Tudandamenany kulejan!
1 Rusot ra Nzamb ridi anch “antu awonsu apanda ni kwijik uyakin.” (1 Tim. 2:4) Pa chinech, watwinkisha mudimu wa kulejan rusangu ruwamp. (Mat. 24:14) Anch twajingunin mulong wak tufanyidina kudandamen kulejan, kuziy ap yom ya ruzuwol tukutwisha kusankan yikutwishap kutuchirish kwinyim bwat.
2 Ov mulong wak kudandamen? Mu mangand mudi kuzuwol kuvud kukata kuyisal antu avuramena ap kupipej yom tukata kuyilej. Chawiy lel tufanyidin kudandamen kuyivurish rusangu ra dipandish. (Mat. 24:38, 39) Chikwau kand, mikadil mu mwom wa antu yikat kukarumukang chisu ni chisu. Ap mikadil ya mangand yikutwish kukarumuk mutapu umwing ujim mu uchuku umwing kusu. (1 Kor. 7:31) Diamashik, rubing rikwezap, ap ngond ukwezap, antu tukata kulej akutwish kusankan milong yikwau yisu ap milong yiyitadila yikutwisha kuyibachik kushinshikin nakash rusangu ruwamp tukata kuyitwadil. Ov udap mwin kujikitish anch Kaman wakuletila uyakin wading ni kudandamen?
3 Mulong wa kwilikej ranaken ra Nzamb: Yehova walikidila nich kushimpish muchim chakwel pasuta chisu kurutu kwa kushikij dirumburish diend padi antu ayimp. Kusutin kud etu udandamedin kutazuk antu atentamina kwez kudiay ndiy chakwel apanda. (2 Pita 3:9) Tukwikal ni chisend cha mash mu rufu ra antu anch tudandamedinap kulejan uruu wa ranaken wa Nzamb ni kuyibabesh piur pa kwez kwa dirumburish dia Nzamb piur pa awonsu alikina kukarumukin kulemp ni jinjil jau jiyimp. (Ezek. 33:1-11, NW) Ap anch kulejan kwetu kakatap chisu chawonsu kukutambul nawamp, tufanyidinap ap pakemp kuziy mu kusal usu win wawonsu chakwel kuyikwash antu a kashinsh kuman usey wa ranaken rijim ra Nzamb.—Midimu 20:26, 27; Rom 12:11.
4 Mulong wa kumekesh rukat retu: Yehova Nzamb, kusutin Yesu Kristu, ndiy wapana mbil ya kwel anch rusangu ruwamp arilejana pa divu pawonsu. (Mat. 28:19, 20) Ap anch antu alik kututesh, tukwet mutapu wa kumekesh rukat retu ni kwipan kwetu kud Nzamb nich kudandamen kusal yom yitentamina.—1 Yohan 5:3.
5 Tujijamanany kudandamen kulejan! Tuchisalany nich mushiku pitudia kal pa “dichuku dia dipandish” dia Yehova.—2 Kor. 6:2.