Tuchingelany Dichuku Dia Yehova Nich Kudandamen
“Anzukeshany ku ritiy ren . . . kudandamen.”—2 PITA 1:5, 6.
1, 2. Kudandamen chom ik, ni mulong wak in Kristu akuswiridin?
DICHUKU dijim dia Yehova didi piswimp nakash. (Yowel 1:15; Sofoniy 1:14) Chitudia in Kristu twakwata kal mupak wa kulam kushinshaman kwetu kudi Nzamb, tuchingedin nich impu yijim chisu chikezau kuchidij ukaleng wa Yehova. Pakwez katat, atukisin, atuswingishin, atuzengodil, ni kutujip mulong wa ritiy retu. (Mateu 5:10-12; 10:22; Kuburik 2:10) Chinech chitin kudandamen—usu wa kujijaman mu mar. Kambuy Pita utukasikeshin anch: “Anzukeshany ku ritiy ren . . . kudandamen.” (2 Pita 1:5, 6) Tuswiridin kudandamen, mulong Yesu walonda anch: “Wawonsu ukeza kujijaman ni kushik kwisudiel, ndiy mwinau ukez kapandishau.”—Mateu 24:13.
2 Tuyediling kand, kudil, ni kura nich yoziu yikwau. Satan ukusangar mudi ik anch twashadish ritiy retu! (Luka 22:31, 32) Tukutwish kudandamen mu yoziu kushalijan, nich ukwash wa Yehova. (1 Pita 5:6-11) Tushinshikinany yinship yimwing ya kashinsh ya mu mwom yimekeshina anch tukutwish kuchingel dichuku dia Yehova nich kudandamen ni pakad kuziy mu ritiy.
Mayej Kimayikangeshap
3, 4. Let chilakej chimekeshina anch tukutwish kumusadil Yehova mu kushinshaman kwikalap nchik misong.
3 Nzamb kakatap kutwok mu chilay, pakwez ukat kutwinkish usu wa kujijaman mu mayej. (Kuseng 41:1-3) Sharon walonda anch: “Anch nivurikin nawamp, nking ya ayibid yadinga murund nam wa pa dichuku ni dichuku. Nadingap ni musangar mu wanikanch wam mulong navadika chishet ni natwishap kulond nawamp.” Pilejay piur pa Yehova ni kushilamu kwend kwa kulet ukash wa mujimbu uwanyidina kwamwinkisha Sharon ruchingej. Ap anch kwend ni kulond kumukasikedin, pakwez ukat kutan musangar mu mudimu wa Ukristu. Pasutin kal mivu 15, ndiy walonda anch: “Ukash wam wa mujimbu ukutwish kudandamen kuyip, pakwez ruchingej ram mudiay Nzamb ni urund wam ni ndiy yidi dipandish dia mwom wam. Nikwet musangar mudi ik wa kwikal pakach pa antu a Yehova ni wa kwikal ni ukwash wend wa kashinsh!”
4 Kambuy Paul wayikasikesha in Kristu a mu Tesalonik ‘kuyikasikesh aziyila.’ (1 Tesalonik 5:14) Yom mudi yiney yikash yikutwish kulet runeng. Mu muvu wa 1993, Sharon wafunda anch: “Chiniyova anch nakangany kal, . . . nawila mu chirung cha mivu yisatu ya kunenganan. . . . Amakurump angongoja ni anyula. . . . Nich rukat Yehova watwinkisha malejan piur pa kunenganan kukash kusutil ku Chinong cha Kalam. Inge, uyilamining antu end ni uteshining yovil yetu.” (1 Pita 5:6, 7) Sharon uchimusadidil Nzamb ni katat nich kushinshaman oku uchingedin dichuku dijim dia Yehova.
5. Uman ik umekeshina anch in Kristu akutwish kujijaman mu mar makash?
5 In Kristu amwing amen mar nakash mulong wa yom yamanau pasak mu mwom. Harley wamana Njit ja Mangand ja 2 jikash ni wadinga ni kulat yilat yiyimp yikwatishena wom ya njit. Padingay mu tul, ndiy wading ni kukashimuk wakarik anch: “Babalany! Babalany!” Anch walank, wading watalalang kal zoong nich masuril. Pakwez, watwisha kulondul umutakel wa Nzamb mu mwom wend ni mu kuvul kwa yilat ya mutapu winou yakepa.
6. Mutapu ik warishay mwin Kristu umwing nich mayej ma manangu?
6 Mwin Kristu umwing warumbangana manangu nakash chamukasikena nakash kulejan ku chis ni chis. Pakwez, wajijamana mu mujikit winou, mulong wading wij anch mudimu wa kulejan udi dipandish ndiend ni dia antu akumutesha. (1 Timote 4:16) Yisu yimwing katwishap ap kukokal ku chis, pakwez ndiy walonda anch: “Kupwa, natwisha kuyikel yitongijok yam, ni kuya ku chis chikwau, ni kupakish kand. Pinadandamena kulejan, nalama ukash uwanyidina wa mu spiritu.” Chadinga kand kukumangan ku yikumangan, pakwez mukadivar winou wading wij kamu nawamp usey wa urund wa mu spiritu. Chawiy lel, wasala usu chakwel akumangana.—Hebreu 10:24, 25.
7. Ap anch antu amwing akweting wom wa kulond mukach mwa antu ap wa kukumangan, mutapu ik umekeshinau kudandamen?
7 In Kristu amwing akweting wom upandakena—wom ukash wa mikadil kanang ap yom kanang. Chilakej, akutwish ov wom wa kulond kurutu kwa antu avud ap wa kwez ni kukumangan. Tongap bil mutapu chikutwisha kuyikasiken kwakul ku yikumangan ya Ukristu ap kusal diskur ku Shikol ya Mudimu wa Uteokras! Chikwau kand, akat kujijaman, kukumangan ni kwakul kwau yitukasikeshin kamu nakash.
8. Chom ik chidia cha usey piturishina nich yikokujol ya yitongijok?
8 Kupim ni kulal nakash kukutwish kumukwash muntu kudandamen mu yikokujol ya manangu. Ukwash wa chimwingang ukutwish kwikal wa usey. Pakwez, chidia kamu cha usey, kudi kumwengamin Nzamb kusutil ku malembil. Kuseng 55:22 ulondil anch: “Tek chisend chey kudi Nzamb, ndiy ukukutuliku; Ndiy kakumulikip mwin kutentam kushemunik, ap pakemp kusu.” Chawiy, mu yisu yawonsu, “mukungamena [Yehova] ni muchim wey wawonsu.”—Jinswir 3:5, 6.
Kujijaman Chisu cha Runeng
9-11. (a) Chom ik chikutwisha kutukwash kujijaman chisu cha runeng anch twafish mukatish netu? (b) Chilakej cha Ana chikutwish nchik kutukwash kujijaman chisu cha runeng?
9 Anch rufu ra yauril yid ya dijuku, kufish kwinoku kukutwish kwalet runeng nakash. Aburaham wamudila mukajend mukatish, Sara. (Disambishil 23:2) Ap ikundj uwanyidina Yesu “wadila” pafay murund nend Lazar. (Yohan 11:35) Chawiy lel choviken kwov ushon anch mukatish ney wafa. Pakwez, in Kristu ij anch kukez kwikal divumbuk. (Midimu 24:15) Chawiy lel, awiy ‘kakatap kwikal ni ushon, mudi mudiau amwing kakwetip ruchingej.’—1 Tesalonik 4:13.
10 Mutapu ik tukutwisha kura nich runeng? Pamwing ap chilakej chimwing chikutwish kwikal cha ukwash. Tukatap kudandamen kwov ushon anch murund netu waya mu weny mulong tukwet ruchingej anch tukez kumanijan nend kand pakuchirikay. Kuman rufu ra mwin Kristu ushinshamena chilik chimwing ni weny kukutwish kudutish runeng retu mulong twij anch ukez kuvumbuk.—Mulej 7:1.
11 Kumuchingejin kamu nakash “Nzamb wa kwongoj kwawonsu” kukez kutukwash kujijaman pa chisu cha runeng. (2 Korint 1:3, 4) Chikwau kand kutongijokin pa yasalay mwadiamufu Ana kukutwish kwikal kwa ukwash. Ndiy wikala mwadiamufu kupwa kwa mivu sambwad kusu ya uruw. Pakwez padingay ni mivu 84, ndiy wading uchimusadidin Yehova mudimu utumbila ku tempel. (Luka 2:36-38) Mwom mudi winou wa kwipan kamu nakash wamukwasha chakin kurish nich runeng ni yitongijok ya kwikal amwinend. Kukwatikan chisu ni chisu mu mijikit ya Ukristu, pamwing ni mudimu wa kulejan wa Want, kukutwish kutukwash kudandamen mu chisu cha runeng.
Mutapu wa Kurish mu Yoziu Kushalijan
12. In Kristu amwing ajijamana mu yoziu ik ya mu mwom wa dijuku?
12 In Kristu amwing afanyidin kujijaman mu yoziu yitadina mwom wa dijuku. Chilakej, anch mbay wa uruw wasal masandj, chisal chinech chikutwish kwikal ni yibudikin yiyimp nakash mu dijuku! Mulong wa kusansan ni runeng, mbay urumbukidinau ukutwish kuker tul ni kudil nakash. Kusal kusu midimu yikemp-yikemp kukutwish kurumbangesh manangu mu chilik cha kusal yilim ap kuletish yak. Mbay wakad mulong ukutwish kukangany ap kudia, ukutwish ku um, ni kurumbangan manangu. Chikutwish kukasikan kusal mijikit ya Ukristu. An akutwish kamu kwikal ni ushon nakash!
13, 14. (a) Dikasikesh ik utanidina ku malembil ma Salomon ma kushikij kwa tempel? (b) Mulong wak tufanyidina kwit spiritu utumbila?
13 Pakata kutushiken yoziu ya mutapu winou, Yehova ukat kutwinkish ukwash tuswiridina. (Kuseng 94:19) Malembil ma Mwant Salomon masalay pa kushikij kwa tempel wa Yehova, mamekeshin anch Nzamb ukat kuteshang malembil ma antu end. Salomon wamulembila Nzamb anch: “Mikalap nchik malembil, kwikalap nchik kwit kwa kwitapil dilau yikutwishay kwit muntu mwin mwawonsu ap kudi antu ey awonsu a mu Isarel, mulong muntu ni muntu ukez kwijik chipupu cha muchim wend amwinend, ni akez kutandjek chakin kamu makas mau ku chikumbu chinech, chawiy ey amwiney udia mu maur, ndond yey yiushichinga, ufanyidin kuyitesh, ni ufanyidin kuyilikishin ni kusal ni kumwinkish muntu ni muntu mudi mudia jinjil jend, mulong wij muchim wend (mulong yey amwiney kusu wija muchim wa an akamuntu awonsu); chakwel anch akwakama ey machuku mawonsu madiau aom mwi ngand yiney wayinkisha angakau.”—1 Ant 8:38-40, NW.
14 Chikutwish kwikal cha ukwash kudandamen kwit spiritu utumbila. (Mateu 7:7-11) Mu dibuj dia spiritu mudi ngikadil mudi musangar ni chisambu. (Galatia 5:22, 23) Rongoj mudi ik ridiaku anch Tatukwetu wa mwiur wakul ku malembil metu—musangar ukat kuswinkan ushon, ni chisambu chikat kuswinkan mar!
15. Maverse ik makutwisha kutukwash kupipesh yakamish yetu?
15 Chifanyidin kuchingejin uvud kanang wa yakamish, pitukata kujijaman mu mar makash. Pakwez yakamish yiney yikutwish kukep anch twavurik mu manangu mazu manam malonday Yesu anch: “Kangal waswejany kwitong pa mwom wen, yiukudianya ni yiukunanya; ap mulong wa mujimbu wen anch tukudjal ik. . . . Pakwez sambilany bil kusurib want wend [Nzamb] ni kutentam kwend, chawiy lel yom yawonsu akez kananzukeshilip.” (Mateu 6:25, 33, 34) Kambuy Pita utukasikeshin ‘kutek minan yawonsu padiay Nzamb, mulong ndiy ukat kukulamany en.’ (1 Pita 5:6, 7) Chifanyidin kusal usu wa kupwish mulong. Pakwez, kupwa kwa kusal yawonsu tukutwisha, minan yikutwishap kuswinkan malembil. Nfund-a-kuseng wawanga anch: “Pana njil yey kudi [Yehova], ukungamena mwi Ndiy, ni Ndiy ukez kachisal.”—Kuseng 37:5.
16, 17. (a) Mulong wak tukutwishap kwiyep yakamish chikupu? (b) Yom ik tukeza kutaninamu anch twasadil Filip 4:6, 7?
16 Paul wafunda anch: “Kangal wanengananany, pakwez lembilany mu yom yawonsu, ni kujikitish ni kumwijikish Nzamb yom yawonsu yiusotilany. Ni chisambu cha Nzamb chisutila ronganyin rawonsu chikwez kulam michim yen ni yitongijok yen mu Yesu Kristu.” (Filip 4:6, 7) Chakin anch, an a Adam akad kuwanyin kakutwishap kamu kwikal wakad yakamish. (Rom 5:12) Amband in Het a Esau “ading in kumunenganesh Isak nend Rebeka.” (Disambishil 26:34, 35) Mayej mayinenganesha in Kristu mudi Timote nend Trofim. (1 Timote 5:23; 2 Timote 4:20) Paul wanenganana mulong wa ambay nend in Kristu. (2 Korint 11:28) Pakwez ‘Mwin kutesh malembil’ udi kwaku mulong wa kuyikwash antu amukatina.—Kuseng 65:2.
17 Pituchingedina dichuku dia Yehova, tukwet ukwash ni rongoj ra “Nzamb wa chisambu.” (Filip 4:9) Yehova udi “Nzamb wa ranaken ni mwin riy,” “witenchikin mu kulikishilan,” ni “ukat kuvurik anch tudi kwetu rufunfut.” (Kubudik 34:6; Kuseng 86:5; 103:13, 14) Chawiy lel, ‘tumwijikishany Nzamb yom yawonsu,’ mulong chinech chikez kutuletin “chisambu cha Nzamb”—kudut kupandakena ronganyin ra muntu.
18. Mudi mulondilau mu Yob 42:5, mutapu ik tukutwisha ‘kumuman’ Nzamb?
18 Pakwilay malembil metu, twijing anch Nzamb udi netu. Kupwa kwa Yob kujijaman mu yoziu yend, ndiy walonda anch: “Nading ni kwov yeyey [Yehova] ching kusu ku matu, pakwez katat nakuman kal nich mes mam.” (Yob 42:5) Nich ronganyin, ritiy ni kujikitish, tukutwish kutongin pa mutapu ukatay kutusadil Nzamb ni tukutwish ‘kumuman’ kupandakanamu muchadinga pasak. Urund winou wa piswimp nakash utuletidin chisambu mudi ik mu muchim ni mu manangu!
19. Yom ik yikushikena anch ‘twamudjibwil Yehova yakamish yetu yawonsu’?
19 Anch ‘twamudjibwil Yehova yakamish yetu yawonsu,’ tukutwish kujijaman mu yoziu nich chisambu cha mu muchim chilamininga muchim ni manangu metu. Mukach kamu mwin mwa muchim wetu wa chifanikesh, tukez kwikalap ni mwong, wom ni minan. Yitongijok yetu yikezap kurumbangan mulong wa kukasikan kwa mulong ap yakamish.
20, 21. (a) Yamushikena Stefan yiletin uman ik wa kwidutish patuzengodilau? (b) Jimbul chilakej cha katat cha kwidutish pitujijamena mu yoziu.
20 Mwin kwilej Stefan wamekesha kwidutish pajijamanay mu choziu chimwing chikash cha ritiy rend. Kurutu apana uman wend wa nsudiel, antu awonsu adinga ashich mu dirumburish “aman mpal yend mudi . . . mpal ya mwangel.” (Midimu 6:15) Mpal yend yading zwang—mudi mpal ya mwangel, muruu wa Nzamb. Kupwa kwa Stefan kuyilej kufa nich kwau ku rufu ra Yesu, anzuj “chovau yom yiney yayitarikesha ku michim yau, amwisumodina ku mazeu.” Stefan “wizula sens ni spiritu utumbila, watala mwiur neng, waman uyaj wa Nzamb, ni Yesu ku chikas cha katatuku cha Nzamb.” Chishimushimu chinech chamukasikesha, chawiy Stefan washinshamana djat ni ku rufu. (Midimu 7:52-60) Ap anch tukumanangap yishimushimu, tukutwish kutan kudut kupaninay Nzamb patuzengodilau.
21 Tushinshikinany yitongijok ya in Kristu amwing ameshau mar ni kuyijip kudiau in Nazi pa chisu cha Njit ja Mangand ja 2. Charumburilay yamanay ku dirumburish, umwing wau walonda anch: “Ankatwila rufu. Natesha, ni kupwa kwamam kulondap mazu manam, ‘Shinshaman kamu djat ni ku rufu,’ ni mazu makwau makemp ma Nsalejetu, kwapwa kal. . . . Pakwez, katat kangal kwov wom. Nading ni chisambu chimwing, ni kwidutish kumwing, kwawakadiany kutwish kutongin!” Nsand umwing mwin Kristu wadinga uchingedila amukatula mutu wayifundina anvaj end anch: “Twasutang kal pakach pa uchuku. Nichikwet chisu cha kuswimp mupak wam. A! ov, nikutwish kand kwikal ni musangar mu mangand minam anch nitun ritiy mudi Nsalejetu? Bwat kwau! Pakwez katat ukwetany ruchingej anch nidiokil mu mangand minam nich musangar ni chisambu.” Chakin anch Yehova ukat kuyikasikesh atushalapol end ashinshamena.
Ukutwish Kujijaman!
22, 23. Chom ik ukutwisha kwikal nich kashinsh piuchingedina dichuku dia Yehova nich kudandamen?
22 Pamwing ap kand kal urishangap nich yoziu mudi yitwashinshikina kal ey. Pakwez, Yob muntu wadinga ni kumwakam Nzamb wayinga palonday anch: “Antu awonsu akwet mwom wa mivu yikemp, pakwez wizwil sens nich mar.” (Yob 14:1) Pamwing ap udi nvaj usadina usu wa kuyilej aney malejan ma mu spiritu. Afanyidin kudandamen mu yoziu ku shikol, pakwez ukwikal nich musangar mudi ik anch ashinshaman kudi Yehova ni ku yijil yend yitentamina! Pamwing ap umen mar ni yoziu kwi ndond yey ya mudimu. Pakwez, mu mikadil yiney ni yikwau yivud ukutwish wajijaman, mulong ‘Yehova ukat ku kusendil yisend yey pichuku-pichuku.’—Kuseng 68:19.
23 Ukutwish watong anch udi kwey muntu wakad usu, pakwez vurik anch Yehova kakezap kuvuramen ap pakemp mudimu wey ni rukat umekeshina mulong wa dijin diend ditumbila. (Hebreu 6:10) Nich ukwash wend, ukutwish kudandamen mu yoziu ya ritiy. Chawiy lel tek kusal rusot ra Nzamb mu malembil mey ni mu yiutongidina kusal. Chawiy ukutwish kuchingejin chiyukish cha Nzamb ni ukwash wend piuchingedina dichuku dia Yehova nich kudandamen.
Mutapu ik Ukwakula?
• Mulong wak in Kristu aswiridin kudandamen?
• Yom ik yikutwisha kutukwash kujijaman mu chisu cha mayej ni cha runeng?
• Malembil makat kutukwash nchik kujijaman mu yoziu?
• Chitwishikin nchik kuchingel dichuku dia Yehova nich kudandamen?
[Chipich chidia pa paj wa 17]
Kwengamin padi Yehova kutukwashin kujijaman pa chisu cha runeng