Ov ukat kulejan pakad wom?
1 Ap anch ayikasa ni kuyimesh mar kud akankuny, Pita nend Yohan adandamena kulejan rusangu ra Want pakad wom. (Mid. 4:17, 21, 31) Ov kulejan pakad wom kurumburikin ik kud etu nlel unou?
2 Kupan uman pakad wom: Dizu difanakena ni “pakad wom” didi “kujijaman,” dizu dirumburikina kwikal nich “chiyul cha kulik kwov wom, kwisum muchim, ni kujijaman.” Kud Akristu akin, kulejan pakad wom kurumburikin kwikal wakad wom wa kulejan chisu ni chisu tukweta mutapu ufanyidina kwambambin rusangu ruwamp nau akwetu. (Mid. 4:20; 1 Pita 3:15) Chirumburikin anch tukwetap usany wa kulejan rusangu ruwamp. (Kus. 119:46; Rom 1:16; 2 Tim. 1:8) Chawiy lel, kuburen wom udi mwikadil umwing uswiridina chakwel kusal mudimu wetu wa kulejan rusangu ruwamp ra Want mu chisu chinech cha kwisudiel. Kukat kutubachik kwambambin rusangu ruwamp ni antu ndond yin yawonsu yikutwishau kumekan.— Mid. 4:29; 1 Kor. 9:23.
3 Pakad wom ku shikol: Ov chibachikin cha kwov wom ap cha kulik kwikal uzangurokina yikukangeshin kulejan kud arund ney a shikol? Yisu yimwing chidingap chiswapela bwat; mulong, chikutwish kwikal kurish kwakin. Pakwez, Yehova ukukukasikesh anch wamwit mulong wa kwikal uburedina wom chakwel kuyilej akwau. (Kus. 138:3) Kuburen wom kukukukwash kwiyijikish mud umwing wa Atuman’a Yehova ni kujijamen maswimbu. Mud chibudikin, kulejan kwey ku shikol kukutwish kuyipandish antu akata kukutesh—1 Tim. 4:16.
4 Pakad wom ku mudimu: Ov wijiken mud umwing wa Atuman’a Yehova ku mudimu? Mutapu umwing kusu ukutwishau kutambul arund ney a mudimu rusangu ruwamp ukutwish kwikal kusutin ku kuyilej kwey. Kuburen wom kukukukwash kwitekinaku chisu mulong wa yikumangan yey ya Ukristu ni yikunguril.
5 Pakad wom mu Yoziu: Kusal usu wa kuburen wom chidi cha usey chisu tusankena rupompat. (1 Tes. 2:1, 2) Kukat kutukwash kulamat ku ritiy retu pa chisu chitwakamishinau, patusipinau, ap kutupompat kamu mpal ni mpal . (Filp. 1:27, 28) Kutukasikeshin kujijaman anch tudi mwishin mwa usu wa kujiril yijil ya Nzamb wetu, Yehova. Kutukasikeshin chakwel kulam chisambu chetu chisu chisarumwinau akwau matend.—Rom. 12:18.
6 Chikalap nchik mar min mawonsu tusankena, tudandamenany kulejan rusangu ruwamp pakad wom.—Efe. 6:18-20.