Imburij Kujijaman Kwa Yehova

1-2. Mazu ma Yehova madia mu Isay 65:16, 17 matukasikeshin mutapu ik kudandamen kujijaman?

CHITENTAM cha rejon cha muvu wa 2017 chading ni mutu wa mulong usangareshina wading ulondina anch: “Kangal Twaziyany!” Chitentam chinicha chatuleja mutapu tukutwisha kujijamen yoziu yitushikedina. Kwasut kal katat mivu yinying, ni tudandamedin kujijamen yikokujol ya mwom mu mangand minam.

² Yakamish ik warishina nich machuku masutina am? Ov, wafishin mwanamakwey ap muruney ukatina? Ov, wayedin nakash? Ov, warishin ni yikokujol ya upal? Ov, kud mar warishina nich madiokila ku yom yatangau, yom ya chisum, ap ku rupompat? Ap ov, wamen mar mulong wa chipupu, mud cha koron? Chakin kamu, tuchingedin nich impu nakash dichuku dikupwa yom yiney yawonsu ni kuyivuramen kamu chikupu!—Tang Isay 65:16, 17.

3. Yom ik tufanyidina kusal katat, ni mulong wak?

³ Mwom mu mangand minam ukasiken ni kurutu tuyila oku tukutwish kurish ni yakamish yikash nakash. (Mat. 24:21) Chakin kamu, tukwet kuswir kwa kudandamen kukasikesh mwikadil wetu wa kujijaman. Mulong wak? Mulong Yesu walonda anch: “Imanany daang [jijamanany], chad ukez kipandishany ayinen.” (Luka 21:19) Kutongijokin mutapu utwishinau akwetu kujijamen yakamish ya mutapu umwing ni yitukweta kukutwish kukasikesh mwikadil wetu wa kujijaman.

4. Mulong wak tukutwish kulond anch Yehova ndiy udia chilakej cha kujijaman chipandikena kuwap?

⁴ Nany udia chilakej chipandikena kuwap cha kujijaman? Ud Yehova Nzamb. Pamwing ap wiyipwil anch mutapu ik? Inge, chakul chinech chikutwish kukushimokish ni chitin kutong nakash. Mangand minam amatakedin kud Djabul, ni mizwil too nich yakamish. Yehova ukwet usu wa kuyipwish kapamp kamwing, pakwez uchingedin mulong wa kuyipwish mu machuku ma kurutu. (Rom 9:22) Mu chisu chinech, Nzamb wetu udandamedin kujijaman ni kuchingel dichuku diatekay kal chakwel diwanyin. El twisambinany yom chidivu yijijamedinay Yehova.

YOM YIJIJAMEDINAY YEHOVA

5. Mutapu ik waswingishinau kal dijin dia Nzamb, ni mutapu ik wiyovila ey mulong wa chom chinech?

⁵ Kuswingish dijin diend. Yehova ukatining dijin diend ni ukatin anch muntu mwawonsu adilimish. (Isay 42:8) Pakwez kwasut kal mivu piswimp tunan musamban kudiosh kwasambishinau kuswingish dijin diend. (Kus. 74:10, 18, 23) Yom yiney yasambishina mu chir cha Eden chisu Djabul (charumburik anch “Mwin Kafukej”) pamufunday Nzamb anch uyikishin Adam ni Ev chom chiwamp chikwetau nich kuswir mulong wa kwikal ni musangar. (Dis. 3:1-5) Kudiosh kamu chisu chinicha, Yehova akat kumufund anch uyikishin antu yom yikwetau nich kuswir. Yesu wading wiyakamishin nakash piur pa mutapu uswingishinau dijin dia Tatukwend. Chawiy chayifundishay in kwilejend kulembil anch: “Tatukwetu udia mwiur, dijin diey aditumbish.”​—Mat. 6:9.

6. Mulong wak Yehova walikidina anch chisu chivud chisuta bil kurutu kwa kupwish mulong utadina ukaleng wend?

⁶ Kubwambwil ku ukaleng wend. Yehova ukwet mbil yin yawonsu ya kuyikel mwiur ni pansh, ni mutapu wend wa kuyikel wawiy upandikena kuwap. (Kuj. 4:11) Pakwez Djabul wasala usu wa kuyipumbul angel ni antu ni kuyibachik kutong anch Nzamb kakwetap mbil ya kuyikel. Mulong winou utadina ukaleng wa Yehova kafanyinap kuupwish kapamp kamwing. Nich manangu, Nzamb walika anch chisu chiwanyidina chisut bil, chakwel antu imenap ayinau anch ang apakish kwiyikel ayinau pakad ukwash wa Sakatang, kakutwishap ap pakemp. (Jer. 10:23) Mulong Nzamb washimpisha muchim, mulong winou ukuupwish kapamp kamwing djat kamu chikupu. Ukwitumbish amwinend ni kumekesh anch ching kusu Want wend wawiy ukutwisha kulet chisambu chakin ni diking diakin pa mangand.

7. Anany amubwambwidina kal Yehova, ni ukuyisal mutapu ik?

⁷ Wintombwij wa anend amwing. Yehova payitangay angel ni antu, ading awanyidina. Kadingap ni chidik ap chimwing. Pakwez mwangel umwing ntombwij Satan (charumburik anch “Mwin Kubwambwil”) wayibachika Adam ni Ev, antu awanyidina kumubwambwil Yehova. Angel ni antu akwau ibomba nau mu wintombwij. (Jud 6) Mu kusut kwa chisu, ni muchid wa Isarel, antu atondau kud Nzamb, amulika Nzamb wakin ni asambisha kwifukwil anzamb amakasu. (Isay 63:8, 10) Yehova wiyova chakin kamu anch amutun kal. Pakwez wajijamana, ni ukudandamen kujijaman djat kamu ni pakuwanyina chisu chatekay mulong wa kuyijiyish antombwij awonsu. Yom yiney yikuyiletin atushalapol end ashinshamena musangar nakash, awiy ajijamedina nend pamwing uyimp usadikina mu mangand minam!

8-9. Makasu ik mamudimbediningau Yehova, ni mutapu ik tukata kumasaul?

⁸ Makasu madandamedinay kupalangesh Djabul. Satan wamufunda Job, kashalapol utentamina wa Yehova, ni ukat kuyifund atushalapol awonsu ashinshamena a Yehova anch amusadidin Nzamb mulong wa kutanyinamu kwau ayinau. (Job 1:8-11; 2:3-5) Djabul udandamedin kusal mwamu ni nlel unou. (Kuj. 12:10) Tukutwish kumekesh anch Satan ud mukamakasu anch twajijaman mu yoziu ni kushal ashinshamena kud Yehova mulong tumukatin. Mud mutapu wamuyukishay Job, Yehova ukutuyukish mulong wa kujijaman kwetu.​—Jak. 5:11.

⁹ Satan uyisadidin antakel a relijon wa makasu mulong wa kuyifundish antu anch Yehova ud mukachisum ni ndiy udia musul wa mar tumena. Amwing pakach pau akat kulond anch an afiling, Nzamb ndiy uyisendining mulong ukwet kuswir kwa angel avud mwiur. Kwinoku kud kuswing mud ik! Etu twij nawamp musul wa mar. Anch twayel nakash ap anch twafish mukatish netu, tukatap kumufish nich Nzamb. Twitiyijin anch dichuku dimwing yom yikuwap. Tukutwish kuyilej antu awonsu akatina kutesh chakwel ijik anch Yehova ud Nzamb wa rukat nakash. Anch twasal mwamu, tukat kumukwash Yehova kumwakul Satan ukata kumusarumun.​—Jnsw. 27:11.

10. Mukand wa Kuseng 22:23, 24 umekeshin ik piur pa Yehova?

¹⁰ Mar mamenau atushalapol end. Yehova ud Nzamb wa ranaken. Kakatiningap kutuman tukat kudilol mulong wa mar tumena mud rupompat, mayej ni kuburen kuwanyin. (Tang Kuseng 22:23, 24.) Pitukata kwov kusansan, Yehova niyend ukat kwov kusansan; ukatin kupwish mar, ni ukumapwish. (Ilakej ni Kubudik 3:7, 8; Isay 63:9.) Dichuku dimwing, “ukez [katukuswol] mansoj mawonsu ku mes [kwetu]. Kukez kikalap kand rufu, ap madil, ap kwishikokin, ap kusansan.”​—Kuj. 21:4.

11. Yom ik yiswirikedinay Yehova piur pa atushalapol end ashinshamena afila kal?

¹¹ Rufu ra arund nend. Mutapu ik wiyovilay Yehova piur pa amakundj nau amband ashinshamena afila kal? Ukwet kuswir nakash kwa kuyiman kand! (Job 14:15) Ov, ukutwish kutongin mutapu ukwetay Yehova kuswir kwa kumuman murunend Aburaham? (Jak. 2:23) Ap Moses, wambambangay nend “mes ni mes”? (Kub. 33:11) Ni tongin impu yikwetay ya kumutesh David nau anfund a kuseng akwau akat kumuwangin kand miminy yiwamp ya kumushiman nich! (Kus. 104:33) Ap anch arund a Nzamb inay afil kal, pakwez Yehova kayivuramedinap. (Isay 49:15) Uvurikin kachom ni kachom piur pa wuntu wau wawonsu. Mu manangu mend, “awonsu adi aom.” (Luka 20:38) Dichuku dimwing ukuyivumbul, ni ukutesh kand malembil mau ma win kashinsh ni kwitiy difukwil diau. Anch wafishin mukatish ney, el yitongijok yiney yikongoj ni kukukasikesh.

12. Yom ik yimunenganeshina Yehova nakash mu machuku minam ma nsudien?

¹² Kuyizengol antu kud antu ayimp. Chisu chasambisha wintombwij mu chir cha Eden, Yehova wading wij anch yom yikupandikan kuyip kurutu kwa kuyiwapish. Yehova ukisin uyimp, kuburen kutentam ni chisum, yidia mu mangand nlel. Ukat kuyovil riy nakash, pakampwil antu akad in kuyikwash​—mud antu aziyina ni akad in kuyiking, chilakej an a nshon ni adiaafu. (Zak. 7:9, 10) Yehova ukat kunenganan chipandikena pakatay kuyiman atushalapol end akat kuyizengol ni kuyitek mu jinkan. Ikal nich kashinsh anch ukukatinany en awonsu ujijamenanya nend pamwing.

13. Mutapu ik uyilau antu mu kuyip nakash ku mes ma Nzamb, ni yom ik yikusalay pa mulong winou?

¹³ Mutapu uyilau antu mu kuyip nakash. Satan ukatin kuyipish kamu nakash mwikadil wa antu atangau mu chifu cha Nzamb. Pa chirung cha Nowa, “Nzamb wamana anch, kuyip kwavulijan kal . . . [Yehova] wanenganana, walond anch: ‘Nalauka kwam kuyitang antu pansh.’ Mwamu ndiy wova ushon mu muchim wend.” (Dis. 6:5, 6, 11) Kudiokal pinipa, ov, yom yawapin kal? Bwat kamu ap pakemp! Djabul ukat kusangar nakash pamenay mutapu udandamedina kupalangan pa mangand yisal ya masandj ya mitapu ni mitapu, mud yisal ya masandj pakach pa antu a yid ya ruvaj yishalijadina ap a yid ya ruvaj yimwing! (Efes 4:18, 19) Satan ukat kusangar chipandikena anch watwish kumuwishin kashalapol wa Yehova mu chitil. Anch dichuku dia Yehova diawanyin, ukujiyish yisal yin yawonsu yijondila.

14. Mutapu ik uyisadinau yitang ya Nzamb yidia pa divu kud antu?

¹⁴ Kushesh yitang yend. Muntu ‘kimedinap kusu pa kumuyikel mukwau,’ pakwez ukat kushesh kand divu ni annam amwinkishau kulam kud Yehova. (Mul. 8:9; Dis. 1:28) In kukimbijol amwing alondin anch yom yisadinau antu yikutwish kushesh mitapub ya yitang yikweta mwom miliyon umwing ni kusut kurutu kutuyila oku. Chakin kamu, amen anch yitang yid mu ubaj! Pakwez cha musangar, Yehova watekin kal “chisu cha kuyishesh awonsu akata kushesh mangand” ni ukurijek kand divu chakwel dikal paradis.​—Kuj. 11:18; Isay 35:1.

YOM TWILEJIDINA KU KUJIJAMAN KWA YEHOVA

15-16. Yom ik yitubachikina kujijaman pamwing ni Yehova? Let chilakej.

¹⁵ Tongijokin bil pa yakamish yawonsu yajijamedinay kal Tatukwetu wa mwiur mu tunan twa mivu twawonsu twinetu. (Tal mushet ulondina anch: “Yom Yajijamedinay kal Yehova.”) Yehova ukwet kwend mutapu wa kushesh mangand minam chisu chawonsu chikatinay. Pakwez kushimpish kwend kwa muchim kutukwashin nakash! Tushinshikinany chilakej ech. Tong bil mud anch ikundj umwing ni mukajend ukweta madikaj ayilej anch mwanau ukuvadik ni ulim ukash nakash, ukuman mar nakash ni kakusalap kwend mivu yivud. Pakwez ap mwamu, anvaj itiyin kumuval mwan winou ni itiy kuman mar. Mulong amukatin mwanau, anvaj akusal usu wau wawonsu chakwel mwanau ikalaku ni mashakamin madiaku mawamp.

¹⁶ Chilik chimwing, an awonsu a Adam ni Ev akat kuvadik nich kuburen kuwanyin. Pakwez Yehova uyikatin ni ukat kuyibangin. (1 Yoh. 4:19) Chinyim ni anvaj adia mu chilakej twisambina kal, Yehova ukwet mutapu wa kuswimp yom. Watekin kal dichuku dikupwishay mayej mawonsu mayimeshina antu mar. (Mat. 24:36) Ov, umenap anch rukat rend rifanyidin kutubachik niyetu kudandamen kujijaman nend pamwing?

17. Yom yilejenau piur pa Yesu mu Hebereu 12:2, 3 yitukasikeshin mutapu ik kudandamen kujijaman?

¹⁷ Yehova ud chilakej chiwanyidina cha kujijaman. Yesu watwisha kwimburij chilakej cha kujijaman cha Tatukwend. Padingay pa divu, Yesu wajijamena masaal, usany wamukwatishau ni mutond wa mar mulong wa kutwambat etu. (Tang Hebereu 12:2, 3.) Chakin kamu, chilakej cha kujijaman kwa Yehova chamwinkisha Yesu usu wa kujijaman. Ni chikutwish kand kutukasikesh niyetu.

18. Mukand wa 2 Pita 3:9 utukwashin mutapu ik kwijik yom yasadikina kal mulong wa kushimpish muchim kwa Yehova?

¹⁸ Tang 2 Pita 3:9. Yehova wij chisu chidia chiwamp nakash chifanyidina kupwish uyimp mu mangand. Kushimpish muchim kwend kwakwashin kukumangej chisak chipandikena kujimb, mudia mamiliyon ma antu amwifukwidina ni kumushiman. Antu awonsu inay akwet musangar nakash mulong Yehova wajijamen mu chisu chilemp, ni chinech chayikwashin kuvadik, kwilej kumukat, ni kwipan kud ndiy. Kujijaman kwa Yehova kukwijikan chad patok chisu chikuyiyukishay nich musangar mamiliyon ma atushalapol end ajijamena djat ni kwinsudien!

19. Mupak ik tufanyidina kukwat, ni difut ik tukutambula?

¹⁹ Yehova utufundishin mutapu wa kujijaman nich musangar. Chikalap nchik kusansan ni mar mawonsu maletishinay Satan, Yehova udandamedin kwikal ‘Nzamb wa musangar.’ (1 Tim. 1:11) Niyetu tukutwish kulam musangar wetu patuchingedina nich kushimpish muchim chisu chikutumbishay Yehova dijin diend ni ukaleng wend, pakupwishay uyimp wawonsu ni milong yawonsu turishina nich. Komb el tukwatany mupak wa kujijaman ni kutan rongoj kusutin kwijik anch Tatukwetu wa mwiur niyend udandamedin kujijaman. Anch twasal mwamu, muntu ni muntu pakach petu ukuman kuwanyin kwa mazu malondina anch: “Wayuk muntu ukweta muchim wa kudandamen pa chisu chikumanay mar, mulong ndiy wiminy daang mu chisu chamupakau. Ndiy ukez katambul chibangul cha mwom chashilayimu Nzamb kupan kudi antu amukatila.”​—Jak. 1:12.