Shal Piswimp ni Dirijek dia Yehova

MWIN kwilej Jakobu wafunda anch: “Sejany piswimp kudi Nzamb, chad niyend ukusej piswimp ni yenen.” (Jak. 4:8) Mwaning, Yehova kadingap kulemp mulong wa kutesh kulembil kwetu ap anch tudi antu akad kuwanyin. (Mid. 17:27) Mutapu ik tukutwisha kumusejin Nzamb? Tukutwish kumusejin anch twakasikesh urund wetu ni Yehova kusutin ku kusal malembil makin. (Kus. 39:12) Tukutwish kand kukasikesh urund wetu ni Nzamb kusutin kwilej Dizu diend, Bibil chisu chawonsu. Anch twasal mwamu, tukumwijik Yehova Nzamb, yom yitonginay kusal ni rusot rend piur petu. (2 Tim. 3:16, 17) Chawiy, tukwilej kumukat ni kwov wom wa kulik kusal yom yikutwisha kumunenganesh.—Kus. 25:14.

² Pakwez, tukutwish kumusejin Yehova kusutin Mwanend Yesu. (Yoh. 17:3; Rom 5:10) Kwikil muntu ukutwisha kutulej mutapu udingay Yehova kusutamu Yesu. Mulong ndiy umwij nawamp Tatukwend, chawiy walonda anch: ‘Kwikil muntu umwija Mwan, ching kusu Tatuku ndiy umwija. Kwikil muntu umwija Tatuku, ching kusu Mwan ndiy umwija, ni muntu ukatinay Mwan anch amwijik, ukumwijik.’ (Luka 10:22) Chawiy, anch twilej ma Evanjil mulong wa kwijik mutapu watongangay ni wiyovangay Yesu, tukutwish kwijik mutapu utonginingay ni wiyovilingay Yehova. Ronganyin mudi riner rawiy ritukwashina kumusejin Nzamb wetu.

³ Mwinshin mwa umutakel wa mwan a Nzamb, tukat kukudish urund ni Yehova pa kushal piswimp ni chikunku cha dirijek chimekena chitukwashina kwilej mutapu wa kusal rusot ra Nzamb. Mudi mwasambelau kulejan mu Mateu 24:45-47, Mwant Yesu Kristu wamutonda ‘kashalapol ushinshamena ni kubabal’ mulong wa kuyinkish in chikumbu cha ritiy “yakudia pa chisu chiwanyidina.” Nlel unou, kashalapol ushinshamena utwinkin yakudia yivud nakash ya mu spiritu kusutin mikand yimedina pa Bibil ni ma program ma yitentam ya munyingumuku ni ya rejon. Kusutil kashalapol winou, Yehova utuyudin kutang Dizu diend dichuku diawonsu, kukumangan ku yikumangan ya win Kristu pakad kujing ni kwipan nakash mu mudimu wa kulejan “rusangu ruwamp ra Want.” (Mat. 24:14; 28:19, 20; Jos. 1:8; Kus. 1:1-3) Tufanyidinap kwikal ni chitongijok chiyimp piur pa kashalapol ushinshamena. Tufanyidin kusal usu nakash wa kushal piswimp ni chikunku chimekena cha dirijek dia Yehova ni kuziyil kwi mbil ja dirijek dined. Chinech chikutusejish pinswimp ni Yehova Nzamb wetu, ni chikutukasikesh ni kutuchidij chikalap nchik mar.

MULONG WAK MAR MADANDAMEDIN

⁴ Pamwing ap udi mu uyakin pasutin kal mivu yivud. Anch chidi mwamu wij chakin kamu chirumburikina kujijamen yoziu. Pakwez anch washikedin kwey kumwijik Yehova kandikal palaba ni kwibomb nau antwend, wij nawamp anch Satan Djabul ukat kuyirishish antu awonsu aziyidina ukaleng wa Yehova. (2 Tim. 3:12) Chawiy ap anch ujijamedin yakamish machuku mavud ap bwat, ufanyidinap kwov wom ap kuziy nakash. Yehova wakana anch ukukukwash ni ukukupandish ni ukukwinkish mwom wa chikupu.—Heb. 13:5, 6; Kuj. 2:10.

⁵ Etu awonsu tukutwish kuman mar machuku minam mansudiel ma ditenchik dia Satan. Kudiosh kwasambishina Want wa Nzamb kuyikel mu muvu wa 1914, kamwitiyinap kand Satan kuchirik mwiur ku mes ma Yehova. Amudjibula pa divu pamwing nau angel end ayimp. Kupandakan kwa mar pa divu, kuwejinaku ni kuzengol kwa atushapol a Yehova, kudi chibudikin cha ujim wa Satan ni kumekeshin anch tudi mu machuku mansudiel mayikedilau antu nayimp.—Kuj. 12:1-12.

⁶ Mulong wa ujim wend wa kumwopat mwiur, Satan wij anch chisu chidi chikemp. Pamwing nau ayilembil end, usadin usu nakash mulong wa kukangesh mudimu wa kulejan ni kuyipish uumwing wa atushalapol a Yehova. Chinech chisadin anch twikala mwi njit ja mu spiritu jilejenau anch “kiturishinap nau antu a mijimbu ya mbij, pakwez tukat kurish nau in kutakel, nau in ulabu, nau akish ayikedila pa mangand minam mu chirung chinech cha mididim, ni yizwepwepu yikweta ukash mwiur.” Anch tukimbin anch Yehova atukwasha kuwin njit jinej, tufanyidinap kuziy kurish njit, pakwez tufanyidin kulam yom yetu ya njit ja mu spiritu. Tufanyidin ‘kwiman dang mulong wa kurish ni mitapu ya kudimban’ ya Djabul. (Efes 6:10-17) Chinech chitin anch tujijamana.

TUKUDISHANY KUJIJAMAN

⁷ Kujijaman kurumburikin “ukaliweny wa kurish nich kuziy ap mar.” Mu spiritu, kujijaman kurumburikin kwikal ni mwikadil wa kwiman dang mu kusal yom yiwamp chikalap nchik mar, rupompat, kuzengol ap yom yikwau yikutwisha kutukangesh kumushinshamen Nzamb. Tufanyidin kukudish kujijaman kwa win Kristu. Kusal mwamu kwitin chisu. Ukaliweny wetu wa kujijaman ukat kukul nakash anch tuyil kurutu mu spiritu. Anch twajijaman mu yoziu yikemp yikemp ya ritiy retu yikata kushiken chisu tukata kusambish kumusadin Yehova, tukat kwikal akash ni kutwish kujijaman mu milong yidia yikash yikushikena. (Luka 16:10) Tufanyidinap kuchingel anch yakamish yikala yijim chad lel tukwata mupak wa kwiman dang mu ritiy. Tufanyidin kukwat mupak winou kurutu kwa yoziu kushiken. Mulong wa kumekesh anch chifanyidin kukudish kujijaman pamwing ni mikadil yikwau ya win Kristu, kambuy Pita wafunda anch: ‘Salany usu chakwel uwejanyaku ku ritiy ren yaku yiwamp, ku yaku yiwamp ronganyin, ku ronganyin kwilam, ku kwilam kujijaman, ku kujijaman kwipan kwa winzamb, ku kwipan kwa winzamb rukat ra ukadivar, ku rukat ra ukadivar rukat.’—2 Pita 1:5-7; 1 Tim. 6:11.

⁸ Mu mukand wend, Jakobu utuvurishin usey wa kukudish kujijaman: “Anamakwam in Kristu, ovany musangar wakin piukumananya mar ma mitapu ni mitapu, mulong en wijany anch, kupak kwa ritiy ren kukat kumekesh muchim wa kudandamen. Chad muchim wa kudandamen ufanyidin kuwanyish mudimu wau chakwel wikalany antu akash awanyidina, wakad kuburen chom.” (Jak. 1:2-4) Jakobu ulondin anch in Kristu afanyidin kwitiy mar ni kumasanger mulong makat kutukwash kwikal ni kujijaman. Ov, niyey wawiy mutapu umena yom? Kupwa Jakobu walejana anch kujijaman kukwet mudimu wa kusal, charumburik anch kuwapish wuntu wetu wa win Kristu ni kwikal antu itiyinau kudi Nzamb. Inge, kujijaman kwetu kukat kukasikan dichuku ni dichuku pitudandamedina kurish ni kuwin milong yikash. Kujijaman kukat kulet mikadil yikwau yiwamp tukweta nich kuswir.

⁹ Yehova ukat kusanger kujijaman kwetu; ni chinech chikumubachik kutwinkish difut dia mwom wa chikupu. Jakobu ulondin kand anch: “Wayuk muntu ukweta muchim wa kudandamen pa chisu chikumanay mar, mulong ndiy wiminy dang mu chisu chamupakau. Ndiy ukez kutambul chibangul cha mwom chashilayimu [Yehova] kupan kudi antu amukatila.” (Jak. 1:12) Tujijamen mulong wa mwom utuchingedina machuku ma kurutu. Pakad kujijaman, tukutwishap kushal mu uyakin. Anch twawil mu yibachikin ya mangand, tukuchirik kand mu mangand. Pakad kujijaman, tukutwishap kudandamen kwikal ni spiritu wa Yehova ni kupwa tukwikalap kand ni dibuj dia spiritu mu mwom wetu.

¹⁰ Mulong wa kudandamen kujijaman mu yisu yiney yikash, tufanyidin kukudish chitongijok chiwamp piur pa mar makata kuyishiken in Kristu. Vurik anch Jakobu wafunda anch: “Ovany musangar wakin piukumananya mar.” Chiswapelap kusal mwamu, mulong yisu yimwing akutwish kutumesh mar mu manangu ap ku mujimbu. Pakwez vurik anch chidi mulong wa mwom wey wa machuku ma kurutu. Yom yayishikena atwimbuy yitukwashin kuman mutapu tukutwisha kusangar chisu tudia mu mar. Jinsangu jau jidi mu mukand wa Midimu, ni afundinamu anch: “Chad ayibul nfimbu, ayikand chakwel kangal akalond kand mu dijin dia Yesu. Chad ayilikishaku. Atwimbuy a Yesu adiokala ku dirumburish dijim. Awiy asangara nakash mulong Nzamb witiya awiy kuman mar mulong wa kumwambat Yesu.” (Mid. 5:40, 41) Atwimbuy ijika anch mar mau mading uman umekeshina anch aziyidin mbil ya Yesu ni anch akwet dilau dia Yehova. Mu kusut kwa mivu, pafunday mukand wend wa kusambish wapepilau, Pita walonda piur pa usey ukweta kuman mar mulong wa kutentam.—1 Pita 4:12-16.

¹¹ Kudi kand yom yikwau yamushikena Paul ni Silas. Padingau mu mudimu wa umishoner mu Filip, ayikasa ni kuyifund anch aletin kanrumbangesh mu ul ni anch afundishin yinshakuru yilikishinau mu yijil. Chawiy, ayibula nakash ni kuyidjibwil mu rukan. Bibil utulejin anch chisu chadingau mu rukan ni yitat yakad kwok, “chashikau mukach mwa uchuku, Paul nend Silas ading ni kulembil ni kuwang miminy ya kumutumbish nich Nzamb. Antu a rukan akwau ading ayiteshil.” (Mid. 16:16-25) Paul ni murund nend amana mar mau mulong wa Kristu kadiap ching mulong wa kumekesh kushinshaman kwau kudi Nzamb ni kudi antu, pakwez chading kand mulong wa kupan uman kudi antu awonsu ading ni mutapu wa kutesh rusangu ruwamp. Ijika anch antu akwau afanyina kutaninamu kusutin mar mau. Uchuku winiwa, kalam wa rukan ni antu a chikumbu chend atesha rusangu ruwamp ni ikala in kwilej. (Mid. 16:26-34) Paul ni Silas amuchingejina Yehova, mu usu wend ni mu rusot rend mulong wa kuyikasikesh mu mar mau. Kaziyap bwat.

¹² Nlel unou kand, Yehova ukat kutwinkish yom yawonsu tuswiridina mulong wa kutukwash chisu tudia mu yisu ya mar. Ukatin anch etu tujijamana. Watwinkisha Dizu diend diapepilau mulong twikala ni ronganyin rakin piur pa chitongijok chend. Chinech chikat kukasikesh ritiy retu. Tukwet mutapu wa kubombakan nau in Kristu akwau ni kusal mudimu utumbila. Tukwet kand chisend cha kulam urund uwamp ni Yehova kusutin malembil. Ukat kutesh malembil ma kushiman ni ma kwit madiokila ku muchim mulong wa kutukwash chakwel twikala antu ishitwila ku mes kwend. (Fil. 4:13) Ni tutongin piur pa usu tukata kutambul anch twatongijokin pa ruchingej retu ra machuku ma kurutu.—Mat. 24:13; Heb. 6:18; Kuj. 21:1-4.

MUTAPU WA KUJIJAMEN YAKAMISH KUSHALIJAN

¹³ Yakamish turishina nich nlel yidi mutapu umwing mudi yarishau nich in kwilej a kusambish a Yesu Kristu. Nlel unou, Atuman a Yehova amen mar ma kuyilond nayimp ni kuyimesh mar ku mujimbu kudi antu in kuyipompat alejinau nsangu ja makasu piur pau. Mudi kand pa chisu cha atwimbuy, yisu yivud rupompat rikat kudiokal kudi antu a marelijon, antu inay Bibil ukat kulejan patok anch yisal yau yidi yiyimp ni mafundish madi ma makasu. (Mid. 17:5-9, 13) Yisu yimwing, antu a Yehova akat kwikal mu diking kanang anch it mulong wa kutambul mikand ya mbur matad. (Mid. 22:25; 25:11) Pakwez, anyikel akat kulikish kand mudimu wetu wa kulejan ni kusal usu wa kukangesh mudimu wa win Kristu. (Kus. 2:1-3) Anch yom mudi yiney yashiken, nich mushiku tukat kulondul chilakej cha atwimbuy ashinshamena, alonda anch: ‘Tufanyidin kumuziyil Nzamb mudi Mwant kusutamu kuyiziyil antu.’—Mid. 5:29.

¹⁴ Mulong mwikadil wa wan a ngand udandamedin kupalangan pa mangand mawonsu, in kulejan a rusangu ruwamp akat kurish ni yibachikin yikash yisadina anch alika kusal mudimu wayinkishau kudi Nzamb. Atushalapol awonsu a Nzamb akat kusanger nakash kubabesh kudia mu Kujingunik 14:9-12 kulondina piur pa difukwil dia “nnam wa chidiany, [ni] chirumbidij chend.” Twij kurumburik kwa mazu ma Yohan malondina anch: “Chawiy chifanyidin antu a Nzamb akata kuziyil ku yijil yend adandamen nich kushimpish kwa michim, ni kulam ritiy rau mu Yesu.”

¹⁵ Yakamish yikata kushiken mulong wa njit, matend ma ngand, rupompat ra patok ap kwimik mudimu wetu, yom mudi yiney yikat kukangesh anch umwifukwila Yehova nawamp. Pamwing ap ukutwishap kand kukumangan pamwing ni chikumangen. Ap kukutwishap kwikal kwambamb ni biro wa mutiy. Ap atulam a minyingumuku kakutwishap kand kwendin yikumangen. Mikand yikutwishap kand kushik ku yikumangen. Anch yom mudi yiney yashiken, chom ik ufanyidina kusal?

¹⁶ Chakul chidi anch, sal yom yawonsu ukutwisha kusal mu yishiken mudi yiney. Sal dilejan dia muntu panrend. Yisak yikemp ya antu yikutwish kutanijan ku yikumbu mulong wa kwilej. Tukutwish kusadin mikand twileja kal pakur ni Bibil mulong wa kusal yikumangan. Kangal wiyakamish ap kwov wom. Chisak Chitakedila chikusal usu wa kuman mitapu kushalijan mulong wa kwambamb pakad kulab nau akadivar akweta yisend.

¹⁷ Ap anch waman anch udi kulemp ni akadivar nau anambaz ney in Kristu, vurik anch udiap kulemp ni Yehova ni Mwanend Yesu Kristu. Ruchingej rey rikutwish kukasikan. Yehova ukudandamen kutesh malembil mey ni ukukukasikesh ni spiritu wend. Muchingejina ndiy mulong wa kukutakel. Vurik anch udi kashalapol wa Yehova ni mwin kwilej wa Yesu Kristu. Chawiy, sadin mitapu ukweta mulong wa kupan uman. Yehova ukuyukish usu usadina ni antu akwau akutwish kwibomb ney mu difukwil diakin.—Mid. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Pakwez, mudi atwimbuy ni antu akwau, anch urishin ni yom yikutwisha kukushikij ku rufu, muchingejina “Nzamb ukata kuvumbul afu.” (2 Kor. 1:8-10) Ruchingej rey mu divumbuk rikutwish kukukwash kujijaman ap anch kudi rupompat rikash. (Luka 21:19) Kristu Yesu watushila chilakej; wading wij anch kushinshaman kwend mu yoziu kwafanyina kuyikwash antu akwau niyau kujijaman. Ukutwish niyey kwikal musul wa kuyikasikesh akadivar ni anambaz ney mu mutapu winou.—Yoh. 16:33; Heb. 12:2, 3; 1 Pita 2:21.

¹⁹ Chikalap nchik rupompat ap kuzengol, ukutwish kujijamen kand milong yikwau yikash. Chilakej, antu amwing akat kuziy mulong antu a mu teritwar wau kateshinap uruu wau. Akwau arishin ni mayej ap katwishinap kand kusal yom kanang mulong wa kuziy kwa mujimbu. Kambuy Paul niyend warisha ni yakamish yamukangesha yisu yimwing kusal mudimu wend nawamp. (2 Kor. 12:7) Epafrodit, mwin Kristu wa ku Filip, niyend ‘winana mulong watesha anch [arund nend] ading ayedin.’ (Fil. 2:25-27) Kuburen kuwanyin kwetu ni kwa antu akwau kukat kusal anch chitukasikena nakash kujijaman. Kupwitijan pakach pa in Kristu ap ni antu a mu dijuku kukutwish kwikalaku. Pakwez, tukutwish kuyijijamen nawamp ni kuyipandakan anch twalondul yiyul yidia mu Dizu dia Yehova.—Ezek. 2:3-5; 1 Kor. 9:27; 13:8; Kol. 3:12-14; 1 Pita 4:8.

TUSALANY USU WA KUSHAL ASHINSHAMENA

²⁰ Tufanyidin kumushinshamen Yesu Kristu, udia Mutu wa chikumangen watondau kudi Yehova. (Kol. 2:18, 19) Tufanyidin kusal mu kovijan ni ‘kashalapol ushinshamena ni kubabal’ ni atulam atondau. (Heb. 13:7, 17) Anch twasadin yitenchik ya uteokras ni kovijan nawamp nau antu atutakedila, tukwikal antu arijekinau mulong wa kusal rusot ra Yehova. Tufanyidin kusadin nawamp chisend tukweta cha kulembil. Vurik anch, ap mbumbu ja rukan ap kukwauril ni antu kukutwishap kutukangesh kwambamb ni Tatukwetu wa mwiur wa rukat ap kuyipish uumwing tukweta nau in Kristu akwau.

²¹ Nich kujijaman, tusalany amboku yawonsu tukutwisha mulong wa kuwanyish mudimu wetu wa kulejan, tudandamenany kusal mudimu wayishilay Yesu Kristu in kwilejend chisu chavumbukay, payilejay anch: ‘Yangany kudi antu a michid yawonsu, ni yikadishany in kwilejam, yibatishany mu dijin dia Tatuku, ni dia Mwan, ni dia spiritu utumbila, yilejany kuziyil ku yom yawonsu yinakulejanya.’ (Mat. 28:19, 20) Mudi Yesu, el amboku niyetu tujijaman. Tulamany nawamp mu manangu ruchingej ra Want ni musangar wa mwom wa chikupu udia kurutu kwetu. (Heb. 12:2) Mulong tudi in kwilej abatishinau kal a Kristu, tukwet chisend cha kwipan mu kuwanyin kwa uprofet wa Yehova piur pa ‘disudiel dia ditenchik dia yom.’ Walonda anch: “Chifanyidin rusangu ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” (Mat. 24:3, 14) Anch twipan ni muchim umwing mu mudimu winou mu chisu chinech, tukwikal ni musangar wa kwikal ni mwom wa chikupu mwi ngand yisu ya Yehova!