Chom Ik Chiukeza Kupan Chakwel Upanda?

“Chom ik chikez kapanay muntu akola kand nich kupand kwend?”—MAT. 16:26.

1. Mulong wak Yesu walika kupup kwa Pita?

MUPOSTOL PITA washimoka ku yom yateshay. Ntakel wend mukatish, Yesu Kristu, walonda kamu “nawamp patok” anch ukuman mar kurutu oku ni kufa! Chadi Pita, wamwakula—nich chitongijok chiwamp—wamupup Yesu, wamulej anch: “Chikapul chiya mwa kudi ey Mwant; chinech kangal chikasuta kudi ey.” Yesu wakarumuka wamutal Pita ni wayital kand in kwilej akwau. Pamwing niyawiy adinga nich chitongijok chawiy chimwing. Kupwa wamwel Pita anch: “Suta kwinyim kwam, Satan, ey udi chom cha kwimpwakesh am; kiukat kuvurikip yom ya Nzamb, ching ya antu.”—Marko 8:32, 33; Mat. 16:21-23.

2. Mutapu ik warumburilay Yesu pa kwikal mwin kwilej wakin?

² Mazu matakelay kulond Yesu madinga mafanyidin kumukwash Pita amana diyingishin ku chisal cha usu chasadinay Yesu mulong wa kupup kwinoku. Yesu “watazuka chisak nau in kwilej” wayel anch: “Anch muntu wel anch anlondul panyim pam, ilika bil amwinend, azambul [mutond wend wa mar, NW], alondul lel. Mulong wawonsu ukela anch achidij mwom wend, ukez kaushadish; ni wawonsu ukeza kashadish mwom wend mulong wa kwingambat am ni rusangu ruwamp, akez kauchidij.” (Marko 8:34, 35) Yesu wasadina dizu “mwom.” Kichadingap anch, mulong wading usotin kupan mwom wend pakwez wamekesha anch ay akumulondula afanyidin niyawiy kwirijek mulong wa kupan mwom wau mu mudimu wa Nzamb. Anch asal mwamu, akutambul difut diwamp.—Tang Mateu 16:27.

3. (a) Yesu wayipula in kumutesh yipul ik? (b) Mu mutapu ik chipul cha Yesu cha kaad chayivurisha in kumutesh end?

³ Pa mulong mudi winou, Yesu wipula yipul ya usey yaad anch: “Muntu ukutanuku ik lel anch wisak ngand ya kabuj, ndiy washadishiluku mwom wend?” ni, “Ing chom ik chikupanay muntu kukol nich mwom wend?” (Marko 8:36, 37) Chakul ku chipul cha kusambish chading chiyikasikedin antu. kichidiapu cha kutaninamu mulong wa muntu awina ngand ya kabuj anch washadish mwom wend. Kwikal nich yom kuding kwa usey anch muntu usangaredin mwom. Chipul cha kaad cha Yesu chadinga anch: “Ing chom ik chikupanay muntu kukol nich mwom wend?” yiney yayivurisha in kumutesh end mulong wa uyimp wasalay Satan mu machuku ma Yob: “Yom yawonsu yakwetay muntu ukuyipan mulong wa kuchidij mwom wend!” (Yob 2:4) Kudi ay akad kumwifukwil Yehova, mazu ma Satan mading kamu makin. Avud akutwish kusal chom kanang, akutwish kujip mbil yimwing, mulong wa kushal mwom. Pakwez in Kristu, akat kuman yom mutapu ukwau.

4. Mulong wak yipul ya Yesu yikwet kamu kurumburik kupandakena padiau in Kristu?

⁴ Twij anch Yesu kezap pansh mulong wa kupan ukash wa mujimbu ap nfalang ni mwom ulemp mu mangand minam. Pakwez weza kutwazuril njil chakwel tutwisha kushakam chikupu mwi ngand yisu, ni kwikal nich ruchingej ra mwom wa chikupu yawiy yiney yikweta usey. (Yoh. 3:16) Mwin Kristu ufanyidin kovu kurumburik kwa chipul cha kusambish cha Yesu chilondila anch, “Muntu ukutanuku ik lel anch wisak ngand ya kabuj, ndiy washadishiluku mwom wend?” Kwakul kudi anch, kwikil kutaninamu. (1 Yoh. 2:15-17) Chakwel kutukwash kwakul ku chipul cha kaad cha Yesu, tufanyidin kwiyipul ayinetu, ‘Kapamp kinch niswirikedina kusal mausu katat mulong wa kutek ruchingej ram ra mwom mwi ngand yisu?’ Yakul yetu ku chipul chinech, yikumeken mu mwom wetu utudia nich, yikumekesh kand anch tukwet ruchingej rikash mu michim yetu.—Isikesh Yohan 12:25.

5. Mutapu ik tukutwisha kutambul chipan cha mwom wa chikupu?

⁵ Mwawiy, Yesu kalondap mulong wa kupat mwom wa chikupu anch chidi chom chikash. Mwom—ap anch udi kwau wiswimp mu ditenchik dia yom dined—chidi chipan. Tukutwishap twaulondul nayimp ap kusal chom chikutwisha chauyipish. Njil yimwing tukutwisha kutambwil chipan chinech cha mwom wa chikupu chidi cha kutek “ritiy ra mu Yesu Kristu” ni Yehova, ukata kuyifut “uruu kudi awiy akata kumusot.” (Gal. 2:16; Heb. 11:6) Ap mwamu, ritiy rifanyidin kumeken mu yisal, mulong “ritiy rakad midimu rufil.” (Yak. 2:26) Anch, twatongijokin pa chipul cha Yesu, tukutwish kusal nawamp anch twashinshikin kamu anch kapamp kinch tuswirikedining kulik ditenchik dia yom dinend ni kwijik yitufanyidina kusal mu mudimu wa Yehova tukutwish kumekesh ritiy retu anch ridi rom.

“Kristu Kisangarishap Amwinend”

6. Chom ik chadinga cha usey kudi Yesu?

⁶ Pa ndond pa kwitek mulong wa kutambul yom yaletanga mangand machuku minima, Yesu wateka usey pa yom ni walika yoziu ya kutongamin pa yom ya ku mujimbu. Mwom wend wadinga mulong wa mulambu ni kuziyin kudi Nzamb. Pakad kwisangarish amwinend, walonda anch: “Nikat kusal machuku mawonsu yom ya kumushimek [Nzamb].” (Yoh. 8:29) Tupamp twinch twasalangay Yesu mulong wa kumutumbish Nzamb?

7, 8. (a) Mulambu ik wapanay Yesu, ni mutapu ik wamufutau? (b) Chipul ik tukutwisha kwiyipul?

⁷ Mu chisu chikwau, Yesu wayileja in kwilej end anch: “Mwan a muntu kezilap ni kusadish pakwez ni kusadil, ni kupan kupand kwend kuyikingiluku avud.” (Mat. 20:28) Chisu kamu chasambishay Yesu kuyibabesh in kumulondul end anch ufanyidin machuku ma kurutu kupan “mwom wend,” Pita wamuleja chakwel ikala udimukina amwinend. Pakwez, Yesu wajijamana. Waswirikena kamu kupan mwom wend, mwom wend wa ukauntu utentamina, mulong wa an a antu. Mudi chibudikin mulong wa mwom wend wakad kwitongamin, mashakamin ma Yesu ma kurutu mading makin. Amusangula ni “amuzambwila ku chikas cha katatuku cha Nzamb.” (Mid. 2:32, 33) Chikutwish chikal chilikej chipandakena mulong wetwetu.

⁸ Mupostol Paul wayiyula in Kristu a ku Rome anch ‘kangal isangarisha’ ayinau ni wayivurisha anch ap “Kristu kisangarishap amwinend.” (Rome 15:1-3) Pa chinech, mu chipim ik tukutwisha kusadil chiyul cha mupostol ni kwipan ayinetu mu kumwimburij Kristu?

Yehova Uswiridin Kuwap Kwetu

9. Yom ik yikutwishay kusal mwin Kristu anch wipan amwinend kudi Nzamb?

⁹ Mu Isarel wa pakur, Chijil cha Moses chadinga chilejen anch mwin Hebereu wadinga musuk adinga afanyidin kumulikishaku anch wawanish mivu sambwad ap mu muvu wa Musangar. Pa chinech, adinga kand nich kutond kukwau. Anch musuk umukatin mwant wend, ukutwish kwend kutond kushal musuk mu mwom wend win wawonsu ku chikumbu cha mwant wend. (Tang Kuvurik Yijil 15:12, 16, 17.) Niyetu tukat kusalang kutond kumwing chisu tukata kwipan kudiay Nzamb. Twitiyijin kamu kusal rusot ra Nzamb, pakad kulondul yitongijok yetu. Mu kusalang mwamu, tukat kumekesh rukat rikurikina kudiay Yehova ni maswir ma kumusadin kamu chikupu.

10. Mwinjil ik tudia etu antu a Nzamb, ni mutapu ik yikusadishap manangu metu ni yisal yetu?

¹⁰ Anch ukat kwilejang Bibil nau Atuman a Yehova ni ukat kulejanang rusang ruwamp ni kukumanganang ku yikumangan ya win Kristu, tukukasikeshin udandamena kusal mwamu. Tuchingejin anch kurutu oku ukwiyov kamu kwipan amwiney kudiay Yehova ni ukwipul chipul chipulau Filip kudi mwin Etiop anch: “Chom ik chikwinkangesha am kwibabatish?” (Mid. 8:35, 36) Urund wey nend Nzamb udi mudi wa in Kristu afundinay Paul anch: “Kiudianyip yen ayinen; mulong akulandilany kal nich usey ukash.” (1 Kor. 6:19, 20) Ap anch ruchingej retu ridi ra kuya mwiur ap ra kushakam pansh, anch twipan kamu ayinetu kudiay Yehova, tukumekesh kamu anch udi Iwetu. Chidi cha usey mudi ik, kulik maswir ma kwitongamin ni “kangal wikalany aswik a muntu”! (1 Kor. 7:23) Didi dilau mudi ik dia kwikal kashalapol ushinshamena wa Yehova chakwel atusadina nich musangar!

11. Mulambu ik ufanyidinau kupan in Kristu ni urumburishin chom ik, kulondwish mutapu mu urumburilau mu milambu yapanangau mu Chijil cha Moses?

¹¹ Paul wayibabesha anamakwend in kwitiyij anch panany, “Mijimbu yen kwikal yakupesh yom, yitumbila, ni yirijekina kudi Nzamb, kwawiy kusadil kwen kwa [s]piritu.” (Rome 12:1) Mazu minam mayivurisha in Kristu in Yuda mulong wa milambu yapanangau mu difukwil diau kurutu kwa kwikal in kwilej a Yesu. Eza kand kwijik anch mu Chijil cha Moses, annam alambulangau pa chintamb mulong wa Yehova adinga kamu awanyidina nawamp. Nnam wadinga muyimp kamwitiyijangapu. (Mal. 1:8, 13) Chawiy kand chimwing kudi etu patukata kupanang mijimbu yetu ‘yakupesh yikweta mwom.’ Tukat kumwinkish Yehova yiwamp yetu, kiyidingap yikemp patukata kuwanyish maswir metu ayinetu. Anch twipan ayinetu kudiay Nzamb, tukat kumwinkishang kamu “mwom” yetu—ni mausu metu, ni yom yetu ya ku mujimbu, ni kutwish kwetu. (Kol. 3:23) Mutapu ik tukuyisadina mu mwom wetu?

Sadin Chisu Chey Nich Manangu

12, 13. Njil ik yimwing yitukutwisha kupanin yiwamp yetu kudi Yehova?

¹² Njil yimwing ya kumwinkishin Yehova yiwamp yetu yidi ya kusadin chisu chetu nich manangu. (Tang Efes 5:15, 16.) Yiney yovikeshin kwikal mwin kwilam. Kusadish kudiokila mu mangand minam nich kuburen kutentam kutwaswana kal kutubachikining kusadin chisu ching kusu mulong wa misangar yetu ap kand mulong wa yisakin yetu. Chimeken kamu anch, “kudi chirung cha yom yawonsu,” kuwejamu kand kwiswedish kwetu kwa misangar ni midimu yetu tukata kusalang ku yisend ya win Kristu. (Mul. 3:1) Pa chinech, mwin Kristu wipanina kal uswiridining kushal wisikena ni kusadin chisu chend nich manangu.

¹³ Chisu chayay Paul kuyital in ku Aten, wamana anch, “In Aten ni aeny ading kwinikwa ni kusutishiluku muten wau, kadingap ni mudimu ukwau, pakwez ching wa kulejan ni kutesh yom yisu.” (Mid. 17:21) Nlel kand, antu avud ashadishin kand chisu chau. Kwipuwangej kwa katat mudi kutal televizion, kutal masengan ma video, ap kand kusadin Internet. Kudi masengan mavud makutwisha kamu kutukwat chisu nakash. Anch twipanaku kamu, tukutwish kukepish maswir metu ma muspiritu. Tufanyidin kwijik anch tukwet chisu chitufanyidina kusal mulong wa “kulamany yom yiwanyidina”—yom yilondilau mulong wa kumusadin Yehova.—Filip. 1:9, 10.

14. Yipul ik yitufanyidina kamu kushinshikin?

¹⁴ Pa chinech, paudia kashalapol wipanina kal kudi Yehova, iyipulap amwiney anch, ‘Program wam wa dichuku ukweting chisu cha kutang Bibil, kutongijokin, ni malembil?’ (Kus. 77:12; 119:97; 1 Tes. 5:17) ‘Nikat kwitekinang chisu mulong wa kurijek yikumangan ya win Kristu? Nikat kuyikasikesh akwetu mulong wa kupanang yirumburil mu chikumangan?’ (Kus. 122:1; Heb. 2:12) Dizu dia Nzamb dilondin anch Paul ni arund nend ipananga “ading ni kulond nich kujijaman mu Mwant.” (Mid. 14:3) Ukutwish niyey kutenchik chakwel wipana nakash, “chisu chilemp,” mu mudimu wa kulejan, ap ukutwish kusal mudi chibol?—Tang Hebereu 13:15.

15. Mutapu ik usadidilau amakurump yisu yau nich manangu?

¹⁵ Chisu chayay mupostol Paul ni antu akwau ashinshamena mulong wa kutal chikumangen cha win Kristu chadinga mu Atiok, “awiy ashakama chisu chimwing nau in kwilej” chakwel ayikasikesha. (Mid. 14:28) Amakurump ayikumangen akweta rukat nlel unou niyawiy asadedining yisu yau mulong wa kuyikasikesh akwau. Payitadina mudimu wau wa mu chingand, amakurump a yikumangen asadining mudimu nakash mulong wa kudish amikoku, kukimb ashadikina, kukwash ayedina ni kulam kand yisend yikwau yivud yidia mukach ka chikumangen. Anch udi mukadivar wabatishau kal, ukutwishap kusal usu chakwel usala mudimu winou?

16. Jinjil ik jimwing tukutwisha “tuyisadilany . . . nawamp, tupandikesh kuyisadil in ritiy retu nawamp”?

¹⁶ Avud ezin kutan musangar mulong wa kupanang ukwash kudi antu ayedina ap ashadishina yom yau mulong wa mar ma chitangil. Pa chinech, nambaz umwing wadinga nich mivu 65 wasadinanga ku Bethel chad wenda weny ulemp mulong wa kusal mudi mwin kwisotin chakwel akwasha mudimu. Mutapu ik wasadilay chisu chend nich manangu? Ulondin mwamu: “Pa chinech am nadingap nich yovil yikwau, yadinga ntumb kudi am kusal yawonsu niswiridina. Natambulang dikasikesh divud namanang ritiy rikash ra akadivar nau anambaz adinga amena mar mulong wa kushadish yom yau ya ku mujimbu.” Pakwez, kweza tunan twa in kukwash a ngand ya kabuj mulong wa kutung Yot ya Want ni Yot ya Yitentam. Mu kwipanang mu mudimu mudi winou, twipana kamu chipandakena “tuyisadilany . . . nawamp, tupandikesh kuyisadil in ritiy retu nawamp.”—Gal. 6:10.

“Nidi Nen Machuku Mawonsu”

17. Yom ik ukutwisha kupan mu kuswimp chakwel wikala ni mwom wa chikupu?

¹⁷ Dirijek dia antu didia kulemp nend Nzamb didi piswimp ni kupwa. Twijap kamu nawamp anch chikusadik chisu ik. Pakwez, twij anch “kwashal kal chisu chiswimp” ni “yom ya mangand minam yikat kusut.” (Tang 1 Korint 7:29-31.) Kuwejinaku kand ku chipul cha Yesu cha usey chipulay anch: “Muntu ukutanuku ik lel anch wisak ngand ya kabuj, ndiy washadishiluku mwom wend?” Tukutwish kudandamen kusal mausu mawonsu matwitinay Yehova chakwel tutambula “kupand kwakin.” (1 Tim. 6:19) Komb, chidi cha usey ku dipup dia Yesu dia ‘kudandamen kamu kumulondul’ ni ‘kutek pa ndond ya kusambish want.’—Mat. 6:31-33; 24:13.

18. Kashinsh ik tukweta ni mulong wak?

¹⁸ Kukwat mipak ya kumulondul Yesu chidiap chom chiswapela, ni chidi chakin kubabesh kwa Yesu, amwing ezin kushadish mwom yau mu ditenchik dined dia yom. Pakwez, mudi Yesu kand, tukat kwiyepang yoziu ‘ku kwikalang adimukina.’ Tukwet ritiy nich kashinsh keza kupanay kand mu mivu chitot yakusambish kudi in kumulondul end azizidilau many: “Nidi nen machuku mawonsu, chikupu ni kwisudiel kwa mangand.” (Mat. 28:20) Komb pa chinech, anch chitwishikin, tusadinany chisu chetu ni mikadil yetu mu mudimu utumbila. Anch twasal mwamu, tukumekesh kamu anch tumuchingejidin Yehova ni ukutuking ku mar majim ap kututenchik kand chakwel twikal ni mwom mwi ngand yisu. (Heb. 6:10) Pa chinech tukutwish kuman mutapu tukwatina usey wa chipan cha mwom.

Mutapu ik Ukwakula?

• Mutapu ik wipanay Yesu chipandakena mulong wa kumusadin Nzamb ni antu?

• Mutapu ik ukwitunay muntu amwinend, ni yom ik yikusalay?

• Mu Isarel wa pakur, mulambu ik umwing witiyijangay Yehova, ni mutapu ik utukwashina nlel unou?

• Mu jinjil ik tukutwisha kusadin chisu chetu nich manangu?

[Chipich chidia pa paj wa 26]

Yesu wasalanga chisu chawonsu yom mulong wa kumusangaresh Nzamb

[Chipich chidia pa paj wa 28]

In Isarel asangera kupan yiwamp yau mulong wa kukwash difukwil diakin

[Chipich chidia pa paj wa 29]

Tukumusangaresh Nzamb mu kusadinang chisu chetu nich manangu