Angatan—itiyijany Umutu Wa Kristu

“Mutu wa muntu [ikundj] wawonsu ndiy Kristu”—1 KORINT 11:3.

1, 2. (a) Mutapu ik ukutwisha kwisik kutwish kwa ngatan? (b) Ov, mulong wak chidi cha usey kwitiyij anch Nzamb ndiy watenchika uruw?

MUTAPU ik ukutwisha kwisik kupandakan kwa ngatan? Ov, chidi kusutil ku ukaliweny wend wa manangu ap wa ku mujimbu? Ov, chidi kusutil ku kuman kwend nfalang? Ap anch chidi kusutil ku rukat rend ni mutapu wa ranaken ukatay kumusadil mukajend ni an end? Kukwatijan nich chipul chinech cha nsudiel, angatan avud akangeny nakash, mulong spiritu wa mangand ni yany ya antu yikat kuyitakel. Mulong wak? Nakash kamu chiding mulong wa kukangany kwau kwitiyij ni kusadil yiletinay Muntu watenchika uruw—Muntu “wanona rubavu ra muntu ikundj, wamutanga nich mband, wamupan kudi ikundj.”—Disambishil 2:21-24.

² Yesu Kristu waleta kashinsh ka rusangu riner ridia mu Bibil rilejena mutapu watenchikay Nzamb uruw, payakulay in kumununganijan a pa chirung chend anch: “Kand kal utanganyip anch, wayitanga pakusambish watanga ikundj ni mband, walond anch: ‘Mulong wa chinech ikundj ukez kamusha tatukwend ni makwend, ukez kilimikin kudi mukajend; ni awiy aad akez kwikal mujimbu umwing?’ Chawiy awiy kadip aad, pakwez ikalang kal mujimbu umwing. Chawiy chabombakeshay kal Nzamb wachinung [mu uruw], pikil muntu wachauril.” (Mateu 19:4-6) Chidi cha usey kwijik anch chakwel kwikal nich uruw uwamp chidi cha usey kwitiyij anch Nzamb ndiy watenchika uruw ni kupandakan kwau kwimedin pa kusadil yiyul yidia mu Dizu dia Nzamb, Bibil.

Chikutwisha Kumukwash Ikundj Kutwish

3, 4. (a) Mutapu ik washikenay Yesu kwikal nich ronganyin rijim piur pa uruw? (b) Nany udia mband wa chifanikesh wa Yesu, ni mutapu ik ufanyidinau angatan kuyisadil akajau?

³ Chom chikutwisha kumukwash ikundj chakwel atwisha chidi kwilej yalonday Yesu ni kusadil Yasalay. Ronganyin rend pa mulong wa uruw ridi rijim, mulong ndiy wadingaku pa chisu chayitangau antu aad a kusambish ni pa chisu cha uruw wau. Yehova Nzamb wamwela anch: “El tumutanganyap muntu mu chifu chetu, ukufanakana ni yetwetu.” (Disambishil 1:26) Inge, Nzamb wadinga ni kwisamb ni Muntu Watangay kurutu kwa muntu win mwawonsu ni kurutu kwa chom chin chawonsu ni muntu winou wadinga “nend pamwing mudi mwant wa mudimu.” (Jinswir 8:22-30) Muntu winou udi “Mwanat wa yom yawonsu yatangau.” Ndiy udi “disambishish diatangay Nzamb,” wadingaku kurutu kwa kutang mangand mamekena.—Kolosai 1:15; Kuburik 3:14.

⁴ Yesu amutazukining anch “Mwan a mukoku wa Nzamb,” ni amufanikeshin kand mudi ngatan. Mwangel umwing walonda anch: “Ez kunoku, am nikukulej ngachik, mband wa Mwan a mukoku.” (Yohan 1:29; Kuburik 21:9) Ov, nany udia ngachik wend, mukajend? “Mband wa Mwan a mukoku” udi chisak cha in kwilej in Kristu azizidilau many, akeza kwikal nend mu winyikel wend mwiur. (Kuburik 14:1, 3) Chawiy lel, mutapu wadingay Yesu ni kuyisadil in kwilej end padingay pamwing nau pa divu udi chilakej kudi angatan piur pa mutapu ukuyisadilau akajau.

5. Yesu udi chilakej kudi anany?

⁵ Chakin, Yesu amulejen mu Bibil mudi chilakej cha in kwilej end, mudi mututangina anch: “Kristu kand wakumenanya en mar, wakushilanya chilik chakwel ulondulany mu ruzau rend.” (1 Pita 2:21) Pakwez, ndiy udi, chilakej cha pakampwil, kudi amakundj. Bibil ulondil anch: “Mutu wa muntu wawonsu ndiy Kristu; ni mutu wa mband ndiy ikundj; ni mutu wa Kristu ndiy Nzamb.” (1 Korint 11:3) Mulong Kristu udi mutu wa ikundj, angatan afanyidin kumwimburij. Chawiy lel, chifanyidin kusadil chijil cha umutu anch usotilany anch dijuku dien dikala nich chisambu. Pa chinech, angatan aswiridin kuyisadil akajau mu mutapu umwing wa rukat mudi mukatay Yesu kumusadil mukajend wa chifanikesh, in kwilej end azizidilau many.

Mutapu wa Kupwish Milong mu Uruw

6. Mutapu ik ufanyidinau angatan kushakam ni akajau?

⁶ Mu mangand m’ilel ma kanvundangesh, angatan aswiridin pakampwil kusadil chilakej cha Yesu cha kushimpish, cha rukat, ni kujijaman mu kusadil yijil yitentamina. (2 Timoteu 3:1-5) Piur pa chilakej chashay Yesu, tutangin mu Bibil anch: “Ni yen amakundj kand chawiy chimwing, sokany nau akajen mudi mudia ronganyin.” (1 Pita 3:7) Mwaning, angatan aswiridin kupwish milong mu uruw nich ronganyin, mudi mwapwishay Yesu milong. Yesu wamana yoziu yikash kumupandakanamu muntu ap wisu, pakwez ndiy wadinga wij anch Satan, ayilembil end, ni mangand minam mayimp awiy adinga musul wa yoziu yiney. (Yohan 14:30; Efesus 6:12) Yesu kadingap ni kukashimuk yoziu, chawiy kand ambay atijadina niyawiy kafanyidinap kukashimuk pamenau “milong ya mangand.” Bibil uyilejin antu atijadina anch akez kuman milong yiney.—1 Korint 7:28.

7, 8. (a) Yik yitinau chakwel kushakam ni amband mudi mudia ronganyin? (b) Ov, mulong wak chifanyidina kuyilimish amband?

⁷ Bibil ulondil anch, angatan afanyidin kushakam ni akajau mudi “mudia ronganyin, panangany kalimish kudi amband mudi chiwijany anch awiy anipandiken en kuziy.” (1 Pita 3:7) Pa ndond pa kumuyikel nayimp mukajend, mudi mwasambelay kulond Bibil anch mwamu mukezau kusal amakundj avud, ngatan witiyikina kudi Nzamb, ufanyidin kumulimish mukajend. (Disambishil 3:16) Ndiy ukusot kumusadil mukajend mudi chom cha usey nakash, kakusadilap usu wend ujim wa ku mujimbu mulong wa kumusal nayimp. Pakwez, ufanyidin kuta muchim pa yovil yend, kumusadil chisu chawonsu nich kalimish ni katumb.

⁸ Ov, mulong wak ufanyidinau angatan kuyinkish akajau kalimish kafanyidina? Bibil wakwil anch: “Mulong niyau adi answan a mwom pamwing ni yenen. Salany mwamu chakwel kangal kwikal chom cha kukangesh kulembil kwen.” (1 Pita 3:7) Angatan afanyidin kwijik anch Yehova kakatap kumuman ikundj umwifukwidila mudi umupandikenamu mwi njil ap yimwing mband ukata kumwifukwil. Amband itiyijinay Nzamb akez kutambul pamwing ni amakundj difut dimwing dia mwom wa chikupu—avud akez kwikal ni mwom mwiur, kwinikwa “kwikil ikundj ap mband.” (Galatia 3:28) Chawiy lel angatan afanyidin kuvurik anch kudi kushinshaman kwa muntu ipend kukata kumwikadish wa usey kudi Nzamb. Chidiap anch mulong muntu udi ikundj ap mband, ngatan ap ngachik, ap mwan.—1 Korint 4:2.

9. (a) Mulong wak ufanyidinau angatan kuyilimish akajau? (b) Mutapu ik wamekeshay Yesu kalimish kudi amband?

⁹ Kuswir kwa ngatan kwa kumusadil mukajend nich kalimish akukasikeshidin mu mazu ma nsudiel ma Pita anch, “kangal kwikal chom cha kukangesh kulembil kwen.” Kukangesh kulembil kwa mutapu winou kudi kwa ubaj! Kukutwish ap kushikij ku kukangesh malembil ma ngatan, mudi muchayishikena atushalapol amwing a Nzamb in kudiul a pakur. (Kudil kwa Jeremiy 3:43, 44) Chidi cha manangu anch amakundj in Kristu—angatan ni asotila kwatan—ileja mutapu Yesu wayisadilay amband nich kalimish. Wayaka nawamp mu chisak chadinga ni kumutwal mu mujikit, ni wayisadila nich ranaken ni kalimish. Dichuku dimwing, Yesu wajingunina uyakin umwing ukash kudi amband bil, wayileja kuya ni kuulejan kudi amakundj!—Mateu 28:1, 8-10; Luka 8:1-3.

Chilakej cha Pakampwil Kudi Amakundj

10, 11. (a) Ov, mulong wak angatan aswiridin kwilej chilakej cha Yesu? (b) Ov, mulong wak ufanyidinau angatan kuyikat akajau?

¹⁰ Mudi mutwalondang kwiur oku, Bibil, ufanikeshin urund udia pakach pa ngatan ni mukajend mudi udinga pakach pa Kristu ni “ngachik” wend, udia chikumangen chend cha in kwilej azizidilau many. Bibil ulondil anch: “Ikundj ndiy mutu wa mband, mudi chidiay Kristu mutu wa chikumbu cha Nzamb.” (Efesus 5:23) Mazu minam mafanyidin kuyikasikesh angatan kushinshikin mulad wa umutu, ap wa umutakel, wasadilay Yesu padi in kwilej end. Ching anch ashinshikin mutapu wasalay, chawiy lel angatan akez kutwish kulondul nawamp chilakej cha Yesu ni kuyitakel nawamp akajau, nich rukat, kuyilam, mudi mwasalay Yesu mulong wa chikumangen.

¹¹ Bibil ukasikeshin anch: “Amakundj, yikatany akajen mudi Kristu chakatay chikumbu cha Nzamb ni kwipaniku amwinend.” (Efesus 5:25) Mu shapitre usambedilaku wa Efesus, “chikumbu cha Nzamb” achitazukin anch “mujimbu wa Kristu.” Mujimbu winou wa chifanikesh ukwet yid yivud amakundj ni amband, awonsu inay asadin mulong mujimbu wawonsu usala nawamp. Chakin kamu, Yesu, udi “mutu wa mujimbu, wawiy chikumbu cha Nzamb.”—Efesus 4:12; Kolosai 1:18; 1 Korint 12:12, 13, 27.

12. Mutapu ik wamekeshay Yesu rukat mulong wa mujimbu wend wa chifanikesh?

¹² Yesu wamekesha rukat mulong wa mujimbu wend wa chifanikesh, ‘chikumangen,’ pakampwil mu mutapu umwing uwamp wasadilay yisakin ya antu akeza kwikal yid ya chikumangen. Chilakej, paziyau in kwilej end, Yesu walonda anch: “Ezany kwi ndond ya ku chan ukiswedishanyiku pakemp.” (Mako 6:31) Parumburilay mijikit ya Yesu asaa akemp kurutu kwa rufu rend, umwing wa atwimbuy end wafunda anch: “Yesu wading uyikatil ayend [charumburik anch, yid ya mujimbu wend wa chifanikesh] . . ., ndiy wayikata djat ni kwisudiel.” (Yohan 13:1, Manswik Masu) Chidi chilakej chiwamp chayishilau angatan kudi Yesu piur pa mutapu wa kuyisadil akajau!

13. Chiyul ik chiyinkishinau angatan mulong wa kuyikat akajau?

¹³ Chadandamenay kwisambin chilakej chashay Yesu mulong wa angatan, kambuy Paul wayileja anch: “Chawiy mwamu amakundj ni yau ayikata akajau mudi mijimbu yau ayinau. Mwawonsu umukatila mukajend ndiy wikatil amwinend. Mulong kwikiling muntu ukisining mujimbu wend amwinend; pakwez ukat kuudish ni kuulam mudi mukat kulamay Kristu chikumbu cha Nzamb.” Paul wawejinaku kand anch: “Chawiy ni yenen kand muntu ni muntu amukata mukajend mudi mwikatilay amwinend.”—Efesus 5:28, 29, 33.

14. Mutapu ik ukatay ngatan kusal piur pa kurumbuk kwa mujimbu wend, ni chilejen ik piur pa mutapu ukutwishay kumusadil mukajend?

¹⁴ Tongin bil mazu ma Paul. Ov, ikundj ukweta manangu mawamp ukutwish witap chitat pa mujimbu wend? Ov, pakatay muntu kwipwakal ku muny ujim wa ku mwend, ov, ukat kuubulang mulong anch wamuwishang? Bwat! Ov, ngatan ukutwish kwikwatish amwinend usany kurutu kwa arund nend ap kulond piur pa kurumbuk kwend? Bwat! Ov, mulong wak lel, ukutwishay kumutap mukajend nich mazu makash, ap kumutap chitat ku mujimbu, anch warumbuk? Angatan kafanyidinap kutal ching kusu yisakin yau pakwez kutal kand ni yisakin ya akajau.—1 Korint 10:24; 13:5.

15. (a) Chilakej ik chashay Yesu pamekeshau in kwilej end kuziy kwa mujimbu? (b) Malejan ik tukutwisha kwilejin ku chilakej chinech?

¹⁵ Shinshikin mutapu wamekeshay Yesu kuyibangin in kwilej end uchuku wasambela dichuku dia rufu rend, pamekeshau kuziy kwa mujimbu. Chikalap nchik kuchirikin kuyilej anch alembila, alala tul tupamp tusatu mu chir cha Getiseman. Kukashimuk, ayombamu kal kudi amasalay. Yesu wayipula anch: “Umusotilany nany?” Pamwakulau anch: “Yesu wa ku Nazaret,” ndiy wayakula anch: “Yam ndiy.” Chijikay anch ‘chisu cha rufu rend chawanyin kal,’ ndiy walonda anch: “Chawiy anch lel winsotilany am, yilikany kwau inang aya.” Yesu kalikap ap pakemp kubangin kuwap kwa in kwilej end—chikunku cha mujimbu wend wa chifanikesh—ni wasala chakwel anch in kwilej end aya kwau. Kusutil ku kwilej mutapu wayisadilay Yesu in kwilej end, angatan akez kutan yijil yivud yikutwishau kusadil mu mutapu wa kuyisadil akajau.—Yohan 18:1-9; Mako 14:34-37, 41.

Rukat ra Yesu Ridiap Yovil ya Chamwamu

16. Mutapu ik wiyovay Yesu piur pa Marta, pakwez mutapu ik wamupupay?

¹⁶ Bibil ulondil anch: “Yesu wading umukatil Marta ni mwanamakwend mband ni Lazar,” adinga ni kumwak chisu ni chisu kwolikwau. (Yohan 11:5) Chikalap nchik mwamu, Yesu kidjidjekap kumuyul Marta chisu chakwatikanay nakash nich kwisuk yakudia, yadinga yimusutishidina chisu mulong wa kutambul malejan ma mu spiritu. Yesu walonda anch: “Marta, Marta, ey udi mwin kutongam ni kwiyakamish ku yom yivud; pakwez kudi chom chimwing chiswiridinau.” (Luka 10:41, 42) Pakad kwidjidjek uman wa rukat rend mulong wa Marta waswapesha chakwel anch, itiya chiyul chend. Chawiy chimwing, angatan afanyidin kuyisadil akajau nich ranaken, mu mutapu wa rukat, nich kusadil mazu mawamp. Pakwez, anch kudi kuswir kwa dipup, chifanyidin kwisambin patok mudi mwasalay Yesu.

17, 18. (a) Yesu wamupupa Pita mutapu ik, ni mulong wak Pita wading uswiridin dipup? (b) Yisend ik yikwetay ngatan?

¹⁷ Dichuku dikwau, Yesu wayirumburila atwimbuy end anch chimufanyidin kuya ku Yerusalem, kukumuzengolau kudi “amakurump ni in kupesh ajim ni in kufund, ni kumujip, ni kusanguk pa dichuku dia kasatu.” Pa chinech Pita wamupwitina Yesu kuns ni wasambisha kumupup, walond anch: “Chikapul chiya mwa kudi ey Mwant; chinech kangal chikasuta kudi ey.” Choviken anch, yovil ya Pita yafuwalesha yitongijok yend. Pinap kwading kuswir kwa dipup. Chawiy Yesu wamwela anch: “Suta kwinyim kwam, Satan, ey udi chom cha kwimpwakesh am; kiukat kuvurikip yom ya Nzamb, ching ya antu.”—Mateu 16:21-23.

¹⁸ Yesu walonda kamu rusot ra Nzamb—pakampwil, anch chadinga chimufanyidin kuman mar makash ni kumujip. (Kuseng 16:10; Isay 53:12) Chawiy Pita warumbuka pasambishay kumupup Yesu. Inge, Pita wading uswirikedin dipup, mudi mutuswiridininga etu awonsu pa yisu yimwing. Mudi mutu wa dijuku, ngatan ukwet ulabu ni chisend cha kuyipup yid ya dijuku, pamwing ni mukajend. Ap anch kujijaman kuswiridikin pa yisu yimwing, dipup dined chifanyidin kudipan nich ranaken, ni riy. Mudi kamu mutapu wamukwashau Pita kudi Yesu, chakwel amana yom mu mutapu uwamp, pa yisu yimwing angatan aswiridin kusal chilik chimwing pantaliken ni akajau. Chilakej, ngatan ufanyidin kumulej mukajend patok mu mutapu wa ranaken mulong wak kudi kuswir kwa yitenchik kanang mu mutapu wend wa kudjal ni kwileng anch yidiap kand kwa kwikepish mudi mulondilau mu Bibil.—1 Pita 3:3-5.

Chidi cha Ukwash Kudi Angatan Kushimpish Muchim

19, 20. (a) Mulong ik wadinga pakach pa atwimbuy a Yesu, ni aupwisha mutapu ik? (b) Usu wa Yesu wadinga ni yibudikin ik?

¹⁹ Anch kudi chilim chiswiridina kuta muchim, angatan kafanyidinap kuchingejin anch usu ukusalau mulong wa kutenchik yom ukwikal ni yibudikin kapamp kamwing. Chamwita Yesu kusal usu nakash chakwel kutenchik yitongijok ya in kwilej end. Chilakej, ntad jalanka pakach pau jamekana kand kwisudiel kwa mujikit wa Yesu. Atadikijana mulong wa kwijik nany pakach pau udia mujim. (Mako 9:33-37; 10:35-45) Padinga kand kal pasuta chisu chilemp, Yesu watenchika kusal nau pamwing musambu wa nsudiel wa Kusut kwa Yehova. Pa musambu winou, kwikil umwing wau wasala kulondulijan nich chishankur chau cha kwoyish mend ma akwau mikisina ni rufunfut. Pakwez Yesu wayowisha. Kupwa walonda anch: “Nakwinkishany kal chilik.”—Yohan 13:2-15.

²⁰ Angatan asadidila mwikadil wa kwikepish mudi wa Yesu akez chakin kamu kusadil mu kwovijan ni kuyikwash akajau. Pakwez kushimpish muchim kuswiridikin. Uchuku winiwa kamu wa musambu wa Kusut kwa Yehova, atwimbuy atadikijana kand pa mulong wa kwijik nany udia mujim. (Luka 22:24) Chisu chivud kuswimp mu manangu ni mu mwikadil kwitining chisu ni kusadikining pakemp-pakemp. Pakwez, chiding cha musangar anch kwikal yibudikin yiwamp, mudi muchadinga pakach pa atwimbuy!

21. Pa chisu chirishinau nich yikokujol ilel, yom ik yifanyidinau kuvurik angatan ni kusal?

²¹ Ilel, uruw ukat kurish nich yikokujol yikash kupandakanamu muchadinga pakur. Antu avud kakwatiningap nich usey ukash machip mau ma uruw. Chawiy lel, angatan, atongidining nsambishil ya uruw. Avurikining anch Nzamb ndiy wasambisha uruw, Yehova, Nzamb wetu mwin rukat ndiy wausala ni kuutenchik. Watutumina Mwanend, Yesu, chadingap kusu mudi Mwin Kutukol—Mupandish wetu—pakwez kand chadinga mulong wa kwikal chilakej kudi angatan.—Mateu 20:28; Yohan 3:29.

Ov, Ukwakul Nchik?

• Ov, mulong wak chidi cha usey anch twijika nsambishil ya uruw?

• Mutapu ik uyikasikeshinau angatan kuyikat akajau?

• Yilakej ik ya Yesu ya kuyisadil in kwilej end yilejena mutapu ufanyidinay ngatan kusadil umutu mudi wa Kristu?

[Chipich chidia pa paj wa 11]

Paziyau in kwilej end, Yesu wayimekeshina kalimish

[Chipich chidia pa paj wa 12]

Angatan afanyidin kuyiyul akajau nich ranaken, ni mazu mawamp