Shinshikinany midimu yipandakena kuwap ya Nzamb
1 Mu machuku masatu ma usey, twakumangen ku Chikumangan cha Distrik “In Kusadil a Dizu dia Nzamb.” Twadioshin yitongijok yetu kulemp ni yakamish ya mwom ya pichuku pichuku ni kutek yitongijok yetu pa midimu yipandakena kuwap ya Yehova. Program amurijekin chakwel kujimbish ritiy retu mudiay Nzamb ni mu Dizu diend, chakwel kukasikesh urund wetu nend Nzamb, ni chakwel kuwejin mushiku wetu mulong wa mudimu wa kulejan. Ov mutapu ik tutambwila ukwash udiokila ku yom yatufundishinau?—Yohan 13:17.
2 Majuku ziyilany ku Dizu dia Nzamb: Diskur dia yikunku yisatu dikweta mutu wa mulong “Ziyil ku Dizu dia Nzamb” diatukwashin kushinshikin mwikadil wa muspiritu wa dijuku dietu. An akatining kwilej. Chawiy lel, anvaj amulimishina Nzamb ayikasikeshin kutek dilejan dia Baibel mu dijuku kwikal dishin mulong wa kutung dijuku dimwing dikash muspiritu. Mitu ya dijuku yivud akat kwambambin pamwing nau anau akemp broshir musu ukweta mutu wa mulong Ukutwish Kwikal Murund Nend Nzamb! Chinech chikuyikwash kukudish musangar ni urund wa kashinsh nend Yehova. Anvaj, yifundishany anen mutapu wa kuta matu ku yitong ya Nzamb. Mekeshany ayinen rukat ren mulong wendendiy ni yisalijok yend. (Kus. 103:2) Sadilany pamwing chakwel kushiken rutong ra usey ra Mifund rambatena nich kumusadin sens Yehova.
3 Dizu dia Nzamb dimunyikidin njil yetu: Twasanger nakash pa kutambul buku musu La prophétie d’Isaïe, lumière pour tous les humains. Ov ndond ik washikedina kal mu kutang kwa chikunku chinech cha kusambish? Buku wa Isay utakedil kwisambin dirumburish diamushena mulong wa michid yakad kumwijik Nzamb ni kushilamu kwa Want wa katumb kud antu a Nzamb. (Isa. 34:2, NW; 35:10, NW) Chikasikeshin kand ritiy ni ruchingej mudiay Yehova ni mu mutapu wend wa kusal yom.—Isa. 12:2-5, NW.
4 Mu kutang Prophétie d’Isaïe, ukutwish kujingunin kurutu kwa chisu mutapu walamay Isay kushinshaman kwend kud Yehova ap anch uyimp wading umunyingumukin. Patambulay diladikij dia kwikal muruu wa Nzamb, Isay wakula anch: “Yam ou! Ntumany.” (Isa. 6:8, NW) Kutongin spiritu wend wa kwipan kwa kwikatin kukukasikesh kudandamen kulejan rusangu ruwamp, kubudikin sens mu mudimu wa kupan “uman kudi antu a michid yawonsu.”—Mat. 24:14.
5 Kushinshikin kwetu kwa midimu ya Yehova kukutumbish kujimb kwend. Chawiy lel tusangerany chisend cha kwikal in kusadil a dizu dia Nzamb!