Ov yom ik ukulonda ni Mizilima?
1 Ov wapanap kal uman kuday Mizilima? Anch mwawiy, wamana chakin anch Amizilima akwet ritiy rijim mwi Nzamb. Pakwez, ij yikemp piur pa kwez kwa Paradis pa divu mud mwalondau aprofet a Yehova, ni tusotin kwisamb nau ya ruchingej riner. (1Tim. 2:3, 4) Jinsangu jilondwila jikutwish kukukwash kupan uman umwing uwamp.
2 Amizilima itiyidin mudiay Allah, ap Nzamb, ni itiyidin kand anch Muhamed (Mahomet) udi profet wa Nzamb. Koran udi buku wau utumbila, ni difukwil diau aditazukin anch Islam, dizu dirumburikina anch “kuziyil.” Koran ulejen anch makasu ni kwifukwil akish yidi yom yiyimp, anch Nzamb udi kusu umwing, anch kadiap kwend chikunku cha Usatu. Chikwau kand, ufundishining anch mupim ukufangap bwat, karung ka misiny, ni paradis wa mwiur. Amizilima itiyining anch Baibel didi Dizu dia Nzamb pakwez atongining anch amukarumuna, chad Koran, ndiy uchidi kusu mu rudim ramufundau nich pa kusambish, uchilamin kashinsh kawonsu.
3 Ikal murund, babal, ni ikal ni manangu: Anch wasambish misamb ni Mizilima, ikal murund ni kubabal. (Jnsw 25:15) Ijik anch yitiyij ya Amizilima yidi yijamina nakash ni yivud ya yitiyij yiney ayifundishay ku kan. Chawiy lel, kutongin mafundish ma difukwil ni kuyilej ayinau chidinga rusot ra Nzamb chidingap chikunku cha mafundish mau ma difukwil. (Rom 12:2) Chakwel kumukwash Mizilima, chidi cha usey kushimpish muchim ni kutesh.—1 Kor. 9:19-23.
4 Ipuk kusadin mazu makutwisha kumutongish Mizilima anch udi muntu wa mu Egliz umwing wa Win-Kristu. Lejan patok anch udap mwin Katolik ap mwin Mishon, ushalijadin nau. Isambina Baibel mud Buku wa Nzamb. Amizilima chikisiningau dizu “Mwan wa Nzamb,” chiwapidin kulik bil kudisadin ap kwisambin mutu wa mulong winou ching kamu anch kwez kwamekan kuya kurutu muspiritu. Pakwez, ukutwish kwisambin Yesu, mud profet ap muruu. Ipuk ntad. Anch waman anch muntu wisambinany nend wasambish kal kujiman, nich kalimish, tumbuk uya kapamp kamwing.
5 Chiwapidin kusu kwambamb ni muntu umwing pa ndond pa kwisamb ni chisak cha antu. Yisu yivud, chidi cha manangu anch muntu mband apana uman kud mukwau mband, n’ikundj kud mukwau ikundj. Pakwez yisu yishalijadin, chawiy lel chifanyidin kusadin yitongijok yiwamp. Chikwau kand, Amizilima avud kakatiningap yikatau kuman awiy mud yidjal yiburedina kalimish ap mutapu wa kwileng wa amband. Anambaz afanyidin kubabal pa chinech.—1 Kor. 10:31-33.
6 Milong ya kwisambin: Isambina mutapu wa kashinsh kujimb kwa Nzamb ni rukat rend. Pikil widjidjek kumulej anch udi mukaritiy wakin, anch kudi Nzamb umwing kusu (kudap Usatu), ni anch kwifukwil akish chiyipin. Isambina uyimp udia mu mangand nlel—jinjit, ruvundu ra asivil, rikis ra antu a michid yikwau, ni rubabek rimekena pakach pa antu avud afila mu kan anch adi in kwifukwil.
7 Broshir La direction venant de Dieu : le chemin qui mène au Paradis ukukwinkish yitongijok yikwau piur pa mitu ya milong yiukutwisha kusadin mulong wa kusambish misamb nau Amizilima. Amusadin mulong wa kuyikwash Amizilima ashicha ndond mukutwishau kwiyov mu wanipau mulong wa kwilej Baibel.
8 Chakwel kupan uman, ukutwish kulond anch:
◼ “Nikakusal usu nakash mulong wa kwisamb nau Amizilima. Natangin mulong wa difukwil dien, nitongin anch niyingin kulond anch Amizilima itiyidin mwi Nzamb umwing kusu wakin ni aprofet awonsu. [Chingel chakul.] Nisotin kwisambin ney uprofet umwing wa pakur ulejena anch divu dikwikal paradis. Ov nikutwish amboku kukutangin yafunday profet winou? [Tang Isay 11:6-9, NW.] Uprofet winou winvurishin mufund wa Koran ujimbwilau mu broshir winou.” Buril paj 9 wa broshir Direction venant de Dieu, ni tang mifund yishingwinau, yilondina anch antu atentamina akuswan divu. Anch kwamekan kusanger, dandamen ni mambamb nich kwisambin paragraf 7 kushik ku paragraf 9 pa paj ulondwilaku. Mushila broshir, ni ovijanany mulong wa kuchirikinamu kusu.—Piur pa mutapu ukwau wa kupan uman, tal Mudimu Wetu wa Want wa Rish 1998, paj 6, pagagraf 26.
9 Anch wamwit muntu kushinshikin broshir La direction venant de Dieu, chiwapidin kuyitazuk anch misamb, pa ndond pa kuyitazuk anch dilejan dia Baibel. Anch wapwishany broshir, mwin kwilej ukutwish kwikal tayad mulong wa kwilej broshir Nzamb Witin ap buku Connaissance. Mikand yikwau yidaku yirijekinau mulong wa Amizilima yidi trakt Le chemin du Paradis: Comment le trouver? ni broshir Le temps de la vraie soumission à Dieu.
10 Nich ronganyin ra ritiyij ya Uislam ni yovil yau, tukutwish kusadil manangu mu kutond kwetu mikand yitukupana kud Amizilima ni mutapu tukuyinkisha uman. Yehova adandamena kuyukish usu wetu tusadina mulong wa kuyikwash antu a mitapu yawonsu kutazuk pa dijin diend ni kupand.—Midimu 2:21.