Tumwimburijany Yesu—tulejanany Ni Kujijaman

“Twajijamana . . . kulond kudi en rusangu ruwamp ra Nzamb mu kurish kuvud.”—1 TES. 2:2.

1. Ov, mulong wak rusangu ruwamp ra Want risangareshining nakash?

CHISANGARESHINING mudi ik pa kutesh rusangu ruwamp! Ni rusangu ripandikenamu kuwap ridi rusangu ruwamp ra Want wa Nzamb. Rusangu ruwamp riner ritwinkishin kashinsh anch mar, mayej, kusansan, runeng ni rufu yikupwa piswimpap. Ritwinkishin ruchingej ra mwom wa chikupu, ritulejin rutong ra Nzamb, ni ritulejin kand mutapu wa kuta nend urund wa rukat. Ukutwish watongin anch muntu ni muntu ukusanger kutesh rusangu riner rayilejau antu kudiay Yesu. Pakwez, cha ushon chidi anch, kichidiap mwamu.

2. Rumburil mazu malonday Yesu anch: “Nezil ni kumutekish muntu ntad.”

² Yesu wayileja in kwilejend anch: “Kangal watongany anch, Am neza ni kulet chisambu pa mangand, bwat, kinezilip kulet chisambu, ching mpak ya musamun. Mulong nezil ni kumutekish muntu ntad nend tatukwend, mwan mband ni makwend, ni mband wa mwan ni mawenend; Adia mu chikumbu akez kapompatijan nend mwin chikumbu chend.” (Mat. 10:34-36) Pa ndond pa kwitiyij rusangu ruwamp, antu avud arilikin kwau. Amwing iyikadisha kal ayinau akankuny a antu arilejena, ap anch adi a dijuku dimwing.

3. Tuswirikedin chom ik chakwel tuwanyisha mudimu wetu wa kulejan?

³ Tulejen uyakin wawiy umwing walejanay Yesu, ni anch autesh, antu akat kutusadil mudi mwamusadilau niyend pa mivu yiniya. Tufanyidin kuchingejin chom chinech. Yesu wayileja in kwilejend anch: “Kashalapol kamupandakenip nsalejend kujimb. Anch anzengol am akez kukuzengolany kand ni yen.” (Yoh. 15:20) Mu jingand jivud kakatap kuturishish patok, pakwez akat kutuswingish ni kutudiujol. Chawiy lel, tuswiridin ritiy ni kukapuk chakwel tujijamana mu mudimu wetu wa kulejan rusangu ruwamp.—Tang 2 Pita 1:5-8.

4. Ov, mulong wak Paul wadinga ufanyidin ‘kujijaman’ chakwel alejana?

⁴ Pamwingap chadinga chikukasikedin pa yisu yimwing kulejan mu teritwar, ap mitapu yikwau ya kulejan yadinga yikwovishin wom. Anch mwamu chidia, kiudiap ey amwiney ukata kwiyov mwamu. Kambuy Paul wadinga mwin kulejan ujijamena, wakad wom ni wadinga wija nawamp uyakin. Pakwez, ap niyend pa yisu yimwing wadinga ni kurish nich chakwel alejana. Paul wayifundina in Kristu adinga ku Tesalonik anch: “Twasambilap nchik kuman mar ni kutukwatish usany ku Filipoi, mudi chiwijany kal, twajijamana mwi Nzamb wetu kulond kudi en rusangu ruwamp ra Nzamb mu kurish kuvud.” (1 Tes. 2:2) Mu Filipoi, antakel apana mbil ya kumubul Paul nfimbu pamwing ni murund nend Silas, ayidjibwila mu rukan, ni ayikasa nich jimpompu. (Mid. 16:16-24) Chikalap nchik mwamu, Paul ni Silas ‘ajijamana’ mulong wa kudandamen nich kulejan. Ov, mutapu ik niyetu tukutwish kusal mwamu? Chakwel kutan chakul, el tushinshikinany chom chadinga kuyitwishish atushalapol a Nzamb a pa chisu chafundau Bibil chakwel alonda uyakin piur pa Yehova nich kujijaman, ni el twilejany mutapu tukutwisha kwimburij chilakej chau.

Tuswiridin Kujijaman Pantaliken Nich Ukankuny

5. Ov, mulong wak antu adinga ashinshamena kudiay Yehova aswirikena kujijaman?

⁵ Chakin kamu, Yesu Kristu, ndiy chilakej chipandakena cha kukapuk ni kujijaman. Pakwez, kudiosh kamu pamutanginau muntu, antu awonsu ashinshamena kudi Yehova aswirikena kujijaman. Ov, mulong wak? Kupwa kwa wintombuj wasadika mu Eden, Yehova walonda anch kukwikal ukankuny pakach pa antu amusadidila Nzamb ni antu amusadidila Satan. (Dis. 3:15) Ukankuny winou wamekana patok swa-swa pa chisu chamujipau Abel, muntu utentamina, kudiay yayend. Kupwa, ukankuny winou wamutalikena Enok, ikundj mukwau ushinshamena wadingaku kurutu Mabeb meza. Ndiy wabwaka anch Nzamb ukwez pamwing ni tutikit twa Aend atumbila mulong wa kuyirumburish antu awonsu akad Nzamb ku yisalijok yau. (Yuda 14, 15) Antu avud kasangerap kutesh rusangu riner. Antu amukisa Enok ni asota kumujip anch Yehova kakatulap mwom wend. Kujijaman kwa mutapu ik kwadingay nich Enok!—Dis. 5:21-24.

6. Ov, mulong wak Moses wadinga uswirikedin kukapuk pa kwambamb ni Farao?

⁶ Tonginany kand, piur pa kujijaman kwamekeshay Moses payay kumulej Farao, nyikel wadingau ni kuman mudi anch, kadiap ching kusu ntimesh wa anzamb, pakwez niyend amwinend wadinga nzamb, mwan wa nzamb muten Ra. Chimeken anch, mudi muchadinga ni a Farao akwau, niyend wadinga ni kwifukwil chirumbudij chend amwinend. Mazu ma Farao madinga chijil; wadinga ni kuyikel kulondulijan ni chijidik. Farao wadinga mwin kwitutul, mwin chibud ni kadingap ni kusot antu akwau amuleja cha kusal. Chadinga kurutu kwa muntu winou kwawiy kwadingay ni kuya Moses, kafung mwin kwikepish, chisu ni chisu—pakad kumutazuk ni kumukan. Yom ik yabwakay Moses? Yipupu yiyimp nakash. Ni chom ik chitay? Mbil chakwel aswik mamiliyon enday Farao adiokala mwingand! Ov, Moses wadinga uswirikedin kukapuk? Inge!—Kuch. 12:3; Heb. 11:27.

7, 8. (a) Yoziu ik yayitana antu ashinshamena a pasak? (b) Chom ik chayitwishisha antu adingaku kurutu kwa chirung cha Ukristu kwikal akapukina pa kukasikeshin ni kutwal kurutu difukwil dishitwila?

⁷ Mu yitot ya mivu yalondulaku, aprofet ni atushalapol akwau ashinshamena a Nzamb adandamena kukapuk mulong wa kwikal ku mutambu wa difukwil diakin. Mangand ma Satan kimadingap ni kuyanaken. Paul walonda anch: “Ayasola mayal, akwau ayikatwola yikunku, ayoza, ayijipa ni jimpak; ading ni kwendil mu yikit ya amikoku ni ampemb; ading ni wintany, ading ni mar ni yakamish.” (Heb. 11:37) Chom ik chayikwasha atushalapol ashinshamena a Nzamb kwiman dang? Mu maverse makemp madia kwiur, kambuy ulejen chom chamwinkisha Abel, Abraham, Sara, ni akwau usu wa kujijaman. Ndiy walonda anch awiy, “katambulap kushilimu, pakwez [mu ritiy] akutadila palemp ni kukulangwish, itiyija anch tudi aeny ni in kutambitamb pa mangand.” (Heb. 11:13) Pakad kwidjidjek, aprofet mudi Eliya, Yeremiy, ni antu akwau ashinshamena adingaku kurutu kwa chirung cha Ukristu, imana dang ku mutambu wa difukwil diakin, niyawiy ayikwasha chakwel ajijamana kusutil ku kwimen ching pa kushilamu kwa Yehova.—Titus 1:2.

⁸ Antu inay ashinshamena adingaku kurutu kwa chirung cha Ukristu adinga achingedin machuku ma kurutu ma musangar. Pakezau kuyivumbul, akez pamwingap kushiken ku kuwanyin ni “kudiokal kand iyinau mu uswik wa yom yivudila” kusutil ku midimu ya win kupesh wa Kristu Yesu ni in kupesh a mwishin 144000. (Rome 8:21) Chikwau, Yeremiy ni atushalapol akwau akapukina a Nzamb adingaku pa yisu ya pakur ikala akash mulong wa kashinsh ka Yehova, kadinga mu kushilamu kwend kudiay Yeremiy palonday anch: “Akez kakurishish, pakwez kakez kakupandakanap, mulong am, [Yehova, NW], nikulejina, nidi ni yeyey. Yam nikeza kakuchidij.” (Yer. 1:19) Ilel, pitukata kutongijokin pa kushilamu kwa Nzamb mulong wa machuku metu ma kurutu ni kashinsh kend ka diking dia muspiritu, niyetu tukat kwikal akash.—Jinsw. 2:7; tang 2 Korint 4:17, 18.

Rukat Ramubachika Yesu Alejan nich Kukapuk

9, 10. Mu mutapu ik wamekeshay Yesu kujijaman kurutu kwa (a) antakel a relijon, (b) chisak cha amasalay, (c) mwin kupesh wa pa mutu, (d) Pilat?

⁹ Yesu, chilakej Chetu, wamekesha kukapuk kwend mu mitapu kushalijan. Chilakej, ap anch adinga amukisin kudi antu adinga nich usu ni ntumb, Yesu kakepishap usey wa chom chadinga chisotinay Nzamb anch antu achijika. Wayisaula patok amakurump a relijon mulong wa kusot kuman ching kutentam kwau ayinau kusu pamwing ni kusal malejan mau ma makasu. Antu inay ayifisha nich, ni mwamu mwayilejau patok kudi Yesu ku kan ni mu yisal yend. Dichuku dimwing, ndiy walonda anch: “Riyind kudi en in kufund ni Afarise, in kubabek! Mulong udiany kwen mudi jinzay jitokishilau, jidia piur pameken zwang pa ufun, pakwez mukach mwizwil sens ni mafup ma afu ni yawonsu yinyangasila. Mwamu kand muudianya ni yen piur, antu akumenany mudi utentaminany, pakwez mukach mwizwil sens ni rubabek ni kuyip.”—Mat. 23:27, 28.

¹⁰ Pamutanau kudi chisak cha amasalay mu chir cha Getseman, nich kukapuk Yesu wiyijikisha amwinend kudi awiy. (Yoh. 18:3-8) Kupwa amutwala kurutu kwa in Sanedrin ni mwin kupesh wa pa mutu wamwipula yipul yivud. Ap anch ndiy wadinga wij anch mwin kupesh wa pa mutu wadinga ukimbin kachom ka kumujipin, pakad wom Yesu wamuleja anch Ndiy Kristu ni udi kand Mwan a Nzamb. Wawejinaku kand anch akez kumuman “ushich ku chikas cha katatuku cha Ukash, ukwez ni madj ma mwiur.” (Marko 14:53, 57-65) Kupwa kwa kachisu kakemp, Yesu wimana kurutu kwa Pilat, muntu wasota kumulikishaku. Pakwez Yesu kakulap ku yom yadingau ni kumufund nich. (Marko 15:1-5) Yom yiney yawonsu yadinga yitin kukapuk.

11. Ov, mutapu ik uyilinga pamwing kutakaman ni rukat?

¹¹ Yesu walonda kudiay Pilat anch: “Chawiy chinech chinavadikina, wawiy winou mulong unezila am mu mangand, mulong wa kumekesh uman wa uyakin.” (Yoh. 18:37) Yehova wamwinkisha Yesu mudimu wa kulejan rusangu ruwamp, ni Yesu wasangera kuusal mulong wadinga umukatin Tatukwend wa mwiur. (Luka 4:18, 19) Yesu wadinga uyikatin kand antu. Wadinga wij anch mwom wau udi ukash. Chawiy chimwing, kukapuk kwend ni kulejan kwetu pakad wom kushindamedin nakash pa rukat mulong wa Nzamb ni mulong wa mutej netu.—Mat. 22:36-40.

Spiritu Utumbila Utwinkishin Usu wa Kulejan ni Kujijaman

12. Chom ik chayiletina musangar in kwilej a kusambish?

¹² Pa mbing jalondulaku kupwa kwa rufu ra Yesu, in kwilejend ikala nich diyingish dia kusanger mulong Yehova wadinga ni kuyiwejidin antu akwau adingay ni kupandish. Chawiy lel, pa dichuku dimwing kusu, in Yuda ni in kukarumuk 3000 kudiokal mu jingand kushalijan adinga mu Yerusalem mulong wa kusal musambu wa Pentakost ayibabatisha! Antu awonsu adinga mu Yerusalem isambina piur pa yom yayisangaresha in Yuda! Bibil ulondil anch: “Wom weza pa mipim yawonsu; ni yishimokish yivud ni yijigidij yisadilau kudi apostol.”—Mid. 2:41, 43.

13. Ov, mulong wak akadivar alembila mulong wa kujijaman, ni kwikala chibudikin ik?

¹³ Antakel a relijon ajimana nakash, chawiy amukwata Pita ni Yohan, ayidjibul mu rukan uchuku wa kabuj, ni ayijidika kulond kand piur pa Yesu. Payilikishaku, antu inay aad ayileja akadivar yom yayishikena, ni awonsu alembila piur pa rupompat radingau ni kuyipompat, it anch: “Mwant, . . . uyinkish atushalapol ey mwakulondil dizu diey nich kujijaman kwawonsu.” Kwikal chibudikin ik? ‘Awiy awonsu ayizwisha nich spiritu utumbila, alejana dizu dia Nzamb wakad wom.’—Mid. 4:24-31.

14. Spiritu utumbila utukwashining mutapu ik mu mudimu wetu wa kulejan?

¹⁴ Ijikany anch spiritu utumbila wa Yehova ndiy wadinga ni kuyikwash in kwilej chakwel alejana dizu dia Nzamb wakad wom. Kukapuk kuyilej antu akwau uyakin, ap in apompatina uruu wetu, kudiokilingap kudi etu. Yehova ukutwish ni ukutwinkish spiritu wend utumbila anch twamwit. Nich ukwash wa Yehova, niyetu tukutwish twamekesh kujijaman kutuswirikedina chakwel tupandakana rupompat ap risu.—Tang Kuseng 138:3.

Ilel in Kristu Alejen Nich Kujijaman

15. Uyakin ukat kuyauril antu mutapu ik ilel unou?

¹⁵ Mudi muchadinga pasak, ni mu machuku metu manam, uyakin udandamedin kuyauril antu. Amwing itiyijining nawamp, oku akwau niyawiy kateshiningap kurumbuk ni kakatap kusanger difukwil dietu. Akwau akat kutunyinyit, kutuswingish, ap kutukish, mudi mwalonday kamu Yesu. (Mat. 10:22) Pa yisu yimwing, tuding diloz dia jinsangu jiyimp ni mapropagand mayimp kusutil ku yisaj ya kusutishin jinsangu. (Kus. 109:1-3) Chikalap nchik mwamu, antu a Yehova akat kulejan rusangu ruwamp pa divu diawonsu nich kujijaman.

16. Uman ik ulejena anch kujijaman kukutwish kuyishikij antu tukata kulej ku kuswimp yitongijok yau?

¹⁶ Kujijaman kwetu kukutwish kwayishikij antu ku kukarumun yitongijok yau mulong wa uruu wa Want. Nambaz umwing udinga mu Kirghizistan ulondil anch: “Chisu chinadinga mu mudimu wa kulejan, mwin chikumbu umwing wanleja anch: ‘Nimwitiyijining Nzamb pakwez kinimwitiyijiningap Nzamb wa in Kristu. Anch wez kand ku chis chinech, ni kukutumin kabu!’ kwinyim kwend kwadinga kabu mwiswimp ukweta chimutu chijim ni mavuj miswimp. Pakwez pa chisu cha kusal kampany wa Rusangu ra Want No. 37, ulondila anch: ‘Kusheshik kwa Relijon wa Makasu Kudi Piswimp!,’ nakwata mupak wa kuchirikin ku chikumbu chinicha nich ruchingej ra kutanijan ni muntu umwing wa mu dijuku dia ikundj winou. Pakwez ikundj winou kand wazurila chis. Namulembila Yehova swa ni nalonda anch: ‘Ulongany mwan, nivurikin yom twisambina pasut kal machuku masatu, ni nimuvurikin kand kabu wey. Pakwez kinisotinap kukusut mulong nidi mudi ey, nimwitiyijin Nzamb umwing kusu wakin. Piswimpap Nzamb ukuyipup marelijon makata kumukwatish usany. Ukutwish wilej yom yivud pa mulong winou anch watang dipaper ed.’ Nakashimuk, ikundj winou watambula Rusangu ra Want. Kupwa naya ku chikumbu chikwau. Kupwa kwa minit yikemp kusu, ikundj walondula mau ni ukwet mu chikas chend Rusangu ra Want. Ndiy walonda anch: ‘Naditang kal. Ov, nisala chom ik chakwel kangal ujim wa Nzamb weza winkwata?’” Dilejan diasambisha ni ikundj winou, ni wasambisha kuya ku yikumangan ya Ukristu.

17. Ov, kujijaman kwa nambaz kwamukasikesha nchik mwin kwilej Bibil wadinga wovila wom?

¹⁷ Kujijaman kwetu kukutwish kwayikasikesh antu akwau chakwel niyau ikal ajijamena. Mu Russie, nambaz umwing wadinga uyil mu weny mu motak, wamwinkisha gazet muntu mukwau wadinga niyend uyil mu weny. Pa kuman mwamu, ikundj umwing watumbuka mu chitwam chend, wamukwasil gazet mu chikas cha nambaz, wamuvungol, ni wamudjimbwil kwa. Wamupep masaal patok, wamwipul nambaz anch kwisu kukushikenay ni wamubabesh anch kangal wapakish kulejan mu ul. Nambaz wamwilembila Yehova chakwel amukwash ni wavurika mazu malonday Yesu anch: “Kangal wovany wom wa in kujip mujimbu.” (Mat. 10:28) Nich kwitudish, nambaz watumbuka ni wamuleja ikundj winou anch: “Nikukulejap kunikushikena, ni nikudandamen kulejan mu ul.” Kupwa washirika mu motak. Pakad nambaz kwijik, muntu umwing wadinga ni kwilej Bibil ni nambaz winou wadinga niyend mu motak. Mband winou wadinga wovil wom wa ikundj winou ni chamukangesha kuyang ku yikumangan ya Ukristu. Pakwez, pamanay kujijaman kwa nambaz wetu, mwin kwilej Bibil winou wakwata mupak anch ukusambish kuya ku yikumangan.

18. Chom ik chikukukwasha kulejan nich kujijaman mudi mwalejanay Yesu?

¹⁸ Mu mangand minam madia kulemp ni Nzamb, chitin kujijaman chakwel kulejan mudi mwalejanay Yesu. Ov, chom ik chikukukwasha kusal mwamu? Tal kurutu. Kasikesh rukat rey mulong wa Nzamb ni mulong wa mutej ney. Mulembila Yehova akukasikesha. Vurik chisu chawonsu, kiudiap kwey amwiney, mulong Yesu udi pamwing ney. (Mat. 28:20) Spiritu utumbila ukez kukukasikesh. Ni Yehova ukez kukuyukish ni kukukwash. Chawiy lel, twikalany ajijamena ni tulondany anch: ‘Mwant ndiy nkwash wam, nikwovap wom; antu akwisal ik?’—Heb. 13:6.

Ov, Ukwakul Nchik?

• Ov, mulong wak atushalapol a Nzamb aswirikedin kujijaman?

• Pa mulong wa kwikal ajijamena, chom ik twilejidina kudi . . .

antu ashinshamena adingaku kurutu kwa Kristu?

Yesu Kristu?

in Kristu a kusambish?

akwetu in Kristu ilel?

[Chipich chidia pa paj wa 23]

Yesu wayisaula patok antakel a relijon pakad wom

[Chipich chidia pa paj wa 25]

Yehova ukat kutwinkish usu wa kulejan