“Tusalany yom yawonsu mulong wa kutung”

¹ Chitushicha nau akadivar netu, tufanyidin kusal yom yiwamp mulong wa kuyitung. Chinech chirumburikin kutongin kuyilamin mwom wau muspiritu. Anch tukat kusal mulad umwing wa mudimu wa kulandish chom kanang ap mujikit, tufanyidin kubabal anch chom ap chimwing kangal chayipwakesh akadivar netu.​—⁠2 Kor. 6:3; Filp. 1:​9, 10.

² Amwing asambishin kusal mijikit kushalijan ya kwisak, ni kutong anch akuman akidiya akutwisha kuyiland yikwetau pakach pa in Kristu akwau. Yirijek yimwing ya kwisak yikat kuyikasikesh antwau a mudimu kuman muntu mwin mwawonsu mud kidiya ukutwisha kuland ya kuland​—⁠kuchindinamu ni antu adia nau mu relijon umwing. Akadivar amwing arijeka yikumangan yijim ya Atuman mulong wa kuyikasikesh akadivar kwandam mu milong ya mujikit wa kwisak. Akwau akat kubazin mijikit yau ya kwisak nich kulet yom yakadau kuyit, mabroshir, jinsangu ja pa Internet, ap maband kud ambayau in Kristu. Ov chiwapidil anch mwin Kristu asadila urund wend wa uteokrasia mulong wa kumen ukwash kud akadivar nend muspiritu? Bwat kwau!​—⁠1 Kor. 10:​23, 24, 31-33.

³ Akadivar afanyidin kubabal: Chinech chirumburikinap anch mwin Kristu kakutwishap kusal mudimu wa kwisak nend mukadivar bwat. Udi mulong umwing umutadila muntu amwinend. Pakwez, amwing akat kusarumun milong ya kwisak yikata kukasikesh ris, ni akat kuyit ambayau in Kristu kwikal antu akusalau nau mudimu pamwing ap kulet nfalang ja kusal nich mudimu. Yivud ya milong ya kwisak yiney yikat kukanganyang, ni kuyishadishin antu ayisadina nfalang jimwing jivud. Ap anch antu asadina mudimu winou akutwish ikal ni yitongijok yiwamp ya kuvudish nfalang swa, mwin kusambish mujikit winou kafanyidinap kutong anch kakwetap kwend mulong anch mijikit yirijekinay yakangany. Ufanyidin kutong nawamp nakash kurutu kwa chisu mutapu uyikutwisha kwasin kuwap kwa muspiritu ni kwa ku mujimbu kwa akadivar nend anch mujikit winou usutinap nawamp. Antu akweta yisend ya uteokrasia afanyidin kamu kubabal nakash nich midimu yau yisadilau, mulong akwau ayilimishin ni kuyitekin ruchingej ra kashinsh. Chikwikal chiyimp kusadil nayimp ruchingej ritutekidinau. Mukadivar ushadishina kalimish ka akwau ukutwish kushadish yisend yend ya mudimu utumbila.

⁴ Rutong retu rifanyidin kwikal ra ‘kusal yom yawonsu mulong wa kutung.’ (1 Kor. 14:​26, New World Translation) Tufanyidin kwipuk kusal chom chin chawonsu chandjikina ap kukasikesh mijikit ya kwisak mu chikumangen. Yom mud yiney yambatenap nich yiyingish yitukata kukumangen pamwing yilondilay Baibel.​—⁠Heb. 10:​24, 25.