina mu mangand minam ma Satan. (Kus. 97:10) Tukutwish kwizwish manangu metu nich yitongijok yiwamp kusutin kutang ni kwilej Bibil, kukumangan ku yikumangan ni kwipan mu mudimu wa kulejan. Ku mutambu wend, Yehova utukanin anch kakwitiyap anch atupaka nich yom yipandakenamu usu wetu.​—1 Kor. 10:12, 13.

18. Pantaliken ni malembil, yom ik tufanyidina kusal?

¹⁸ Etu awonsu tufanyidin kulembil nakash mulong wa kushal ashinshamena kud Yehova mu chirung chinech chikash cha machuku ma nsudien. Ishila chisu dichuku diawonsu mulong wa kulembil nich yovil yidiokila ku muchim. Yehova ukatin anch ‘tumwazurir michim yetu’ mu malembil. (Kus. 62:9) Mushimana Yehova ni mujikitisha mulong wa yom yin yawonsu yisadinay. Mwita chakwel akukwash kwikal utakamena mu mudimu wa kulejan. Mwilembina chakwel akukwash kurish nich milong yin yawonsu ni kupandakan choziu ukutwisha kurish nich. Kangal walikidin anch chom ap muntu kanang akukangesh kumulembil Yehova. Pakwez, mutapu ik ukatay Yehova kwakul ku malembil metu? Tukwakul ku chipul chinech cha usey mu mutu wa mulong wambakedinap ou.