Mutapu Ukatay Yehova Kwakul ku Malembil Metu

1-2. Yom ik tukutwisha kwiyipul piur pa malembil metu?

OV, wiyipwilap kal anch Yehova ukat kwakul ku malembil mey? Anch mwawiy, udiap kwey amwiney. Mwamu mukatau akadivar nau anambaz avud niyau kwiyipul, pakampwil anch arishin ni yakamish. Chisu tumena mar, chikutwish kutukasiken kujingunin mutapu ukatay Yehova kwakul ku malambil metu.

² Katat tushinshikinany mulong wak tukutwisha kwikal nich kashinsh anch Yehova ukat kwakul ku malembil ma atushalapol end. (1 Yoh. 5:15) Tukushinshikin kand yipul yilondwilaku ey: Mulong wak yisu yimwing chikat kumekan mud Yehova kakwakulangap ku malembil metu? Mu mitapu ik mukatay Yehova kwakul ku malembil nlel unou?

YEHOVA KAKATAP KWAKUL MU MUTAPU TUCHINGEJINA ETU

3. Mulong wak Yehova ukukasikshin kumulembil?

³ Bibil utwinkishin kashinsh anch Yehova utukatin nakash ni tuwet usey nakash ku mes mend. (Age 2:7; 1 Yoh. 4:10) Chawiy chitukasikeshinay kumwit ukwash mu malembil. (1 Pita 5:6, 7) Ukatin kamu kutukwash kushal piswimp ni ndiy ni kujijaman mu yikokujol turishina nich.

4. Mutapu ik twija anch Yehova ukat kwakul ku malembil ma atushalapol end? (Tal kand chipich.)

⁴ Yisu yivud, tutangining mu Bibil mutapu wakulay Yehova ku malembil ma atushalapol end. Ov, ukutwish kutongin pa yom ya mushikena Mwant David? Warisha nau akankuny avud mu mwom wend, ni wakimbang chisu chawonsu ukwash wa Yehova mu malembil. Dichuku dimwing, wamwilembina Yehova anch: Tesh kulembil kwam A [Yehova], tang matu ku kwilemb kwam amboku, ngakula mu uyakin wey ni kutentam kwey.” (Kus. 143:1) Yehova wakula ku malembil ma David. (1 Sam. 19:10, 18-20; 2 Sam. 5:17-25) David wafanyina kulond nich kashinsh anch: “[Yehova] udi piswimp kudi awonsu akata kutazuk padi Ndiy.” Niyetu tukutwish kwikal nich kashinsh mud kinak.​—Kus. 145:18.

5. Ov, pasak Yehova wakula ku malembil ma atushalapol end mud mutapu wading uchingejinau? Let chilakej. (Tal kand chipich.)

⁵ Yehova kakatap kwakul ku malembil metu mu mutapu tuchingejina etu. Yawiy yom yamushikena kambuy Paul. Wamwita Nzamb amudiosha ‘rubwambu rading ripampinau mu mujimbu wend.’ Tupamp tusatu, Paul wamulembila Yehova piur pa mulong winou. Ov, Yehova wakula ku malembil minam? Mwaning, pakwez kadiap mud mwading muchingejinay Paul. Pa ndond pa kupwish mulong, Yehova wamwinkisha usu wading uswirikedinay mulong wa kudandamen kumusadin nich kushinshaman.​—2 Kor. 12:7-10.

6. Yisu yimwing, mulong wak chikutwish kumekan anch Yehova kakatap kwakul ku malembil metu?

⁶ Niyetu yisu yimwing tukutwish kutambul chakul chishalijadina ni mutapu twading tuchingejina. Tukutwish kwikal nich kashinsh anch Yehova ndiy wija kamu mutapu uwamp wa kutukwash. “Ukutwish kusal yom yivud yipandakena yipul yetu ap yom yitutongila.” (Efes. 3:20) Chawiy, yisu yimwing ukutwish kwakul ku malembil metu mu mutapu twakad kutongin.

7. Mulong wak chikutwish kutwit kuswimp yom yimwing tukata kwit mu malembil? Let chilakej.

⁷ Chikutwish kutwit kuswimp yom tukata kwit mu malembil anch twajingunin kamu patok chidia rusot ra Yehova. Shinshikin chilakej cha Martin Poetzinger. Chisu chikemp kupwa kwa kwatan, amukasa Mukadivar Poetzinger mu kompony wa mar wa Nazi. Kwinsambishin, wamwita Yehova anch amudiosh mu kompany chakwel aya akamulam mukajend ni kuya kand kulejan. Pakwez, kupwa kwa mbing jaad, katongijokinap anch Yehova ukumukol kamu. Chawiy wasambisha kulembil anch: “Yehova, nilemb amboku, nlejap yom ukatina anch nisal.” Kupwa wasambisha kutongin pa yom yading yijijamedinau akadivar akwau mu kompony. Avud pakach pau ading iyakamishin piur pa akajau ni anau. Kupwa Mukadivar Poetzinger walembila anch: “Wajikit Yehova mulong wa chisend chisu. Nkwasha chakwel niyikasikesh ni kuyongoj akadivar nam.” Mu kompony, wasutisha mivu chidivu mu kuyikasikesh!

8. Yom ik ya usey tufanyidina kulam mu manangu chisu tulembila?

⁸ Tufanyidin kuvurik anch Yehova ukwet rutong ni ukuriwanyish pa chisu chatenchikay kal. Mu rutong riner mud kupwish rawonsu milong yikata kutumesh mar nlel unou​—milong mud mar madiokila ku yom yatangau, mayej, ni rufu. Yehova ukuwanyish rutong riner kusutin Want wend. (Dan. 2:44; Kuj. 21:3, 4) Pakwez djat ni katat, Yehova ulikidil chakwel Satan adandamen kuyikel mangand.b (Yoh. 12:31; Kuj. 12:9) Anch Yehova wapwish milong ya antu nlel, chikutwish kumekan mud Satan watwishin kuyiyikel mangand nawamp mu chilik kanangu. Chawiy, kuchingel anch Yehova awanyisha kushilamu kwend, chirumburikinap anch kakatap kutukwash. Tushinshikinany mitapu yimwing yikatay Yehova kutukwash.

MITAPU YIKATAY YEHOVA KWAKUL KU MALEMBIL METU NLEL

9. Yehova ukutwish kutukwash mutapu ik chisu tusotina kukwat mupak? Let chilakej.

⁹ Ukat kutwinkish manangu. Yehova ushidinamu kutwinkish manangu tuswirikedina mulong wa kukwat mipak yiwamp. Tukwet pakampwil kuswir kwa manangu ma Nzamb chisu tukwatina mipak yikutwisha kwikal ni usu mu mwom wetu, mud mupak wa kutond kushal mujich ap kwatan. (Jak. 1:5) Shinshikin chilakej cha nambaz mujich Maria.c Nich musangar wawonsu, wasalang mud chibol wa rawonsu chisu chatanijanay ni mukadivar. Ulondin anch: “Twikala piswimp nakash pading payila urund wetu kurutu. Namana anch nafanyina kukwat mupak. Nalembila nakash ni mu chisu chilemp piur pa mulong winou. Nading nikwet kuswir kwa umutakel wa Yehova, pakwez nading nij kand anch Yehova kendiyap ukwinkwatina mupak.” Wiyova anch Yehova wakula ku malembil masalay mulong wa kwit manangu. Mutapu ik? Pasambishay kukimbijol mu mikand yetu, wajingunina mitu ya milong yamukwasha kutan yakul ku yipul yend. Watesha kand chiyul cha manangu chamwinkishau kud makwend. Chiyul chinech chamukwasha Maria kushinshikin yovil yend, chawiy washikena kukwat mupak wa manangu.

10. Kukwatijan ni Filip 4:13, Yom ik yikusalay Yehova mulong wa kuyikwash atushalapol end? Let chilakej. (Tal kand chipich.)

¹⁰ Ukat kutwinkish usu wa kujijaman. Mud mutapu wamusadinay kambuy Paul, Yehova ukutwinkish usu tuswirikedina mulong wa kurish ni yikokujol yetu. (Tang Filip 4:13.) Shinshikin mutapu Yehova wamukwashay mukadivar Benjamin kujijamen yikokujol yikash. Wasutisha chikunku chijim cha usand wend pamwing ni dijuku diend mu kompony wa arefije mu Afrik. Benjamin ulondin anch: “Namulembila Yehova chisu chawonsu, namwita chakwel anginkisha usu wa kusal yom yikutwisha kumusangaresh. Yehova wakula ku malembil mam kusutin kwinginkish chisambu cha mu manangu, kutakaman kwa kudandamen kulejan, ni mikand yafanyina kwinkwash kushal piswimp ni ndiy.” Udandamedin kurumburil anch: “Kutang yom yayishikena ambay nam atuman, ni kwilej mutapu wayikwashau kud Yehova kujijaman kwakasikesha mupak wam wa kushal ushinshamena.”

11-12. Mutapu ik ukatay Yehova kusadin dijuku dietu dia mu spiritu mulong wa kwakul ku malembil metu? (Tal kand chipich.)

¹¹ Ukat kusadin dijuku dietu dia mu spiritu. Uchuku kurutu kwa kupan mwom wend, Yesu walembila nakash. Wamwilembina Yehova chakwel ayikwasha antu kulik kumuman mud mwin kusaal dijin diend. Pandond pa kusal mwamu, Yehova wamutumina umwing wa angel end mulong wa kumukasikesh. (Luka 22:42, 43) Yehova ukutwish kutukwash niyetu kusutin mukadivar ap nambaz ukutwisha kututazuk ap kutwendin mulong wa kutukasikesh. Etu awonsu tukutwish kukimb mitapu ya kulond “dizu diwamp” mulong wa kuyikasikesh ambay netu.​—Jnsw. 12:25.

¹² Shinshikin yom yamushikena nambaz Miriam. Mu angond akemp kupwa kwa nfumwend kufa, Miriam wading ku chikumbu amwinend, wova ushon ni kuziy nakash. Wadilang kwend chisu chawonsu, ni wading ukwet kuswir kwa muntu wafanyinay kufungwil muchim wend. Ulondin anch: “Nadingap ni usu wa kumutazuk muntu ap umwing, chawiy namulembila Yehova. Pinading nikat kulembil oku nadil lel, antazuka ku telefon. Wadinga mukurump wa chikumangen, murund nam nakash.”Mukurump winou ni mukajend amongoja Miriam. Wajingunina anch Yehova ndiy wamubachika mukadivar winou kumutazuk.

13. Let chilakej piur pa mutapu ukutwishay Yehova kusadin antu akad kumwifukwil mulong wa kwakul ku malembil metu.

¹³ Ukutwish kusadin antu akad kumwifukwil. (Jnsw. 21:1) Yisu yimwing, Yehova ukat kwakul ku malembil ma antu end kusutin kuyibachik antu akad kwitiyij mulong wa kuyikwash. Chilakej, wamubachika Mwant Aritaserisis kwitiy anch Nehemiy achirik ku Yerusalem mulong wa kukwash mudimu wa kutungiril musumb. (Neh. 2:3-6) Nlel, Yehova ukutwish kand kuyibachik ap antu akad kumwifukwil ndiy mulong wa kutukwash chisu tukweta kuswir kwa ukwash kanang.

14. Yom yamushikena Soo Hing yikukasikeshin mutapu ik? (Tal kand chipich.)

¹⁴ Nambaz utazukinau anch Soo Hing wiyova anch Yehova wamukwasha kusutin dokter wend. Mwanend ikundj warisha ni milong yivud yasalang anch ashadish manangu. Pasalay mwanend aksidan mukash, ndiy pamwing ni nfumwend imika mudimu mulong wa kumulam. Mud chibudikin, chayikasikena kuman nfalang. Soo Hing ulondin anch wiyova anch washikal chad kwinsudien ni kakutwishap kand kujijamen chikokujol chikwau. Wamwazurila Yehova muchim wend, ni wamwita ukwash. Dokter wakwata mupak wa kukimb mutapu wa kumukwash ndiy ni dijuku diend. Mulong wa chinech, atambula ukwash wa guvernema wau ni ndond ya kushakam. Kupwa kwa chinech, Soo Hing ulondin anch: “Twamana chikas cha Yehova pa mulong winou. Chakin kamu, Ndiy ukat ‘kwakul kulembil kwetu.’”​—Kus. 65:3.

CHITIN RITIY MULONG WA KUKIMB NI KWITIY YAKUL YA YEHOVA

15. Yom ik yamukwasha nambaz umwing kujingunin anch malembil mend amakula?

¹⁵ Malembil metu kakatap kumakul mu mutapu wa pakampwil. Pakwez yakul tukata kutambul yawiy kamu tuswirikedining mulong wa kushal ashinshamena kud Tatukwetu wa mwiur. Chawiy shinshikinang yakul ya Yehova ku malembil mey. Nambaz Yoko wiyova anch Yehova kakatap kwakul ku malembil mend, chawiy wasambisha kufund yom yawonsu yamwitangay Yehova. Mu kusut kwa chisu, washinshikina yom yafunday ni wajingunina anch Yehova wakula ku yom yivud pakach pa yom yamwitay, ap yading yavuramedinay kal. Chisu ni chisu, tufanyidin kwiman ni kutongijokin mutapu ukatay Yehova kwakul ku malembil metu.​—Kus. 66:19, 20.

16. Mutapu ik tukutwisha kumekesh ritiy piur pa malembil? (Hebereu 11:6)

¹⁶ Tukat kumekesh ritiy kadiap kwau ching kusutin kumulembil Yehova, pakwez kand kusutin kwitiy yakul ya malembil metu chikalap nchik mutapu usadidinay mulong wa kutwakul. (Tang Hebereu 11:6.) Shinshikin chilakej cha Mike ni mukajend Chrissy. Ading ni rutong ra kuya kusadin ku Betel. Mike ulondin anch “Twizwisha formiler mu mivu yivud ni mukajam ni twamulembila Yehova tupamp ni tupamp piur pa rutong riner, pakwez katutazukap.” Mike ni Chrissy alama kashinsh anch Yehova wij chisu chiwanyidina mulong wa kuyisadin mu mudimu wend. Adandamena kusal yawonsu yading yitwishinau mu mudimu wa uchibol wa pakampwil kwindond kwadinga maswir nakash ni kukwash mu mudimu wa kutung. Nlel ad mu mudimu wa munyingumuk. Mike ulondin anch, “Yehova kakulangap chisu chawonsu ku malembil metu mu mutapu twading tuchingejidina, pakwez watwakula ni wasala mwamu mu mutapu upandakena kuwap ni utwading twakad kutongin.”

17-18. Kukwatijan ni Kuseng 86:6, 7, kashinsh ik tukutwisha kwikal nich?

¹⁷ Tang Kuseng 86:6, 7. Nfund a Kuseng David wading nich kashinsh anch Yehova wateshang ni kwakul ku malembil mend. Niyey ukutwish kwikal nich kashinsh mud kinak. Yilakej twisambina kal mu mutu wa mulong winou yatwinkish kal kashinsh anch Yehova ukutwish kutwinkish manangu ni usu tuswirikedina mulong wa kujijaman. Ukutwish kusadin dijuku dietu dia mu spiritu ap kand antu akad kumwifukwil ndiy nlel mulong wa kutukwash mu mitapu kanang.

¹⁸ Ap anch chisu chawonsu Yehova kakwilingap ku malembil metu mu mutapu tuchingejina, twij chakin kamu anch ukwakul. Ukutwinkish yom tukweta nich kuswir ni ukusal mwamu pa chisu tuyiswirikedina. Chawiy, dandamen kulembil nich ritiy, ni ikal nich kashinsh anch Yehova ukukwakul nlel ni ukuwanyish ‘maswir ma antu awonsu akweta mwom’ mwi ngand yisu yikweza.​—Kus. 145:16.