Dizu dia Yehova Didi Diom

Manans Majim ma Buku wa Isay—Chikunku cha Kusambish

“OV, NANY nikutumap? Ov, nany ukwikala muruu wetu?” Pa kutesh rubil riner radinga ritwilay Yehova Nzamb, Isay, mwan ikundj wa Amos wakula anch: “Yam unou, ntuma.” (Isay 1:1; 6:8) Pa chisu chinicha kamu, Isay amwinkisha mudimu wa uprofet. Mijikit ya uprofet ya Isay ayifundin mu buku wa Bibil ukweta dijin diend.

Muprofet Isay ndiy wafunda buku winou, buku wa Isay wisambidin chirung cha mivu 46, kudiokal muvu wa 778 kurutu kwa chirung chetu djat mu muvu wa 732 kurutu kwa chirung chetu. Ap anch mu buku winou mudi mazu ma dirumburish pantaliken nend Yuda, Isarel ni michid yadinga yiyombilamu, mutu wau wa mulong udiap kufish nich ku dirumburish. Pakwez, udi ‘dipandish dia Yehova Nzamb.’ (Isay 25:9) Dijin dia Isay, dirumburikin anch: “Dipandish dia Yehova.” Chikunku chinech chikwisambin manans majim madia mu Isay 1:1–35:10.

“IN ISAREL AMWING AKUSHALAP AKEZ KACHIRIK”

(Isay 1:1–12:6)

Uruu wa uprofet udia mu mashapitre matan ma kusambish ma buku wa Isay, wikala wapanau kurutu ap kupwa kwa kumutond Isay kwikal muprofet, Bibil kachilondilap. (Isay 6:6-9) Pakwez chimekena patok, chidi anch Yuda ni Yerusalem ading ayej mu spiritu “kudiokal ku yidjatil ni ku mitu.” (Isay 1:6) Difukwil dia akish diapalangana kwawonsu. Chadinga chiswapela kuyikatul antakel milamu. Amband ikala in chibud. Antu kamwifukwilap Nzamb wakin mu mutapu witiyijinay. Isay amutuma kuya kuyilej ‘kakwau ni kakwau’ antu akad kutesh ni akata kulik ronganyin ap rikemp.

Yuda amwovisha wom pamwandaminau kudi usu ubombakena wa Isarel ni Siria. Yehova wamusadila Isay ni anend mudi “aruu kudi in Isarel,” wayishinshikisha in Yuda anch manswik ma Siria ni Isarel kimakezap kupandakan. (Isay 8:18) Pakwez, chisambu cha chikupu, chikez kwez ching kusu kusutil ku winyikel wa ‘Mwanat wa Chisambu.’ (Isay 9:6, 7) Yehova ukez kand kuyirumburish in Asiri, muchid wasadilay mudi “kabul [kend] wa kuyilej nich kadimu.” Yuda ching wez waya mu uyong, pakwez “in Isarel amwing akushalap akez kachirik.” (Isay 10:5, 21, 22) Kutentam kwakin kukez kwikalaku mwishin mwa winyikel wa muntu ufanikeshinau nich ‘mutiy usu uminyina ku dishin dia Yese.’—Isay 11:1.

Yakul ku Yipul Yipwilau Piur pa Bibil:

Isay 1:8, 9—Ov, mutapu ik welay kushal changadim wa Sion “mudi kachikumbu . . . mu chir cha mitond ya nviny, ap mudi kafumbifumb ka mu chir cha katand”? Mazu minam marumburikin anch pa kwez kwa in Asiri, Yerusalem ukez kwikal uswapela kukwat, mudi kachikumbu kadia mu chir cha mitond ya nviny ap mudi kusheshik swa kwa kafumbifumb ka mu chir cha katand. Pakwez Yehova weza ni kumukamunin ni chawiy chakangesha anch ikal mudi Sodom ni Gomor.

Isay 1:18—Mazu “Ezany, turijekany” marumburikin ik? Mazu minam kimadiap diladikij dia kwisambin yom ni kushiken ku kwovijan mu yitongijok. Pakwez, verse winou wisambidin kutek dirumburish mukwikalay Nkalansambu utentamina, Yehova, ni umwinkishin Isarel chisu cha kukarumuk ni kwishitwish.

Isay 6:8a—Ov, mulong wak usadidilau answan “ni” ni “wetu” mu verse winou? Nswan (pronom) “ni” uswinken dijin Yehova Nzamb. Nswan wa uvud “wetu” ulejen anch kudi muntu mukwau udia pamwing ni Yehova. Chakin kamu, muntu winou udi “Mwanend wa kuval kwend umwing.”—Yohan 1:14; 3:16.

Isay 6: 11—Chom ik chasotay Isay kulond pipulay anch: “Ov, Nsalejam, ukushik kamu chisu ik”? Isay kadingap wipwila kulep kwa chisu chikusalay mu kuyilej antu alikina kutesh uruu wa dipandish dia Yehova. Pakwez, ndiy wasota kwijik kulep kwa chisu cha mwikadil wa mayej ma mu spiritu ma antu akudandamena kukwatish usany dijin dia Nzamb.

Isay 7:3, 4—Ov, mulong wak Yehova wamupandisha Mwant Akaz muntu muyimp? Mwant wa Siria ni wa Isarel apungana kumumwang Mwant Akaz wa Yuda mu want ni ateka pa ndond yend kabung wau chakwel ayikela, mwan wenday Tibel—ikundj wakad kwikal wa ku dijuku dia David. Mpung yiney ya Djabul yadinga nich diloz dia kukaturij kusal kwa manswik ma Want masukau ni David. Yehova wamupandisha Akaz mulong wa kulam dijuku kukezay kwezin ‘Mwanat wa Chisambu.’—Isay 9:6.

Isay 7:8—Ov, mutapu ik ‘wamupalangeshau’ Efirayim mu mivu 65? Kuyitwal mu uyong antu a mu want wa tubil dikum ni kulet angendj apagan izula mwi ngand kwasambisha “mu machuku menday Pekak mwant wa in Isarel,” kachisu kakemp kwinyim kwa kulond uprofet winou. (2 Ant 15:29, Les Saintes Écritures — Traduction du monde nouveau) Kwadandamena djat mu machuku ma Mwant Esar Hadon wa in Asiri, mwan ikundj ni nswan wa Senakerib. (2 Ant 17:6, NW; Ezra 4:1, 2; Isay 37:37, 38) Kudandamen kwa kuyishemunin antu kudi in Asiri kuyitwal ni kuyidiosh mu Samaria kwasadika mu chirung cha mivu 65 yijimbwilau mu Isay 7:8.

Isay 11:1, 10—Mutapu ik wikalay Yesu Kristu ‘mutiy usu uminyina ku dishin dia Yese’ ni mudi “muj wa Yese”? (Rome 15:12) Yesu wadinga wa ‘ku dishin dia Yese’ mu kuvadik kwend ku mujimbu wa mbij. Wadinga wa mu dijuku dia Yese kusutil kudiay David mwan ikundj wa Yese. (Mateu 1:1-6; Luka 3:23-32) Pakwez, kutambul want kwadinga ni usu padi Yesu ni angakend. Chatambulay usu ni ulabu mulong wa kuyinkish antu aziyidila mwom wa chikupu pa divu, Yesu wikala ‘Tatuku wa Chikupu.’ (Isay 9:6) Chawiy kand chidiay “muj” wa angakend, pamwing ni Yese.

Malejan Kudi Etu:

Isay 1:3. Kulik kushakam kukwatijan nich yijil ya Sakatang wetu kudi kuburen manangu mudi ngomb ni chimbur. Ku mutambu ukwau, kusanger mulong wa yawonsu yatusadilay kal Yehova kukez kutukangesh kusal yom wakad kwov kurumburik ni tukezap kumulik.

Isay 1:11-13. Misambu ya rubabek ya chirelijon ni malembil ma chamwamu yikat kumwovish Yehova kuyip. Yisal ni malembil metu yifanyidin kudiokal ku yibachikin ya muchim utentamina.

Isay 1:25-27; 2:2; 4:2, 3. Uswik ni kusheshik kwa Yuda yadinga ya kupwa pa chisu chachirikau in Isarel amwing ashalap ni kukarumuk ku Yerusalem ni kuchirish difukwil diakin. Yehova ukat kuyanaken nakash akayitil akarumukina.

Isay 2:2-4. Kusal kwetu nich mushiku mudimu wa kulejan Want ni wa kwikadish in kwilej kukat kuyikwash antu a michid kushalijan kwilej jinjil ja chisambu ni kwikal mu chisambu umwing ni mukwau.

Isay 4:4. Yehova ukudiosh, ap kupwish, kwijond mu ngikadil ni kufa nich ku mash.

Isay 5:11-13. Ang muntu walik yijil ni kwisikan mu kutond kwend mutapu wa kwipuwangesh, ulikin kusal kwambatan nich ronganyin.—Rome 13:13.

Isay 5:21-23. Amakurump in Kristu, ap atulam, afanyidin kwipuk kwikal in “manangu” ku mes kwau ayinau. Afanyidin niyawiy kusadil kwisikan mu kuna “maar ma nviny” ni kafanyidinap kwikalang ni kasolikany.

Isay 11:3a. Chilakej cha Yesu ni malejan mend yimekeshin anch kumwov Yehova wom kuletining musangar.

“[YEHOVA] UKEZ KAYANAKEN ANTWEND IN ISAREL”

(Isay 13:1–35:10)

Shapitre wa 13 djat ku shapitre wa 23 madi mazu pantaliken ni michid. Pakwez, “[Yehova] ukez kayanaken antwend in Isarel” pakuchirishay michid yawonsu ya Isarel kwolikwau. (Isay 14:1) Uruu wa kusheshik kwa Yuda udia mu shapitre wa 24 djat ku shapitre wa 27 aulondil pamwing nich mazu ma kushilamu kwa kuchirishiu. Yehova umekeshin ujim wend pantaliken nau “[in Isarel] akwachikina maar” mulong wa kusuk kwau manswik nend Siria ni “aruu a Nzamb ni in kupesh” a ku Yuda mulong wa kuswik kwau manswik nend Asiri. (Isay 28:1, 7) Riyind padiay “Ariel [Yerusalem]” mulong “akat kuya ni kusot ukwash kudi in Idjibit” mulong wa kuyichidij. (Isay 29:1; 30:1, 2) Chikalap nchik mwamu, dipandish diadinga dia antu amwitiyijina Yehova.

Yehova ukez kulam “mukandu wa Sion,” mudi ‘musamb a ntambu wonina pa nnam wend wakwatangay kal.’ (Isay 31:4) Kudi kand kushilamu kunoku: “Dichuku dimwing Mwant umwing ukez kayikel nich win yakin.” (Isay 32:1) Ap anch in Asiri amufunyina Yuda ap “muruu wa chisambu” mu chilik cha kumudidish ni kuzengol, Yehova washilamu anch ukez kuyok antwend, “chad yitil yawonsu akez kayilikishin.” (Isay 33:7, 22-24) “[Yehova] uyijimedin michid yawonsu pamwing ni yisak yau ya njit.” (Isay 34:2) Yuda kakezap kumushesh. “Mpay yikez kasangar, ni yisalamb yikez katupuk mwi ngand yiumidila.”—Isay 35:1.

Yakul ku Yipul Yipwilau Piur pa Bibil:

Isay 13:17—Mutapu ik in Mediy kabangakup kwau utad wa argent, ap kwov ris ra utad wa or? In Mediy ni in Peris adinga kuman katumb ka kuyikwat antu akwau mudi kapandikenamu kusend yom yibuwinau kwi njit. Mwamu chadinga ku mutambu wa Sirus, muntu wayinkisha in Isarel achirika kudiokal mu uswik utad wa or ni yom ya kusal ya argent yabuway Nebukadinezar mu tempel wa Yehova.

Isay 14:1, 2—Ov, mutapu ik wikalau antu a Yehova ‘in kuyikwat ni kuyitwal mu winkwal michid yayikwata ni kuyitwal mu winkwal’ ni kuyiyikel “michid yayizengolanga”? Chom chinech chawanyina kudi antu mudi Daniel, wadinga nich ndond ya piur nakash mu Babilon mwishin mwa in Mediy ni in Peris; Ester, wikala mwant mband wa in Peris; ni Maridoke, watondau mudi nswan-mulapu mu Want wa Peris.

Isay 20:2-5—Ov, chakin kamu Isay wenda kanzikis mu mivu yisatu? Chitwishikin kamu anch Isay wadjola ching kabwik wend kusu ni wenda “udjit kwa kwipipesh.”—1 Samwel 19:24, NW.

Isay 21:1—Mwab ik ujimbwilau anch “mpay [ya karung]”? Ap anch Babilon wadinga chakin kamu kulemp ni karung, mwamu mumwisambidinau. Chidi mulong mem mavud ma wiit wa Efrat ni Tigre madinga ni kwizulijan mu mwab pa muvu ni muvu, masala mudi “karung” mukutwishau kwend ra pansh.

Isay 24:13-16—Ov, mutapu ik wikalau in Yuda “ku michid yawonsu pa mangand. . . . mudi mitond yarukumunau kal mpach, ap mudi mitond ya nviny yarukumunau kal mabuj mawonsu”? Mudi kamu mukata kushal mabuj mamwing ku mutond ap nviny kupwa kwa kwangul, ching kusu antu akemp awiy akeza kupand ku disheshik dia Yerusalem ni Yuda. Yikalap nchik ndond yayitwalau in kupand, yikala ku “mutambu wa kwingangel [kwa Babilon]” ap “ashicha pa matung [ku Mediterane],” akez kamushiman Yehova.

Isay 24:21—Ov, anany adia “in dikand a mwiur” ni “anyikel . . . a pansh”? “In dikand a mwiur” akutwish kwikal nich usu uyimp wa aspiritu ayimp. Chad “anyikel . . . a pansh,” adi anyikel a pansh, akatau kuyikel kudi ayilembil.—1 Yohan 5:19.

Isay 25:7—“Didj dia ushon diadinga diyibwikina antu a michid yawonsu” dirumburikin ik? Chifanikesh chinech chisambidin akankuny ajim aad a antu—chitil ni rufu.

Malejan Kudi Etu:

Isay 13:20-22; 14:22, 23; 21:1-9. Dizu dia uprofet dia Yehova dikat ching kusadikang, mudi muchadinga ku mutambu wa Babilon.

Isay 17:7, 8. Ap anch in Isarel avud alika kutesh, antu amwing amuchingejina Yehova. Chawiy chimwing, in Kristendom amwing akat kwitiyij uruu wa Want.

Isay 28:1-6. Isarel ukez kuwil mu makas ma Asiri, pakwez Nzamb watala pa mulong winou anch antu ashinshamena apanda. Dirumburish dia Yehova dikatap kuyisha antu atentamina pakad ruchingej.

Isay 28:23-29. Yehova ukat kuyonan antu akin kukwatijan nich yiswiridinau ni ngikadil yau.

Isay 30:15. Chakwel anch Yehova atupandisha tufanyidin kumekesh ritiy kusutil ku ‘kwiswedish,’ ap kudiul, ni kulik kukimb dipandish ku yitenchik ya antu. Anch twikal “akash,” ap kulik kwov mwong, tukumekesh kand kuchingejin kwetu mu usu wa Yehova wa kutuchidij.

Isay 30:20, 21. Tukat ‘kumuman’ Yehova ni ‘kutesh’ dizu diend dia dipandish kusutil ku kutesh yilondilay mu Dizu diend diapepilay, Bibil, ni kusutil kudiay “kashalapol ushinshamena ni kubabal.”—Mateu 24:45.

Uprofet wa Isay Ukasikeshin Ruchingej Retu mu Dizu dia Nzamb

Tufanyidin kumujikitish Nzamb mulong wa uruu udia mu buku wa Isay! Uprofet wawanyina kal ukat kukasikesh ruchingej retu anch ‘mazu mabudikininga mu kan ka Yehova kimakutwishap kukangany.’—Isay 55:11.

Chad chidi nchik piur pa uprofet wisambidina Mesia, mudi uprofet udia mu Isay 9:7 ni 11:1-5, 10? Ov, ukasikeshinap ritiy retu mu yitenchik ya Yehova mulong wa dipandish dietu? Buku winou ukwet kand uprofet uvud uwanyidina mu chirung chetu chinech ap ukuwanyina piswimp ap. (Isay 2:2-4; 11:6-9; 25:6-8; 32:1 2) Chakin kamu, buku wa Isay uwejidin ku uman ulondila anch “dizu dia Nzamb didi diom”!—Hebreu 4:12.

[Chipich chidia pa paj wa 6]

Isay nau an end adinga “aruu kudi in Isarel”

[Chipich chidia pa paj wa 7]

Yerusalem wading ufanyidin kwikal ‘mudi kachikumbu mu chir cha mitond ya nviny’

[Chipich chidia pa paj wa 8]

Mutapu ik uyikwashinau antu adiokila ku michid yawonsu kuchil “jimpak jau ja misamun kwikal jinkasu”?