Tudandamenany mu Kulejan
Yisu yikash yidi kwaku. Njit ja an-a-ngand, njit ja michid, mar ma chivadik, ni yinship yikwau yikwatishena wom yisadikin kwawonsu. Katat chipandakenamu, dijuku dia ukauntu dikwet kuswir kwa rusangu ruwamp. Pakwez, kudiul kwa yom ya muspiritu kupalangen kwawonsu. Mu jindond jikwau, chikutwish kwikal chikasikena kutan antu ku chikumbu ni pamwing kand ap kutan antu akutwisha kututesh ap asotila kwilej Bibil. Ap mwamu, chidi cha usey anch tudandamenany mu kulejan rusangu ruwamp ra Want wa Nzamb wimikinau kal.—Mat. 24:14.
2 Rukat Mulong wa Antu: Kulejan kwetu kumekeshin rukat ra Yehova mulong wa antu. ‘Ndiy kasotilap muntu ap umwing kusheshik pakwez usotil antu awonsu ashiken ku kukarumuk.’ (2 Pi. 3:9; Ezek. 33:11) Chawiy, chakwatay mupak, mud mwalonday Yesu anch, “akez kasambil bil kulejan rusangu ruwamp ku michid yawonsu.” (Marko 13:10) Nzamb uyitin antu chakwel akarumukin kud ndiy ni kwiyep ku dirumburish diezina pa mangand ma Satan. (Jow. 2:28, 29, 32; Sof. 2:2, 3) Ov, tudiap in kujikitish anch Yehova utanduril mutapu winou kud etu?—1 Tim. 1:12, 13.
3 Rapor wa mangand mawonsu umekeshin anch mu muvu wa mudimu wa 2004, mwayen wa 6085387 wa malejan ma Bibil amatakedil ngond ni ngond, ni kwading mwayen piswimp 5000 wa in kwilej asu abatishinau rubing ni rubing! In kwilej asu inay amwing ipanina ayimana mud chibudikin cha chiyukish cha Yehova pa mujikit wa kudandamen wa in kulejan asadila usu wa kulond nau antu in awonsu mu materitwar mau mayinkishinau. Yiney yaletin musangar nakash mu yikumangen, ni didi dilau dijim nakash twitapidila dia kwikal ambay a mudimu ni Nzamb mu mudimu winou wa kupandish mwom!—1 Kor. 3:5, 6, 9.
4 Kushiman Dijin dia Nzamb: Tudandamedin mu kulejan mulong wa kumushiman Yehova patok ni kutumbish dijin diend kurutu kwa antu awonsu. (Heb. 13:15) Satan wadimbin kal “ngand ya kabuj” mu kwitiyij anch Nzamb kakwetap usu wa kupwish milong ya antu, anch ndiy kabanginap mar ma antu, ap anch kadiakwap kwend. (Kuj. 12:9) Kusutil ku kulejan kwetu, tukat kuchidij uyakin piur pa Tatukwetu mujim wa mwiur. Tudandamenany lel amboku kushiman dijin diend—katat ni chikupu ni chikupu.—Kus. 145:1, 2.