Ov ukwet spiritu wa kwipan?

¹ Kujikitish mulong wa mutapu wipanay Yesu Kristu mulong wa antu kufanyidin kutubachik etu awonsu kusadin ukaliweny wetu ni usu wetu mwi njil yimwing ya kwipan. Mifund ya Baibel yitwitin anch: ‘Ipanany ayinen kudi Nzamb kwikal mudi yakupesh yikweta mwom, yidia yitumbila ya kumusangarish ndiy, mudimu umwing utumbila.’ (Rom 12:⁠1) Kwishinshikin chisu ni chisu kukez kukukwash kuman anch ukat kumekesh sens spiritu wa mutapu winou kulondwish ni yitwishishina mwikadil wey.

² Mu kukimb kwa ronganyin ra Baibel: Ov witekidin chisu cha kutang Baibel ni kwilej amwiney chisu ni chisu? Ov ukakulimish program winou? Ov chidi chaku chey kwirijek nawamp mulong wa yikumangan ya chikumangen? Anch udi mutu wa dijuku, ov ukwetany dilejan dimwing dia Baibel diakad kujing ni dijuku diey? Kusal yom yiney kukutwish kwit kupan chisu tusutishina ku kutal television ap ku kompyut ap mu kukimbol yom yikwau. Pakwez, kwikalap nchik kwipan kukemp usadina, ijik anch chisu usutishina nich Dizu dia Nzamb chikukwash kukutwal ku mwom wa chikupu! ​—⁠Yoh. 17:⁠3.

³ Mu kuyifundish aney: Chisu chiwamp mulong wa kusambish kwilej mutapu wa kwipan chidi pa wanikanch. Yifundisha anch kuding chisu cha kusengan, kufanyidin kand kwikal chisu cha kusal mudimu ni cha mijikit ya uteokrasia. (Efe. 6:⁠4) Yinkisha mudimu umwing wa ukwash wa kusal ku chikumbu. Tekaku program umwing wa kubudikin nau pamwing pakad kujing mu mudimu wa kulejan. Kasikeshin mafundish mey nich chilikej chey chiwamp.

⁴ Mu mijikit ya chikumangen: Chikumangen chikat kutambul ukwash anch muntu ni muntu udiamu ukat kwipan kwa kwikatin chakwel kusal yom mulong wa kuwap kwa awonsu. (Heb. 13:16) Ov chitwishikin kud ey kusutish chisu chilemp mu mudimu wa Want wa kulejan ni kwikalish in kwilej? Ov ukutwishap kusal mudimu wa kwikatin mulong wa kukwash muyej ap ipal, chitwishikin kuyikwash ap nich mutapu wa kushik ku yikumangan?

⁵ Kurutu kwa kupan yakupesh yipandakena kujimb ya mwom wend wa umuntu, Yesu wayinka in kwilej end chiyul cha kutek mes mau pa yisakin ya Want, ni kutek yom yikwau yawonsu pa ndond ya kaad mu mwom. (Mat. 6:33) Kulondul spiritu wa kwipan mud winou kukez kutuletin musangar ujim anch tudandamedin kumusadin Yehova nich musangar.