“Kitukutwishap kulik kulond”
1 Yesu Kristu ndiy utakedila piswimp nakash mudimu wa kulejan. (Mat. 28:20; Marko 13:10) Ap anch kudi piswimp miliyon musamban ya in kulejan akata kupan uman mwi ngand 234, tufanyidinap kutong anch mudimu wetu wa kupan uman wapwil kal. Ching kamu ni pakulondilay Nzamb anch mudimu winou wawanyin kal, “kitukutwishap kulik kulond” yom yitwileja.—Midimu 4:20.
2 Tuchingejinany spiritu wa Nzamb: Satan ukat kusal usu wend wawonsu chakwel kutuchirish kwinyim. (Kuj. 12:17) Mujimbu wetu wakad kuwanyin ni wawiy ukat kutumesh mar nich milong yivud yivud. Yom mud yiney yikutwish kuzuwol manangu metu ku mudimu upandakena usey wa kulejan. Pakwez, anch twatek ruchingej retu mudi Yehova, spiritu wend ukez kutukwash kurish ni chikangesh chin chawonsu.
3 Chikumangen cha Ukristu cha mu mivu chitot ya kusambish padingau ni kuchizengol nakash, akadivar amwita Nzamb ukwash wa kudandamen kulond dizu diend nich mushiku wawonsu. Yehova wakula ku malembil mau, wayinkisha spiritu wend ni kuyinkish mushiku ni kujijaman kwadingau nich kuswir chakwel kudandamen kulejan. Mud chibudikin, adandamena pakad kuziy kulejan rusangu ruwamp nich mushiku.—Midimu 4:29, 31; 5:42.
4 Kangal wakam kulond kuyimp: Yitongijok ya antu avud ap makasu mijikena piur petu yikutwish kutwakamish. Pakwez, tuvurikany kulond pakad wom kwa Pita ni apostol akwau kurutu kwa dirumburish dijim (Sanedrin), kulond kufundinau mu Midimu 5:29-32. Mud kamu mwalonday mulej wa Yijil Gamaliel, mudimu wa Nzamb kakutwishap kuukangesh bwat. Tukatap kuusal ku usu wetu ayinetu. Mudimu winou ujim ukwet ukwash wa Nzamb, ndiy kusu ukutwisha kuusadish!—Zak. 4:6, NW.
5 Tumwitany Yehova dichuku ni dichuku spiritu wend chakwel atukwasha kulejan rusangu ruwamp nich mushiku. Likany tulondany, mud mwalonday Jeremiy, anch uruu wa Want udi kamu mud kasu katemishina mafup metu. (Jer. 20:9, NW) Tukutwishap kulik kulond!