Kulejan Kwitin Kujijaman
1 Kambuy Paul wasala mudimu usangareshina mudi mwin kulejan mu mivu 30 ni kusuta. Mudi mudinga mudimu winou wawonsu ukash, mudimu wend wa kulejan kiwadingap wakad matat. (2 Kor. 11:23-29) Chikalap nchik mwamu, Paul kalikap kulejan. (2 Kor. 4:1) Wijika anch usu wa kujijaman pasadilay mudimu wend ukudiokal kudiay Yehova. (Filip. 4:13) Paul walonda anch: “Ngilakejany am mudi niyam munikata kumwilakej Kristu” mulong wa chilakej chend cha kujijaman mu ritiy—1 Kor. 11:1, Manswik Masu.
2 Kujijaman mu Yoziu Nlel: Dichuku ni dichuku, akadivar netu avud arishin ni in kuyiswimbul, rupompat ap kulik kuyidiujol kudi anamakwau mu dijuku, kudi ambay nau a mudimu ap kudi arund nau a shikol. (Mat. 10:35; Yoh. 15:20) Pamwingap ni yey yawiy yom yikushikedina. Ku mutambu ukwau, ukutwish wara nich milong ya ukash wa mujimbu, ap ukutwish wara nich pa dichuku ni dichuku ni yom yisotila kukuletin kampuw yoziu yikimbina kupak ritiy rey ni kujijaman kwey. Tukutwish kutambul ukash anch twilej yilakej ya atushalapol ashinshamena a pakuru in ya in Kristu a katat arishina nich yikokujol ni kuyipandakan.—1 Pita 5:9.
3 Tukutwish kutambul usu wa kushal iminya daang mu mudimu wetu kusutil ku kushinshikin anch tudjit “yom ya njit yawonsu ya Nzamb.” (Efes 6:10-13, 15) Chidi kand cha usey tulembil mulong wa kujijaman. Nzamb utwinkishining spiritu wend utumbila chakwel tujijamana mu yoziu. (2 Kor. 6:4-7) Chakwel anch tupandakana mwi njit jetu ja muspiritu, tufanyidin kutesh yivurish ya Nzamb chakwel tuvuvurisha mwikadil wetu wa muspiritu. (Kus. 119:24, 85-88) Mudi mudingay mwan mwin rukat kutangang yisu ni yisu mukand wend wamutumidinau kudi tatukwend mwin rukat, kutangang kwetu Bibil dichuku dichiku ni dichuku kukat kukasikesh urund wetu nend Yehova. Tukutwish twatambul manangu mulong wa kurish nich yoziu kusutil ku kwilejang ayinetu, chakwel yitongijok ya Nzamb yisala nich usu pa mipak yetu ni yikasikesha kushishaman kwetu.—Jinsw. 2:10, 11.
4 Kujijaman Kuletin Yiyukish: Mudi muchadinga kudiay Paul, kujijaman kwetu nich kushinshaman pitusadila mudimu wetu kukat kuusangaresh muchim wa Yehova ni kutuletin etu ayinetu yiyukish ni antu akwau. (Jinsw. 27:11) Mwamu tudandamenany mu kusal mudimu, ni kumekesh anch ritiy retu ridi rikash ni “rikwet usey kupandakanamu utad wa or ukutwisha kusheshik.”—1 Pita 1:6, 7, MM.