Tudandamenany Kulejan Dizu dia Nzamb Pakad Wom
1 Chitudia atushalapol in Kristu, twij anch antu awonsu kakezap kutesh kulejan kwetu. (Mat. 10:14) Pakwez, tukatap kulikin yakul yiyimp ya antu amwing yitukangesh kulejan rusangu ruwamp. (Jinsw. 29:25) Yom ik yitukwashina kudandamen kulejan Dizu dia Nzamb pakad wom?
2 Mupostol Paul wabaza “usey ujim upandakena wa kumwijik Kristu Yesu.” Chinech chamubachika ndiy kulond nich “kushinshik kukash.” (Filp. 3:8, Manswik Masu; 1 Tes. 1:5) Ap anch amwing amana uruu walejanay mud wa usup, ndiy wijika anch wadinga “usu wa Nzamb ku dipandish dia muntu wawonsu ukwitiya.” (Rom 1:16) Chawiy lel, ap chisu chamuzengolau, ndiy wadandamena ‘kulond pakad wom ku ulabu wa Yehova.’—Midimu 14:1-7; 20:18-21, 24.
3 Musul Wetu wa Usu: Kichadingap mu usu wend watwishinay Paul amwinend kupan uman pakad wom. Palonday mulong wa amwinend ni Silas, Paul wafunda anch: ‘Kupwa kwa kutumesh bil mar ni kutukwatish usany mu Filip, twajijamana ku ukwash wa Nzamb wetu chakwel tukulejany en rusangu ruwamp ra Nzamb nich kurish kuvud.’ (1 Tes. 2:2; Midimu 16:12, 37) Chikwau kand, ap anch amukasa mu Rom, Paul wita anch akwau alembil mulong wendendiy chakwel atwisha kudandamen kulejan rusangu ruwamp ‘patok wakad wom mud mufanyidinay kulond.’ (Ef. 6:18-20) Chengaminay padiay Yehova pa ndond pa kwiyengamin amwinend, Paul watwisha kudandamen kulejan Dizu dia Nzamb pakad wom.—2 Kor. 4:7; Filp. 4:13.
4 Chidi kand chakin nlel unou. Mukadivar umwing wamana anch chikasiken nakash kwimekesh mud umwing wa Atuman a Yehova kwi ndond yend ya mudimu ni kulejan kwa kukashimun walembila pa mulong winou ni wasambisha kupan uman. Cha kusambish mbay wa mudimu walika usu wasalay, pakwez kujimbul kwa ruchingej ra divumbuk kwashikija ku dilejan dia Bibil. Kudiosh kamu pinipa, mukadivar wasadila mutapu wawonsu mulong wa kupan uman. Kwi ndond yend yikwau ya mudimu, ndiy wakwasha antu 34 kutambul dibatish mu chirung cha mivu 14. Tukutwish ni yetu kuchingej anch Yehova ukutukasikesh ‘kudandamen kululejan dizu diend pakad wom.’—Midimu 4:29.