Twijikeshany dijin dia Yehova pa divu pawonsu
1 Yesu payitumay in kwilej end kwikal atuman “djat ni kusudiedila mangand,” wading wayishila kal chilikej cha kulondul. (Midimu 1:8) Yikalap nchik chisu ap ndond yatanay antu, Yesu wisambina rutong ra Nzamb piur pa antu. Pichimwilikejina Yesu, chisak cha kashalapol wakin, chisadidin mitapu kushalijan yivud chakwel ‘kwijikesh dijin dia Yehova pa divu pawonsu.’—Isa. 12:4, 5, NW.
2 Yasalau pasak: Mu mivu ya kwinyim ey, adinga ni kupalangesh mafundish mu majurnal; abudisha “Photo—Drame de la Création” ni kumulejan ku mamiliyon ma antu; asadila miotak yadinga ni yijimbish mazu; ni asadila nakash fonograf, ni mu chisu chimwing, asadila kand radio—yawonsu yiney mulong wa kulejan rusangu ruwamp. Mwaning, pichuku pichuku atekining bil kashony pa kumanijan ni antu chakwel kuman mutapu wa kulondul kusanger kwadingau ni kumekesh. Chawiy lel, mudimu wa ku chikumbu ni chikumbu udi chakin mutapu umwing ufanyidina nakash mulong wa kwijikesh dijin dia Yehova ndond yawonsu.—Midimu 5:42.
3 Yisadinau katat pa chirung chetu: Nich yisu yikarumokina ey, mangand mashikedin ndond yimwing yikash, ni mu jindond jivud chikasiken kuyitan antu kwol kwau. Antu akemp kusu awiy asotina kwitekinaku chisu cha kutang ni kutongin yom ya muspiritu. Chawiy lel tufanyidin kwambatanish mudimu wetu nich mwikadil winou. Chikwau kand, chakwel kudandamen kuyendil antu ku chikumbu ni chikumbu pichuku pichuku, atukasikeshin kuya ndond yidiau ni kwikal ‘irijekina machuku mawonsu’ ku kwakul mulong wa ruchingej ritukweta. (1 Pi. 3:15) Chinech chirumburikin kusal usu wa kulejan (rusangu ruwamp) kud ambayetu a midimu, ambayetu a shikol, antu tusankena mwi njil, mu park ap ndond ya kwimikin miotak, ku makashiny ni makashiny, ni ndond yawonsu tukutwisha kuyitan antu. Nich ukwash wa Yehova, usu wetu wawonsu utusadila ukwikal ni mabuj mawamp. Ov usadining mudimu wa kuyishiken antu ndond yawonsu yidiau?
4 Tupakijany muntu ni muntu mwi njil yin yawonsu kwijikesh dijin dia Yehova mu teritwar wetu pichifanyidina kuchisal. Tukutwish kuman musangar ujim anch twasal mudimu wetu sens, pitutadina kud Yehova chakwel ayipwita antu a michim yitok.—Yohan 6:44.