Tuyikwashany akwau kwez ku yikumangan
1 “Arund netu awonsu amutej . . . asotina kwez ku yikumangan ayitazukin nich chirungil kusal mwamu.” Ap anch kudiosh kwabudikina chijikish chinech mu nimero wa Phare de la Tour de Sion, wa Kalang 1880, Atuman’a Yehova akat kusal usu wa kuyitazuk antu chakwel akumangana pamwing mulong wa kwilej Baibel. (Kuj. 22:17) Chinech chidi chikunku cha usey cha difukwil diakin.
2 Chidi cha usey kukumangan: Kuding yiyukish anch twinung pamwing ni chikumangen. Tukat kwikal ni mutapu uwamp wa kumwijik Nzamb wetu upandakena kuwap, Yehova. Mu chikumangen, tukat kukumangan pamwing chakwel twikala “afundishinau kud Yehova.” (Isa. 54:13, NW) Dirijek diend dirijekin program wa chisu chawonsu wa kwilej Baibel, program ututekina piswimp ni ndiy ni kutwink ukwash uwanyidina mulong wa kusadin “chiyul cha Nzamb chawonsu.” (Mid. 20:27, TMK; Luka 12:42) Yikumangan yikat kutukwash kwilej ayinetu ukaliweny wa kufundish Dizu dia Nzamb. Yivurish yidiokila ku Mifund yitukwashining kwikal ni urund uwamp nau akwetu ni Yehova amwinend. Kwibomb pamwing ni antu amukatina Nzamb kukat kukasikesh ritiy retu.—Rom 1:11, 12.
3 Mutazuka kamu pa kapamp ka kusambish: Kudiosh kamu kapamp ka kusambish kwilej, mwita mwin kwilej Baibel mwawonsu kwez ku yikumangan. Langwish kusanger kwend nich kwambambin mulong umwing wakukasikeshina ku chikumangan chasutina ni kushinshikin yom yimwing yikwisambinau ku chikumangan chikulondula. Murumburila mutapu udia Chot cha Want, ni tal nawamp anch wij mutapu wa kuchiman.
4 Anch mwin kwilej Baibel kakumangenap kamu kapamp kamwing, dandamen kumutazuk. Rubing ni rubing itekinaku aminit akemp chakwel kumulej mutapu usadining dirijek dietu. Sadil broshir Les Témoins de Jéhovah—Unis pour faire la volonté de Dieu sur toute la terre ni band video Les Témoins de Jéhovah: un nom, une organisation chakwel iyijidisha netu ni yikumangan yetu. Mwendilany pamwing ni in kulejan akwau chakwel amwijik mwin kwilej. Mu kulembil kwey, mujikitisha Yehova mulong wa dirijek ni jimbul rusot ra mwin kwilej ra kwinungin ku dirijek dined.
5 Kangal widjidjek chakwel kuyikwash antu asu asangaredina kukumangan netu. Anch kusanger kwau mulong wa Yehova kukat kukul, akwikal abachikinau kusadil yom yikatau kwilej ni kwikal ku mutambu wa dirijek didia mu umwing dia Nzamb.—1 Kor. 14:25.