Dandamen “Kusal Yom Yiwamp”
1 Chidi chom chiwamp chiwasala pa kwikal kashalapol wa Yehova Nzamb. Pakwez, katat, chikasiken mu yirung yiney yikash kudandamen “kusal yom yiwamp.” (Gal. 6:9) Ap anch chitin usu wa kashinsh, ukutwish kuchisal. Ov mutapu ik?
2 Kudish Mwikadil wa Manangu Mud Wadingay Nich Yesu: Mud Yesu, ukutwish kujijaman ku yoziu anch wadandamen kamu kutal mes pa ruchingej ra Want. (Heb. 12:2, 3) Ijik anch Yehova ukukatin ni usotin ey upandakana. (2 Pi. 3:9) Tek ruchingej rey rawonsu mudi ndiy, ni kuchingej anch ukez kukukwash. (1 Kor. 10:13) Dandamen mu kulembil, mwita Yehova akukwasha kujijaman. (Rom 12:12) Sanger mu ritiy anch kujikish kwey kukez kukutwal ku mwikadil witiyikina ku mes ma Nzamb. (Rom 5:3-5) Kushinshaman kwey mu kukudish ‘mwikadil umwing wa manangu mud wadingay nich Kristu Yesu’ kukez kukuletin musangar nich kusangarish muchim wa Yehova.—Rom 15:5; Jinsw. 27:11.
3 Dandamen Kusal Midimu Yiwamp: Isakina sens yakudia yiletinay Yehova mulong wa kuyikwash antwend kudandamen kusal yiwamp. Lam chaku chiwamp cha kutang Dizu dia Nzamb ni kwilej mikand ya pa dishin dia Baibel ya chisak cha kashalapol wakin ukweta manangu. Irijeka kamu nawamp mulong wa kukumangan, kwikalaku ni kwakul mu yikumangan yawonsu ya chikumangen. Kurutu ni kupwa kwa yikumangan ya Ukristu, sal urund wa piswimp nau akadivar ni anambaz a muspiritu. Itekina jintong ja kashinsh mulong wa mudimu wey chakwel kubudikin nakash mu mudimu wa kulejan ni kurijek ukaliweny wey mu kulejan rusangu ruwamp kud antu akwau.
4 Winou wawiy mutapu ukutwisha kudandamen kusal yom yiwamp ni kumenaku musangar ujim pa chisu chinech kand. Pa chinech, mukadivar umwing mu Italie walonda anch: “Pa chisu chikata kuzwek muten, ni nikata kuchirikang ku chikumbu kupwa kwa kusutish dichuku diakabuj mu mudimu wa Yehova, chakin anch nikat kuziyang nakash. Pakwez nikweting musangar ujim, ni nikat kumujikitish Yehova mulong wa kwingikish musangar wakad muntu ap umwing kuupwish.” Chawiy lel, dandamen kusal yom yiwamp, ni yey ukez kuman musangar ujim.