Mutapu Ukatay Kutukwash Yehova Kujijaman

1. Mulong wak chiswapelap kudandamen kujijaman, pakwez nany ukutwisha kutukwash? (1 Pi 5:10)

MU MACHUKU minam makash, antu a Nzamb akwet kuswir kwa kujijaman. Amwing pakach pau, akat kurish ni mayej makad kuyerikang. Akwau arishin ni ushon mulong afishin muntu ukatinau. Pakwez akwau kand akat kurish ni rupompat mu dijuku, ap ra maguvernema. (Mat. 10:18, 36, 37) Chikalap nchik chikokujol urishina nich, ikal ni kashinsh anch Yehova ukutwish kukukwash kujijaman.​—Tang 1 Pita 5:10.

2. Kwisu kudokiling kujijaman kwetu?

² Kujijaman ud ukaliweny wa kudandamen kuya kurutu ni kulam ruchingej chisu turishina ni yishiken yikash, rupompat, yikokujol, ap yoziu. Ukaliweny wa kujijaman ukwetau in Kristu ukatap kudokal ku usu wau ayinau, pakwez udokiling kud Yehova, ukata kupan “usu usutinamu wa antu.” (2 Ko. 4:7) Mu mutu wa mulong winou, tukushinshikin yom yinying yatwinkishinay kal Yehova mulong wa kutukwash kujijaman. Tukuman kand mutapu tukutwisha kutaninamu mu yom yiney yawonsu.

MALEMBIL

3. Mulong wak tukutwisha kulond anch malembil chid chilay?

³ Yehova watusadidin kal chom chikwamushena chikutwisha kutukwash kujijaman. Wasadin kal anch chituswapel kwambamb nend chikalap nchik kuburen kuwanyin kwetu. (Heb. 4:16) Tongin bil chom ech: Tukutwish kumulembil Yehova chisu chawonsu tukatina ni piur pa chom chin chawonsu tusotina. Ukutwish kututesh mu dizu dawonsu tulembila ni ndond yawonsu tuda, ap anch tud mu rukan. (Yona 2:1, 2; Mid. 16:25, 26) Ap anch mulong wa yakamish yetu, tutwishinap kutan mazu mawanyidina mulong wa kumulej mutapu twiyovila, Yehova ukwet mutapu wa kwijik yom tusotina kulond. (Rom 8:26, 27) Chakin, malembil chid kamu chilay!

4. Mulong wak tukutwisha kulond anch kumulembil Yehova chakwel atukwash kujijaman kukwatijadin ni rusot rend?

⁴ Mu Dizu dend, Yehova utwinkin kashinsh anch, “chikalap nchik chom tumwitina kukwatijan ni rusot rend, ukat kututesh.” (1 Yh 5:14) Ov, tufanyidin kumwit Yehova chakwel atukwash kujijaman? Mwaning! Kusal mwamu kukwatijadin ni rusot rend. Mulong wak tulondina mwamu? Anch twajijamen yikokujol, tukat kumukwash Yehova kumwakul mukankuny nend, Satan Djabul. (Jnsw. 27:11) Chikwau kand, Bibil ulondin anch Yehova ukatin “[kuyimen] apanina michim yau yawonsu kud ndiy.” (2 Jsng. 16:9) Chawiy tukutwish kwikal ni kashinsh anch Yehova ukwet usu ni ukatin kamu kutukwash kujijaman.​—Isay 30:18; 41:10; Luk. 11:13.

5. Malembil makat kutukwash nchik kwikal ni chisambu cha mu manang? (Isay 26:3)

⁵ Bibil ulondin anch, ang twamulembil nich win kashinsh mulong wa milong yetu, ‘chisambu cha Nzamb chisutinamu yom yawonsu tukutwisha kutesh chikulam michim yetu ni manang metu.’ (Flp. 4:7) Shinshikin chirumburikina yom yiney. Antu akad kumusadin Nzamb anch arishin ni yikokujol akat kusal yom yivud mulong wa kwikal ni chisambu cha mu manang. Chilakej, amwing akat kusal usu wa kudosh yitongijok yawonsu mu manang mulong wa kwiyov pee. Kusal mwamu kud kwa ubaj mu spiritu. (Ilakej ni Mateu 12:43-45.) Pakwez, chisambu chikatay kutwinkish Yehova anch twamulembil chisutinamu kulemp nakash chisambu chin chawonsu chikutwishay kwikal ni muntu usadin usu wa kudosh yitongijok mu manang. Anch twamulembil Yehova, tukumekesh anch tumuchingejidin chakin kamu. Chawiy ushidinamu anch ukutwinkish “chisambu chiwanyidina.” (Tang Isay 26:3.) Yehova ukat kusal mwamu kusutin kutukwash kuvurik uyakin twilejina kal mu Dizu dend, Bibil. Uyakin winou ukat kudutish muchim wetu ni kutukwash kwiyov pee mu manang, mulong twij anch Yehova utubangidin ni ukatin anch tutwish.​—Kus. 62:2, 3.

6. Mutapu ik ukutwisha kutaninamu nakash mu malembil? (Tal kand chipich.)

⁶ Yom ukutwisha kusal. Chisu ujijamedina yikokujol yipakina ritiy rey, “pan yakamish yey yawonsu kud [Yehova]” ni mwita chakwel akwink chisambu. (Kus. 55:23) Mulembila kand chakwel akwinkisha manang makutwisha kukukwash kurish ni chikokujol chey. (Jnsw. 2:10, 11) Chisu umwilembidina mulong wa kukukwash kujijaman, kangal wavuramen kumujikitish. (Flp. 4:6) Shinshikin pa yom yimekeshina anch Yehova ukukwashin mu chikokujol chey, ni mujikitisha mulong wa ukwash wend. Kangal walikidil chakwel yikokujol yikukangesh kuman yiyukish watambwila kal.​—Kus. 16:5, 6.

DIZU DA NZAMB

7. Kwilej Bibil kukutukwash mutapu ik kujijaman?

⁷ Yehova watwinkisha Bibil mulong wa kutukwash kujijaman. Bibil ukwet maverse mavud matwinkishina kashinsh anch Yehova ukutukwash. El tushinshikinany chilakej chimwing. Mateu 6:8 ulondin anch: “Tatukwen wij yom uswirikedinanya kurutu kwenen kumwitay.” Yesu ndiy walonda mazu minam, ni wading umwij Yehova nawamp nakash kusutamu muntu win mwawonsu. Chawiy tufanyidin kwikal ni kashinsh anch Yehova ukat kuman nawamp yom tuswirikedina chisu turishina ni yakamish. Bibil ukwet yitongijok yikwau yifanakena ni yiney yikutwisha kutukwash kujijaman.​—Kus. 94:19.

8. a) Let chilakej chimekeshina anch mbil ja Bibil jikutwish kutukwash kujijaman. b) Yom ik yikutwisha kutukwash kuvurik mbil ja Bibil chisu tujiswirikedina?

⁸ Mbil ja Bibil jikutwish kutukwash kujijaman. Mbil jinej jikwet yiyul ya manang yikutwisha kutukwash kukwat mipak yiwamp. (Jnsw. 2:6, 7) Chilakej, Bibil utukasikeshin kushinshikin pa maswir ma pa dichuku, pa ndond pa kwiyakamish piur pa yom yikutwisha kushiken ap kulik kushiken damashik. (Mat. 6:34) Anch twikal ni chaku cha kutang Bibil ni kutongijokin pa yom tutangina, tukutwish kuvurik mbil tuswirikedina ni pa chisu tujiswirikedina.

9. Nsang jida mu Bibil jikasikeshin mutapu ik kashinsh ketu anch Yehova ukutukwash?

⁹ Bibil ukwet jinsang jakin ja antu amuchingejina Yehova ni atambula ukwash wend. (Heb. 11:32-34; Yak. 5:17) Anch twatongijokin pa jinsang mud jinej, tukukasikesh kashinsh ketu anch Yehova ud “ndiy kwikang kwetu ni usu wetu, udi piswimp ni yetwetu mulong wa kutukwash mu mar metu.” (Kus. 46:2) Anch twashinshikin pa yilakej ya atushalapol a Yehova ashinshamena a pasak, tukutwish kwimburij ritiy rau ni kujijaman kwau.​—Yak. 5:10, 11.

10. Yom ik ufanyidina kusal mulong wa kutaninamu nakash mu Bibil?

¹⁰ Yom ukutwisha kusal. Tang Bibil dichuku dawonsu, ni fund maverse umena anch makutwish kukukwash pakampwil. Antu avud ajingunin kal anch mufund wa dichuku ukat kuyikwash kusambish dichuku ni chitongijok chikasikeshina chidokila mu Bibil. Nambaz Mariea wajingunina anch chitongijok chinech chid kamu chakin chisu chayikwatau anvajend awonsu aad mayej ma kanser. Yom ik yamukwasha kujijaman chisu chading chiyilaminay anvajend padingau piswimp ni kufa? Ulondin anch: “Pamanch pawonsu natangang mufund wa dichuku mu broshir Tushinshikinany Mifund Dichuku Dawonsu. Chaku chinech chankwasha kulam chitongijok cha Bibil mu manang ni mwamu natwishang kushinshikin pa yom yida ya usey kwinsutamu am ni yikokujol nading nirishina nich.”​—Kus. 61:3.

AKADIVAR NAU ANAMBAZ

11. Mulong wak chitukasikeshin kwijik anch tudap ayinetu chisu turishina ni yikokujol?

¹¹ Mulong wa kutukwash kujijaman, Yehova watwinkishin kal dijuku da akadivar nau anambaz a pa mangand mawonsu. Kwijik anch “dijuku dawonsu da akadivar [netu] pa mangand dirishin ni mar ma mutapu umwing” kukat kutwinkish kashinsh anch tudap ayinetu. (1 Pi. 5:9) Chawiy tufanyidin kwikal ni kashinsh anch yikokujol yin yawonsu turishina nich, antu akwau niyau ayirishin kal nich, ni atwisha kuyijijamen. Chinech chirumburikin anch niyetu tukutwish kuyijijamen!​—Mid. 14:22.

12. Mutapu ik ukutwishau kutukwash akadivar nau anambaz, ni yom ik tufanyidina kusal mulong wa awiy? (2 Korint 1:3, 4)

¹² Pitudandamedina kujijaman, akadivar nau anambaz akutwish kutukasikesh. Yawiy yom yamushikena kambuy Paul; amukwasha kud akadivar nau anambaz. Yisu yivud wayijikitisha akadivar nau anambaz inay amukwasha chisu chamutekau mu rukan. Wayijimbulang majin mau. Amwongoja Paul, amukasikesha ni kumwinkish yom yading yiswirikedinay. (Flp. 2:25, 29, 30; Kol. 4:10, 11) Nlel niyetu twimedinap yom yiney. Chisu tukweta kuswir kwa ukwash mulong wa kujijaman, akadivar nau anambaz netu adingaku mulong wa kutukwash, niyetu tukat kuyikwash chisu chidau mu maswir.​—Tang 2 Korint 1:3, 4.

13. Yom ik yamukwasha nambaz Maya kujijaman?

¹³ Mu muvu wa 2020, amasalay a mu Risi eza ku chikumbu cha nambaz Maya mulong wa kumukwat. Wafanyina kuya ku dirumburish mulong wa kulondin yitiyij yend. Maya ulondin anch akadivar nau anambaz amukasikesha chirung chinicha chikash. Ulondin kand anch: “Pa chirung chinicha naziya nakash, ni nova ushon ni runeng nakash. Pakwez akadivar nau anambaz antazukang ku telefon ni kwinfundin mikand. Anginkisha kashinsh anch ankatin kamu nakash. Nading nij mutapu umekeshiningau akadivar nau anambaz rukat, pakwez mu muvu wa 2020, nimenap amwinam rukat riner.”

14. Mutapu ik tukutwisha kutaninamu mu ukwash wa akadivar nau anambaz pitudandamedina kujijaman? (Tal kand chipich.)

¹⁴ Yom ukutwisha kusal. Piudandamedina kujijaman, shal piswimp ni akadivar nau anambaz ney. Kangal widjidjek kwit ukwash wa amakurump. Akutwish kwikal mud “chibwik cha kukangesh rinkind, ni ndond ya kujingam mulong wa ruvul wa rinkind mukash.” (Isay 32:2.) Vurik kand anch ambay ney in Kristu niyau arishin ni yikokujol. Kuyikwash antu akwau chisu urishina ni yikokujol kukukukwash kwikal ni yitongijok yisikena ni yiwamp piur pa milong yey.​—Mid. 20:35.

RUCHINGEJ RETU

15. Ruchingej piur pa machuku ma kurutu ramukwasha nchik Yesu, ni ritukwashin nchik niyetu? (Hebereu 12:2)

¹⁵ Yehova watwinkishin kal ruchingej rikash mulong wa kutukwash kujijaman. (Rom 15:13) Vurik mutapu ruchingej ramukwasha Yesu kujijaman pa dichuku dikash mu mwom wend panap pa divu. (Tang Hebereu 12:2.) Yesu wading wij anch, kusutin kushal ushinshamena, wafanyina kumekesh patok anch yom yawonsu yalonday Satan piur pa Yehova yading ya makasu, ni anch Yehova uwanyidin kumulimish. Yesu wading kand uchingedin dichuku dikuyay mwiur kud Tatukwend ni chisu chafanyinay kusal pamwing nau akadivar nend mu Want wa mwiur. Chilik chimwing kand, ruchingej tukweta ra kushakam chikupu mu mangand masu makaninay Nzamb ritukwashin kujijamen yikokujol turishina nich mu mangand minam ma Satan.

16. Ruchingej ramukwasha mutapu ik nambaz umwing kujijaman, ni yom ik wilejidina ku yom yalonday?

¹⁶ Shinshikin mutapu ruchingej ra kushakam mwi ngand yisu ramukwasha nambaz Alla wa mu Risi. Nfumwend amukwata ni amuteka mu rukan pading pachingedinau kumusambish. Alla ulondin anch: “Kulembil piur pa ruchingej retu ra machuku ma kurutu ni kutongijokin pa ruchingej riner kwankwasha kulik kuziy nakash. Nading nij anch dined didap disuden. Yehova ukuwin, pamwing kand niyetu.”

17. Mutapu ik tukutwisha kumekesh kujikitish kwetu mulong wa ruchingej retu rimedina pa Bibil? (Tal kand chipich.)

¹⁷ Yom ukutwisha kusal. Itekina chisu cha kutongin piur pa machuku ma kurutu masangareshina matukaninay kal Yehova. Tong bil mud ud mu mangand masu ni ukat kusanger yiyukish mwinimwa. Mar mawonsu turishina nich katat makumekan mud “ma chisu chikemp ni mapipel.” (2 Ko. 4:17) Ni sal usu wa kuyilej antu akwau yom witiyijina. Tongin mutapu uda mwom wau parishinau ni yikokujol yikash mu mangand minam ma Satan pakad kwijik rutong ra Nzamb piur pa machuku ma kurutu. Kusutin kwau kulond yom yikemp, ukutwish kulangwish maku mau ma kwilej yom yivud piur pa Want wa Nzamb ni kushilamu kwend.

18. Mulong wak tufanyidin kuchingejin mu kushilamu kwa Yehova?

¹⁸ Kupwa kwa kujijamen yikokujol yivud, Yobu wamuleja Yehova anch: “Nij anch, ey ukutwish kusal yawonsu, kwikil chom chikukukasikena kusal.” (Job 42:2) Mud mwajinguninay Yobu, kwikil chom ap chimwing chikutwisha kumukangesh Yehova kuwanyish rutong rend. Uyakin winou ukutwish kutukasikesh chisu tujijamedina yikokujol. Chilakej, tong bil, mband umwing uyedina, uziyin mulong adokter avud akangeny kumwok. Pakwez watan dokter umwing ukweta ukaliweny ni wakuchingejin, wajingunin mayej mend ni wamulej mutapu ukumwokay. Kapamp kamwing ukwov musangar, ap anch chikwit chisu kanang mulong wa kuyerik. Ukudandamen kujijaman mulong wij anch machuku ma kurutu ukuyerik. Mu mutapu umwing kand, tukat kujijaman mulong wa kashinsh tukweta piur pa ruchingej retu ra Paradis ukweza machuku ma kurutu.

19. Yom ik yitukwashina kujijaman?

¹⁹ Mud mutapu twamana kal, Yehova utukwashin kujijaman kusutin malembil, Dizu dend, akadivar nau anambaz netu, ni ruchingej tukweta piur pa machuku ma kurutu. Anch twasadin nawamp ukwash winou utwinkishinay Yehova, ukutukwash chikalap nchik yikokujol tukutwisha kurish nich nlel. Mwamu tukudandamen kujijaman djat kamu ni pakusheshinay chikupu mangand minam ma Satan ni mar mawonsu.​—Flp. 4:13.