Mutapu ik tufanyidina kutakel yikumangan ya mudimu wa chingand?

¹ Chikumangan cha mudimu wa chingand didi ditenchik dia chikumangen. Chifanyidin kuchisutish mu mutapu umwing uwanyidina ni kuchitakel mutapu ufanyidina. Mwikadil ni yidjal ya antu akumangena ku chikumangan chinech yifanyidin kwikal chilik chimwing nich yikumangan yikwau ya chikumangen. Chikumangan chikusambish pa chisu, ap anch twij anch antu akwau akushik chisu chasutang kal. Muntu utondinau mulong wa kuchitakel ukwirijek nawamp, chakwel kupan yitongijok yakusadin yikutwishau kusadil dichuku dinidia mu mudimu. Mudimu Wetu wa Want ukat kupanang jinsangu ni yiyul ya usey mulong wa chikumangan chinech.

² Chidap cha usey kushinshikin mufund wa dichuku ku chikumangan chin chawonsu cha chingand, pakwez anch umeken mud wambaten mulong wa kukasikesh mu kulejan, akutwish kuusadil mu mutapu umwing wiswimp. Chifanyidin kukumangan kurutu kwa muten chakwel kwipuk kusutish chisu chitekinau mulong wa mudimu wa kulejan. Chifanyidinap kusutish aminit 10 kushik ku aminit 15. Pakwez, chikutwish kwikal chiswimp nakash anch achisal kupwa kwa kukumangan kwa chikumangen. Chifanyidin kand kulimish program wa ayibol; mulong chikumangan chimwing chilemp ap chisadinau chisu chasutang kal chikutwish kwikal chikash kud antu akweta uvud kampand wa asaa akushiken mu mudimu wa kulejan.

³ Chifanyidin kwangen mwin kulejan mwawonsu chikunku cha teritwar. Mwaning, amwing akutwish kwikal irijekang kal ayinau chakwel kusal kuchirikinamu kusu ap kutakel malejan ma Baibel, ni kulik kuswir kwa kwikal ni teritwar.

⁴ Awonsu akumangena afanyidin kuta matu ni kusadil pamwing kushik ni pakupwishinau kwanganijan ni kulembil. Antu irijekang kal kusal mudimu kampand akuchijikish. Kwangan in kulejan ni kupan kwa materitwar chifanyidin kuyisal kurutu kwa kupwish chikumangan, ni chifanyidinap kuchisadil mwi ndond mukatau kwimikin miotak ap pibur. Chikumangan cha mudimu wa chingand chifanyidin kupwa nich dilembil. Anch etu awonsu twalondul yiyul yiney, tukutwish kuchingejin anch Yehova ukuyukish nakash mujikit wetu wa kulejan tukusala.