Rukat ritubachikin kulejan
1 Chitudia Atuman’a Yehova, atwij nawamp mulong wa mushiku wetu wa kulejan uruu wa Want. (Mat. 24:14) Antu amiliyon musamban ni kusut akat kusal mudimu wa kulejan mu mangand mawonsu; antu asu niyau akat kwiwejinaku pakatau kwibomb netu mu mudimu wa kulejan. Uvud wimanyidin pa dishin dia antu akata kusal mudimu winou.
2 Ov chom ik chitubachikina kusal kwa kwikatin mudimu ukash winou? Kakatap kutushindil bwat, tudiap apwitinau nich ukwash wa yom ya ku mujimbu, ap inkinau katumb kamwing ka pakampwil. Pakusambish, avud pakach petu twading ni kwovang wom mulong twading ni kutong anch kitufanyidinap bwat, ni antu kadingap ni kwakul nawamp. (Mat. 24:9) Antu avud akata kututal kateshiningap chom ik chitubachikina. Kufanyidin kwikal mulong umwing wa kashinsh utubachikina kujijaman.
3 Ukash wa rukat: Yesu wijikisha chijil chijim nakash cha mu yijil yawonsu palonday anch ‘tufanyidin kumukat Yehova nich muchim wetu wawonsu, nich mupim wetu wawonsu, nich manangu metu mawonsu, nich usu wetu wawonsu.’ (Mar. 12:30) Rukat retu mulong wa Yehova rijikin mij mu yitongijok ya kusanger mulong wendendiy ni mutapu udiay—Nyikel mwin Mangand Mawonsu, Sakatang wa yom yawonsu, ndiy “uwanyidina kutambul uyaj, ni katumb, ni ukash.” (Kuj. 4:11) Ngikadil yend yipandakena kuwap yidi ya piur nakash.—Kub. 34:6, 7.
4 Kumwijik Yehova ni kumukat kutubachikin kulik kutok kwetu kumunyik kurutu kwa antu. (Mat. 5:16) Kutok kwetu kukat kumunyik chisu tukata kumushiman kurutu kwa antu awonsu, chisu tukata kulond piur pa midimu yend yipandakena kuwap, ni kupalangesh uruu piur pa Want wend. Mud kamu mwangel ukata kutwik pakach pa diur, tukwet “rusangu ruwamp rushichinga chikupu mulong wa kuyirumburil . . . antu a mangand mawonsu, ni a michid yawonsu, ni a jindim jawonsu, chakin, kudi antu awonsu.” (Kuj. 14:6) Rukat retu udi usu ubachikina mudimu wa mangand mawonsu wa kulejan.
5 Antu a mangand amening kulejan kwetu mudi “usup” wakad kufanyin kutesh. (1 Kor. 1:18) Asadil usu nakash chakwel kwimik mudimu wetu. Rukat retu rishinshamena ratukasikeshin kulejan anch: “Mulong etu kitukutwishap kulik kulond yom yitwamana ni yitwatesha ayinetu. . . . Tufanyidin kumuziyil Nzamb kupandikan kuyiziyil antu.” (Mid. 4:20; 5:29) Mudimu wa kulejan udandamedin kuya kurutu ku mitambu yawonsu ya divu kwikalap nchik rupompat.
6 Rukat retu mulong wa Yehova ridi mud kasu kayemina katubachikina kurumburil yisalijok yend yikwamushena. (Jer. 20:9, NW; 1 Pit. 2:9) Tukudandamen “kuyijikish antu yisalijok yend . . . mulong wasala mutapu umwing upandakena”!—Isa. 12:4, 5, NW.