“Ulondulany mu Ruzau Rend”
1. Ov, mutapu ik tukwikala in kusal mudimu asongina mabuj?
1 Yesu kilejap ku mashikol ma alej a chijil a in Yuda, pakwez wadinga wijiken mu rusangu ra antu mudi mwin kusal Mudimu mujim. Cha musangar, rusangu rawonsu rafundau ra mudimu wa Yesu arilama mulong tutaninamu. Komb, pakwel anch twikala in kusal mudimu asongina mabuj, tufanyidin ‘tulondula mu ruzau rend.’—1 Pit. 2:21.
2. Yom ik yikutwisha kutukwash kuyimekeshin antu rukat mud radingay nich Kristu?
2 Yikata Antu: Rukat mulong wa antu ramubachika Yesu. (Mar. 6:30-34) Antu avud adia mu teritwar wetu ovil “kusansan” ni aswiridin nakash uyakin. (Rome 8:22) Kutongijokinang kwetu pa mashakamin mau makash ni pa rukat ra Yehova mulong wa awiy yikutubachik tudandamena mu kulejan. (2 Pit. 3:9) Chikwau kand, antu akutwish kwitiy chipandikena ku rusang retu ching anch ajingunin anch tuyibangidin.
3. Mu yisu ik yalejanay Yesu kud antu akwau?
3 Londany Chisu Chawonsu: Yesu wasadila chisu chawonsu chadingay nich mulong wa kuyilej antu akwau rusang ruwamp. (Mat. 4:23; 9:9; Yoh. 4:7-10) Chawiy kand, tuswiridin twirijeka mulong wa kuyilej antu uyakin pitusadila midimu yetu pichuku-pichuku. Amwing akat kulamang Bibil ni mikand yikwau ku makas chakwel atwisha kulejan padiau ku mudimu, ku shikol, payilau mu weny ap ni kuland yom, ap ku jindond jikwau.
4. Mutapu ik tukusala chakwel Want wikala mutu wa mulong wa kulejan kwetu?
4 Asin pa Want: Rusang ruwamp ra Want, rawiy radinga mutu wa mulong wa kulejan kwa Yesu. (Luka 4:43) Ap anch mambamb metu kimakutwishap majimbul kapamp kamwing ap anch majimbul Want, tukulam mu manangu anch tusotil tumukwasha mwin chikumbu amana maswir ma Want. Ap anch wajumbul mwikadil uyimp wa mangand umekeshina anch tudi mu machuku ma nsudiel, tukulejan chakusambish ‘rusang ruwamp ra yom yiwamp.’—Rome 10:15.
5. Chakwel anch tusonga mabuj mu mudimu wetu, Bibil ukwet usey ik?
5 Engamidin pa Dizu dia Nzamb: Yesu wikamena chisu chawonsu pa Mifund mu mudimu wend. Kalejanap yom yend amwinend. (Yoh. 7:16, 18) Wileja Dizu dia Nzamb ni wadisala amwinend pamwozau kud Satan. (Mat. 4:1-4) Chakwel anch niyetu tuyileja antu akwau nawamp, tufanyidin kutangang Bibil dichuku diawonsu ni kusadin yitutangina. (Rome 2:21) Chisu twakwila yipul mu mudimu, tufanyidin kujimbul Mifund yikasikeshina yitulondila ni kuyitang kamu mu Bibil anch chitwishikin. Tusotil chakwel mwin chikumbu amana anch kiyidiap yitongijok yetu pakwez yidi ya Nzamb.
6. Yomik yasalangay Yesu chakwel ayishik antu ku michim?
6 Shik ku Muchim Piulejena: “Pikil muntu walondap kal mudi chikat kulonday muntu mwinou.” (Yoh. 7:46) Mwawiy mwalondau atulal a amasalay mulong wa Yesu payipulau kud in kupesh ajim ni Afarise anch mulong wak wakanganyangau kumukwat. Pa ndond pa kulond yom ya chamwamu, Yesu wafundishanga mu mutapu ufanyidina kuyishik antu ku michim. (Luka 24:32) Wasadinanga yilakej yakin ya yom yasadikanga mu mwom mulong wa kukasikeshin yalondangay. (Mat.13:34) Yesu kayiruzukap in kumutesh end jinsang jivud. (Yoh. 16:12) Wayipwitina manangu mau padiay Yehova pakad kwitongin amwinend. Mud Yesu, tukutwish kwikal alej awamp anch twababal ‘pa kulejan kwetu.’—1 Tim. 4:16.
7. Mulong wak Yesu wadandamena mu kulejan?
7 Dandamen Chikwikalap Kulik Kusanger ap Rupompat: Ap anch Yesu wasala yilay, antu avud kamwitiyijap. (Luka 10:13) Ap anamakwend in a Yesu, amutongina anch “ndiy warumbanganang kal!” (Mar. 3:21, MM) Ap mwamu, Yesu wadandamena. Walama mwikadil uwamp mulong wading witiyijin chakin kamu anch ukwet uyakin ukutwisha kuyikol antu. (Yoh. 8:32) Niyetu tukudandamen pakad kulik nich ukwash wa Yehova.—2 Kor. 4:1.
8, 9. Mutapu ik tukumwimburija Yesu mu kwipan mulong wa kulejan rusangu ruwamp?
8 Ipana Nakash mu Mudimu: Yesu walika kwikal nich mapit ma ku mujimbu mulong wa kulejan. (Mat. 8:20) Walejana pakad kuziy, yisu yimwing djat ni uchuku. (Mar. 6:35, 36) Yesu wading wij anch ukwet chisu chiswimp cha kuwanish mudimu wend. Mulong “kwashal kal chisu chiswimp,” niyetu tuswiridin kupan chisu chetu, usu wetu ni mapit metu mu kumwimburij Yesu.—1 Kor. 7:29-31.
9 In Kristu a mu mivu chitot ya kusambish adinga in kusal mudimu akash mulong ilejina kudiay Yesu. (Mid. 4:13) Niyetu tukutwish kuwanish mudimu wetu anch twamwimburij mwin kusal Mudimu mujim wa mu rusangu ra muntu.—2 Tim. 4:5.