‘Lejan Dizu Dia Nzamb Pakad Wom’

“Izula nich [M]mwiku [U]utumbila, chad asambisha kulejan mazu ma Nzamb wakad wom.”—MIDIMU 4:31 (MN).

1, 2. Mulong wak tufanyidina kwikasikesh mulong wa kusong mabuj mu mudimu wetu?

MACHUKU masatu kurutu kwa rufu rend, Yesu wayileja in kwilej end anch: “Katumb kawamp ka want akez kukalejan ku mangand mawonsu, kakez kikal uman kudi michid yawonsu; chawiy lel disudiel chidikweza.” Kurutu kwend kwa kuya mwiur, Yesu wavumbulau wayinkisha in kwilej end mudimu wa ‘kuyikadish michid yawonsu in kwilej, ni kuyilej kusal yom yawonsu yayilejay.’ Wayikana anch ukwikal nau “machuku mawonsu, chikupu ni kwisudiel kwa mangand.”—Mat. 24:14; 26:1, 2; 28:19, 20.

² Chitudia Atuman a Yehova, tupanin ukwash ku mudimu umwing wasambisha mu chitot cha mivu cha kusambish. Kwikil mudimu ukwau wisikena mu usey nich mudimu wa kupandish mwom wa kulejan Want ni kwikadish in kwilej. Chawiy lel, chidi cha usey mudi ik kwikal asongina mabuj mu mudimu wetu! Mu mutu wa mulong winou, tukuman mutapu umutakel wa mwiku utumbila utukwashina kulejan pakad wom mu mudimu wa kulejan. Mitu ya milong yilondwila yikulejan mutapu mwiku wa Yehova ukutwisha kututakel chakwel tulejana nich nkeu, ni pakad kujing.

Tufanyidin Kwikal Akad Wom

3. Mulong wak kusal mudim wa kulejan Want kwitin kulond wakad wom?

³ Mudimu wetu wa kulejan Want utwinkishinay Nzamb chidi chisend chipandakena kujimb. Pakwez uburedina yikokujol. Pitiyijinau antu amwing rusangu ruwamp ra Want wa Nzamb, avud adi mudi antu ashakama pa machuku ma Nowa. Yesu walonda anch “kijikap ni pimezina mabeb mayijiyish awonsu shitit.” (Mat. 24:38, 39) Kupwa kudi akwau akata kutusupish ap kutupompat. (2 Pita 3:3) Rupompat rikutwish radiokal kud antakel, kud ambay a shikol ap ambay a mudimu, ap kand kudiokal ku yid ya piswimp mu dijuku. Kuwejaku pa chinech kuziy kwetu ayinetu, mud usany ni wom anch mulong alikin kututesh. Milong yivud yikutwish kusal chitukasikena “kulond patok wakad wom” ni kulond dizu dia Nzamb “wakad wom.” (Efes 6:19, 20, MM) Kudandamen mu kulond dizu dia Nzamb kwitin kwikal wakad wom. Chom ik chikutwisha kutukwash kulond wakad wom?

4. (a) Wakad wom Chom ik? (b) Mutapu ik wajijamanay kambuy Paul kwikal wakad wom chakwel kuyilej in Tesalonika?

⁴ Dizu dia Ugrek dikarumwinau anch “wakad wom” dirumburikin “kulond patok, nich uyakin, zwaang.” Dizu dined dikwet chitongijok cha “kwikasikesh, ruchingej, . . . kulik kwov wom.” Kwikal wakad wom kurumburikinap kuburen nkeu ap kuchinshik muchim. (Kol. 4:6) Pitudia akad wom, tufanyidin kand kwikal nich chisambu ni antu awonsu. (Rome 12:18) Chikwau kand, pitulejena rusangu ruwamp ra Want wa Nzamb, tufanyidin kushal pakach pa kwikal wakad wom ni nkeu chakwel kangal twamurumbukin pakad kwijik muntu kanang utulejina. Chakin, chakwel kwikal wakad wom, tufanyidin kukudish ngikadil yikwau yitina kusal usu. Kwikal wakad wom kwa mutapu winou, kukatap kwez ku usu wetu ayinetu. Kupwa kwa ‘kuyikwatish usany ku filipoi,’ Paul ni arunend, ov, mutapu ik ‘wajijamanau wakad wom’ chakwel kuyilej in Tesalonika? Paul wafunda anch “Mwi Nzamb wetu.” (Tang 1 Tesalonika 2:2.) Yehova Nzamb ukutwish kutupwish wom ni kutwikadish chilik chimwing akad wom.

5. Mutapu ik Yehova wayikadishay Pita, Yohan ni in kwilej akwau akad wom?

⁵ Payikojau kud ‘in kutakel [a antu] ni amakurup ni in kufund,’ Kambuy Pita ni Yohan aakula alond anch: “Chitentamina ku mes kwa Nzamb chisu, kuziyil kudi en chipandakenamu Nzamb? rumburilay ayinen. Etu kitukutwishap ching kulond yom yitwamana ni yitwova.” Pa ndond pa kumulembil Nzamb chakwel imika rupompat, awiy ni ambay nau akaritiy azambwish dizu diau kudi Nzamb, ni kulond anch: ‘Yehova, tal pa kupup kwau, ni itwinkisha etu atushalapol ey ukash wa kulond dizu diey wakad wom.’ (Mid. 4:5, 19, 20, 29) Mutapu ik wakulay Yehova ku malembil mau? (Tang Midimu 4:31.) Yehova wayikwasha kujijaman wakad wom kusutil ku mwiku wend. Mwiku wa Nzamb ukutwish kutusadil chilik chimwing. Pa chinech, mutapu ik tukutwisha kutambul mwiku wa Nzamb ni kututakel kud mwiku wa Nzamb mu mudimu wetu?

Ikal Wakad Wom

6, 7. Wisu mutapu ujim ya kutambul kapamp kamwing spiritu wa Nzamb? Pan chilikej.

⁶ Mutapu ujim wa kutambul mwiku wa Nzamb kudi kuwit. Yesu wayileja in kumutesh anch: “Anch en lel ayimp wijany mwa kupan yom yiwamp kudi anen, ing lel Tatukwen wa mwiur kakupandikeshimup kupan [S]piritu [U]tumbila kudi awiy akata kumwit?” (Luka 11:13) Chakin kamu, tufanyidin kudandamen kulembil mulong wa spiritu utumbila. Anch milad yimwing ya mudimu—kupan uman mwinjil, kulejan kwa kukashimwish, ap kusal mudimu mwi ndond jisakidinau—yitwovishin wom, tufanyidin kumwit Yehova spiritu wend ni kumulej atukwasha nich kujijaman wakad wom kuwanyidina.—1 Tes. 5:17.

⁷ Mwawiy mwasalay Rosa, nambaz mwin Kristu.a Dichuku dimwing padingay Rosa kwindond yend ya mudimu, mbay nend mulej usadila pamwing nend wadinga ni kutang raport wa mashikol makwau piur pa kuyimesh an mar. Mulej wova mutu wamurumbangan piur pa yom yatangay ni watoya anch, “Mangand minam makushiken lel kwisu?” Rosa kelap kusutish chisu mudi chinech cha kupan uman. Chom ik chasalay chakwel ikasikesha kwikal nich mushiku wa kusambish mambamb? Rosa walonda anch “Namulembila Yehova ni kumwit spiritu wend chakwel ankwasha.” Watwisha kupan uman uwamp ni kwovijan chakwel kwambambin yivud piur pa mutu wa mulong. Tushinshikina kand piur pa Milane, mwan mband wa mivu yitan, ushicha mu Cité wa New York. Milane ulondin anch: “kurutu kwa kuya ku shikol, twanding ni maku ni kumulembilang Yehova chisu ni chisu.” Yom ik yadingau ni kulembil? Kukankaman chakwel Milane ikala ku mutambu wend ni kulond piur pa Nzamb wend! Makwend walonda anch “Chinech chamukwasha Milane chakwel arumburil yitiyij yend piur pa machuku ma kuvadik ni machuku ma misambu ni kumukangesh kwinung pawing nau chisu cha misambu yiney.” Ov, chilikej chinech chimekeshinap anch mukusal usu wa kuburen wom, Nzamb ukwakul ku malembil?

8. Chom ik tukutwisha kwilejin kudiay muprofet Jeremiy piur pa kwikal wakad wom?

⁸ Tongijokin nakash pa yom yamukwasha muprofet Jeremiy kwikal wakad wom. Pamutekay kudi Yehova kwikal muprofet wa michid, Jeremiy wa akula anch: “Kinijap mutapu wa kulond, mulong nichidi kwam nsand.” (Jer. 1:4-6) Pakwez, mu kusut kwa chisu, Jeremiy wikala mwin kujijaman ni usu mu mujikit wend wa kulejan ni antu avud amumana mudi chisup ukat kulondin ching kusu piur pa yinship ya mar. (Jer. 38:4) Mu mivu 65 ni kusut, walejana piur pa dirumburish dia Yehova pakad wom. Wijikana nakash mu Isarel mulong wa kulejan kwend pakad wom ni kukankaman mu chilik chakwel anch kwinyim kwa mivu 600 ni kusut palonday Yesu wakad wom, amwing itiyija anch wading Jeremiy wachirikina kand ku mwom. (Mat. 16:13, 14) Mutapu ik mwamupway usany muprofet Jeremiya wading ni kwidjidjek kwisambishil? Ndiy ulondin anch: “Mazu[ma Nzamb]makat kwinswanish mu muchim mudi kasu. Nikat kupakish kunenet nich, pakwez kinikutwishap kulik kumalond.” (Yer. 20:9) Mwawiy, dizu dia Yehova diasadila nich usu padiay Jeremiy ni diamubachika kulond.

9. Mulong wak dizu dia Nzamb dikutwish kwikal nich usu pad etu mudi mudikala nich usu padiay Jeremiy?

⁹ Mu mukand wayifundilay in Hebreu, kambuy Paul wafunda anch: “Dizu dia Nzamb didi diom, ni usu, ni kutwa kupandikena mpak ya musamun yitwila mitambu yaad, dikubuz mu mupim ni mu muchim, dikat kubaril manungun ni usongisong, ni dikutwish kujingunin yitongijok ni rusot rawonsu ridia mu muchim wa muntu.” (Heb. 4:12) Rusangu ap dizu, dia Nzamb dikutwish kwikal nich usu pad etu mudi mudiading nich usu padiay Jeremiy. Vurik anch ap anch ayisadila antu mulong wa kufund Bibil, kadiap mubombu wa mikand yikweta manangu ma antu, mulong amufunda kudiokal ku mwiku wa Nzamb. Mu mukand wa 2 Pita 1:21, tutangin anch: “Kwikil kubwak kwadiokala kusu ku rusot ra muntu, pakwez aruu a Nzamb alondang mazu madiokalanga kudi Nzamb payitakelangau kudi [M]mwiku [U]utumbila.” Pitwitekidina chisu cha kwipan mu kwilej kwa panretu kwa Bibil, manangu metu makwikal mizwila nich rusangu rapepilau kudi spiritu utumbila. (Tang 1 Korint 2:10.) Rusangu riner rikutwish kwikal “mudi kasu” mu muchim wetu, chakwel tutwisha kurulam ayinentu.

10, 11. (a) Mutapu ik tufanyidina kwilej Bibil anch tusotil kulond pakad wom? (b) Jimbul mulad umwing kusu wirijekina mulong wa kuwapish mutapu wey wa kwilej amwiney.

¹⁰ Chakwel anch dilejan dia muntu ipend dikala nich usu padi etu, chifanyidin kwilej mu mutapu wa kwel anch rusangu ra Bibil ripukuna ku muchim wetu, rikala nich usu pa yovil yetu ya mukach. Chilikej, muprofet Ezekiel amulatisha amuleja kudia muvungur wa mukand wading nich rusangu ra kuyilej antu alikina kutesh. Ezekiel wafanyina kutesh rusangu rawonsu ni kurusal rikala irend. Kusal mwamu kwela kusal impu ya kulejan rusangu riner risangaresha—mud kutal kwa woch.—Tang Ezekiel 2:8–3:4, 7-9.

¹¹ Tudi mu mwikadil wa chilik chiwing ni cha Ezekiel. Nlel, antu avud kasotinap kusu kutesh yilondinay Bibil. Anch tudandamedin kulejan dizu dia Nzamb, chidi cha usey twileja Mifund mu mutapu ututwishina kuyitesh nawamp nakash ni kwitiyij yilondinau. Kwilej kwetu kufanyidin kwikal kwa chisu chawonsu—kwa pa chipatu bwat. Maswir metu mafanyidin kwikal mud ma mfund a kuseng wa wanga anch: “Lik mazu ma mukan mwam ni manangu minitongijokina mu muchim wam amaka ku mes kwey, A Nzamb, diyal diam, mukamunin wam!.” (Kus. 19:14) Chidi cha usey mud ik anch twishilaku chisu cha kutongijokin pa yom tutangina, chakwel uyakin wa Bibil wandama nakash mu muchim! Chakin kamu, tufanyidin kusal usu chakwel kuwapish mutapu wa kwilej kwetu kwa muntu ipend.b

12. Mulong wak yikumangen ya Ukristu yitukwashin chakwel twikala atakedilau kudi mwiku utumbila?

¹² Njil yikwau ya kutambwil mwiku wa Nzamb yidi kutongijokin “kulangwish muntu ni muntu ku rukat ni midimu yiwamp; kangal tulikany kukumangan kwetu ayinetu.” (Heb. 10:24, 25) Kwikasikesh kukumangan pakad kujing ku yikumangan ya Ukristu, kuta matu, ni kusadil yom twilejina jawiy jinjil jiwamp jakwikal atakedilau kudi mwiku. Kupwa kwa yawonsu, ov, udiap mwiku wa Yehova upanina umutakel mu chikumangen?—Tang Kuburik 3:6.

Yiyukish ya Kwikal Wakad Wom

13. Chom ik tukutwisha kwilejin ku yom yasalau in Kristu a pa chitot cha mivu chakusambish mu mudimu wa kulejan?

¹³ Mwiku utumbila udi usu upadakenamu kujimb pa mangand mawonsu, ni ukutwish kuyinkish antu ukash wa kusal rusot ra Yehova. Ku usu winou, in Kristu a pa chitot cha mivu cha kusambish asala mudimu upandakena kujimb wa kulejan. Alejana rusangu ruwamp “kudi awonsu atangilau mwinshin wa diur.” (Kol. 1:23) Anch twashishikin anch avud pakach pau “kadip antu ileja ku shikol,” chimeken patok anch ading ayibachikin kudi usu upadakenamu.—Mid. 4:13.

14. Chom ik chikutwisha kutukwash ‘kukwachik nich spiritu’?

¹⁴ Anch twaulikidil mwiku utumbila watakel mwom wetu, ukutwish kand kutubachik chakwel tusala mudimu wa kulejan nich mushiku. Yiyukish yawonsu pamwing ya kulembil pakad kujing mulong wa kwit mwiku, kwipan nich mushiku mu dijejan dia usey dia muntu ipend, kutongikokin pa yitutangina, ni kuya kuyikumangan ya Ukristu pakad kujing kukutwish kutukwash ‘tukwachika nich spiritu’ (Rome 12:11) Bibil walonda piur pa “mwin Yuda umwing wa ku musumb wa Alezandria, dijin diend Apolo, washika ku Efes. Ndiy wading muntu wija kulond nawamp” anch: “Chad ndiy warumburilanga mazu ma Nzamb nich mushiku, walejananga kand yom yakin ya Yesu.” (Mid. 18:24, 25) Kusutil ‘ku kukwachik nich spiritu,’ tukutwish kudandamen kulejan pakad wom ku chikumbu ni chikumbu ni pitulejena pakad kuchingejin.—Rome 12:11.

15. Ov, mutapu ik kudandamen kulejan pakad wom kukwet yibudikin yiwamp padi etu?

¹⁵ Kudandamen kwikal wakad wom mu kulejan kukweting yibudikin yiwamp pad etu. Chitongijok chetu chikuwap mulong tuteshin nawamp nakash usey ni ukwash wa mudimu wetu. Kuzangurok kwetu kukwiwejinaku mulong tutanin musangar ujim nakash pitusongina mabuj mu mudimu wetu. Ni tukwikal nich mushiku ukash mulong twij nawamp anch mudimu wa kulejan chifayindin kuusal swa swa.

16. Chom ik tufanyidina kusal anch mushiku wetu mu mudimu wasambish kukep?

¹⁶ Ov chikwikal nchik anch twashadish mushiku wetu mu mudimu mud mutwading tusotina? Pachinech chiswiridin kwishinshikin ayinetu. Paul wafunda anch: “Ipakany ayinen, irumburishany ayinen, utalany anch ukwetany ritiy.” (2 Kor. 13:5, MN) Iyipula amwiney: ‘Ov, nichidandamedin kwikal nich mushiku? Ov, Nikat kumwit Yehova mwiku wend? Ov, malembil mam mamekeshin anch Nimuchingejin chakwel kusal rusot rend? Ov makwet mazu ma kujikitij mulong wa mudimu utwinkishinay kusal? Mutapu ik udia yaku yam ya kwilej? Asaa inch Nikata kutongijokin pa yom nitangina ni kutesh? Mutapu ik nipanina mu yikumangan ya chikumangen?’ Kutongijokin pa yipul mudi yiney kukutwish kukukwash kujingunin mitambu yiziyila ni kukukwash kusend mipak ya kurijek.

Lik Mwiku wa Nzamb Ukwikadisha Wakad Wom

17, 18. (a) Ov mu mutapu ik upandakena kujimb ausadilau nlel mudimu wa kulejan? (b) Mutapu ik tukutwisha “kulond patot wakad wom” mu mudimu wa kulejan rusangu ruwamp ra Want wa Nzamb?

¹⁷ Yesu wavumbulau wayileja in kwilej end anch: “Anch mwiku wa [U]utumbila wakushiriknany en, ukez kikalany nich ukash. Chad ukez kikalany atuman amam mu Yerusalem, ni mu Yudeya mwawonsu, ni mu Samaria, djat ni kusudiedila mangand.” (Mid. 1:8, MN) Mudimu wasambishina pa chisu chinech ausadil nlel unou mu mutapu upandakena kujimb. Atuman a Yehova piswimp tutikit sambwad akat kulejan rusangu ra Want mu jingand 230 ni kusut, asadil asaa piswimp miliyar 1,5 pa muvu mu mudimu. Chisangareshin mud ik kusal nich mushiku mudimu winou wa kulejan wakad kwez kusadik kand!

¹⁸ Mudi muchadinga pa chitot cha mivu cha kusambish, nlel unou mudimu wawonsu wa kulejan ausadil mwinshin mwa umutakel wa mwiku wa Nzamb. Anch twitiyij wintakel wa spiritu, tukez “kulond patok wakad wom” mu mudimu wetu. (Mid. 28:31, MN) Chawiy lel, twikalany amboku atakedilau kudi mwiku pitulejena rusangu ruwamp ra Want wa Nzamb!

[Mazu madia kwishin kwa paj]

Ukwakul Nchik?

• Mulong wak tufanyidin kwikal akad wom pitulondina dizu dia Nzamb?

• Chom ik chayikwasha in kwilej a kusambish chakwel kulond pakad wom?

• Mutapu ik tukutwisha kwikal akad wom?

• Mutapu ik tutanidinamu mu kwikal akad wom?

[Chipich didia pa paj wa 16]

Ov mutapu ik anvaj akutwisha kuyikwash an au ikala akad wom?

[Yipich yidia pa paj wa 17]

Kulembil kwiswimp kukutwish kutukwash kwikal akad wom mu mudimu